Kóshi-qon saıasatynyń 2023-2027 jyldarǵa arnalǵan tujyrymdamasynda kórsetilgen derekterge súıensek, 2011-2022 jyldar aralyǵynda joǵary jáne tehnıkalyq-kásiptik bilimi bar 367 myń eńbekke jaramdy qazaqstandyq shetelge qonys aýdarǵan.
El demografıasyndaǵy kúızelis ásirese 2019-2021 jyldar aralyǵynda qatty baıqaldy. Al elge kóship kelýshilerdiń ishinde joǵary bilimi bar adamdardyń úlesi azaıa túsken. Keıingi 10 jylda elge keletin joǵary bilimdi adamdardyń sany eki eseden astam qysqaryp, 2020 jyly 1,9 myń adamǵa túsken.
Degenmen, bul tendensıa eldegi eńbekke jaramdy adamdardyń sanyna sonshalyq keri áser etip otyr deýge kelmeıdi. Elimiz áli de bolsa, eń jas, kóbeıýge beıim halqy bar memlekettiń biri bolyp sanalady.
1991-2021 jyldar aralyǵynda Ózbekstan, Qytaı, Túrikmenstan, Mońǵolıa memleketterinen 379 myń otbasy nemese 1 mln 101 myń qandas kelip, azamattyq alǵan. Keıingi úsh jylda qandastardyń kelýi de báseńdegenge uqsaıdy. 2016 jyly 33,7 myń qandas, 2019 jyly 17,7 myń qazaq, 2021 jyly 14 myńnan astam qandas, 2024 jyly 12 325 adam oralǵan.
Sońǵy halyq sanaǵy halyq sany 19 mln adamnan asqanyn kórsetti. Sarapshylar qazaqstandyqtardyń qazirgi jas quramy ekonomıka úshin óte qolaıly dep baǵalaıdy. Eńbekke jaramdy dep sanalatyn 15-62 jas aralyǵyndaǵylardyń úlesi – 57,7%.
Bizdegi demografıalyq damýdy Nepal, Kongo, Bangladesh sıaqty elderdegi ósimmen salystyrýǵa kelmeıdi. Halyq sanyn arttyryp qana qoımaı, demografıalyq úderisterdi utymdy ári qaýipsiz basqarý da ońaı sharýa emes ekenin qazirgi geosaıası jaǵdaılar kórsetip otyr. Sondyqtan memleket demografıalyq ósimniń barlyq satysyn sıfrlandyryp, densaýlyq saqtaý, bilim berý salalarymen úndestikte damytýǵa baǵyttalǵan saıasat ustanady.