Parlament Májilisiniń depýtaty Dúısenbaı Turǵanov oıyn bıznesine qatysty zańǵa pikir bildirdi, dep habarlaıdy Ulys.
«Búgin el Prezıdenti mańyzdy Zańǵa – «Qazaqstan Respýblıkasynyń keıbir zańnamalyq aktilerine oıyn bıznesi, lotereıa qyzmeti, densaýlyq saqtaý, memlekettik eńbek ınspeksıasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy. Ulttyq Quryltaıdyń Atyraý qalasynda ótken úshinshi otyrysynda Memleket basshysy jastardyń erekshe táýekel tobyna jatatynyna basa nazar aýdara otyryp, oıynǵa táýeldilikti basty áleýmettik máselelerdiń biri dep ataǵany bárimizdiń esimizde. Prezıdent oıynǵa táýeldilikpen kúresý boıynsha júıeli jumysty jolǵa qoıýdy, Keshendi jospardy jáne tıisti zańdy qabyldaýdy jedeldetýdi tapsyrdy. Mine, nátıje. Parlament oıyn bıznesi, lotereıa jáne lotereıa qyzmeti máseleleri boıynsha zańnamalyq túzetýlerdi qabyldady, sonyń ishinde, Ákimshilik quqyq buzýshylyq týraly kodeksine de. 100-den astam túzetýlerdi depýtattar engizdi. Negizgileri týraly qysqasha. Endi ózin-ózi shekteıtin tulǵalarǵa arnalǵan zań oıyn bıznesine qatysýdy ózin-ózi shekteýdiń eń joǵary merzimin 1 jyldan 10 jylǵa deıin ulǵaıtty. Tyıym salýdy erterek toqtatý múmkin emes bolady», -dedi depýtat jelidegi paraqshasynda.
Sondaı-aq ol boryshkerlerdiń biryńǵaı tizilimine engizilgen jeke tulǵalarǵa qumar oıyndarǵa qatysýǵa jáne bás tigýge qosymsha tyıym salynǵanyn, olardyń sany shamamen 3,5 mıllıon adamdy quraıtynyn jetkizdi.
«Sonymen qatar, joǵaryda atalǵan tulǵalardy qumar oıyndar men bás tigýge tartýǵa jáne jibergeni úshin zańdy tulǵalardyń ákimshilik jaýapkershiligi engizilgen. Endi memlekettik qyzmetkerlerge kez kelgen qumar oıyndarǵa – býkmekerlik keńselerge, kazınolarǵa jáne onlaın kazınolarǵa zańdy túrde shekteý qoıylady. Osylaısha, jalpy sany 280 myńǵa jýyq adamdy quraıtyn áskerı qyzmetkerler, memlekettik mekeme qyzmetkerleri, búdjettik uıymdardyń basshylary qumar oıyndarǵa qatysa almaıdy. Zańdy buzǵan jaǵdaıda olarǵa qatysty qatań sharalar qoldanylady, onyń ishinde, keleńsiz sebeptermen jumystan bosatylady. Oıyn bıznesin uıymdastyrýshylarǵa oıyn mekemelerinde jáne ózderiniń ınternet-resýrstarynda qumar oıyndarǵa qatysýdyń jáne bás tigýdiń qaýiptiligi men zıany týraly eskertýlerdi ornalastyrýǵa mindetteme engizilýde. Zań qumar oıyndarǵa táýeldi adamdardy medısınalyq ońaltý tártibin de belgileıdi. Zańnyń mańyzdy jańalyqtarynyń biri – 21 jasqa tolmaǵan adamdarǵa energetıkalyq sýsyndardy satýǵa tyıym salý. Zań baılanys operatorlaryna qumar oıyndar men bás tigýler týraly jarnamany qamtıtyn habarlamalardy jiberýge tyıym salady, býkmekerlik keńseniń nemese bás tigý dúkeniniń ornalasqan jerinde, sport ǵımarattarynyń ishinde ornalasqandardy qospaǵanda, býkmekerlik keńseler men býkmekerlik dúkenderdiń ǵımarattarda, kólikterde syrtqy jarnamasyna, sportshylardyń jabdyqtarynda tyıym salynady. Buqaralyq aqparat quraldarynda sporttyq taqyryptaǵy, sondaı-aq otandyq telearnalardyń halyqaralyq sport jarystaryn tikeleı translásıasy kezindegi jarnamany qospaǵanda, býkmekerlik keńseler men lotereıalardy buqaralyq aqparat quraldarynda, kıno, beıne jáne anyqtamalyq qyzmetterde jarnamalaýǵa tyıym salynady. Býkmekerlik keńselerdiń jarnamasyn taratqan jaǵdaıda 60 AEK jáne odan joǵary aıyppuldar qarastyrylǵan. Sonymen birge, endi onlaın-kazıno uıymdastyrýshylary eki jylǵa deıin bas bostandyǵynan aıyrylýmen qylmystyq jaýapkershilikke tartylady. Bul rette lotereıa bıletterin turǵyn úılerde, jataqhanalarda, bilim berý, densaýlyq saqtaý, dinı ǵımarattar men qurylystarda, sondaı-aq, bilim berý jáne densaýlyq saqtaý uıymdarynan júz metr radıýsta taratýǵa tyıym salynady. Bul sharalardyń barlyǵy qumar oıyndarǵa táýeldilikpen tıimdi kúresýge yqpal etetinine senimdimin. Al qazir barlyq memlekettik organdardyń, úkimettik emes uıymdardyń, búkil qoǵamymyzdyń birikken jáne júıeli jumysy óte mańyzdy», - dep tolyqtyrdy D.Turǵanov.