Astanada Qazaqstan Respýblıkasynyń Premer-mınıstri Oljas Bektenov pen alǵashqy resmı saparymen kelgen Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Qasymalıev shaǵyn jáne keńeıtilgen quramda kelissózder júrgizdi. Bul týraly Úkimettiń baspasóz qyzmeti habarlady.
Taraptar Qazaqstan Prezıdenti Qasym-Jomart Toqaev pen Qyrǵyzstan Prezıdenti Sadyr Japarov arasynda qol jetkizilgen ýaǵdalastyqtardyń júzege asyrylý barysyn qarady. Onda saýda-ekonomıkalyq, ınvestısıalyq, tranzıttik-kólik, sý-energetıkalyq, týrısik, mádenı-gýmanıtarlyq yntymaqtastyq, sondaı-aq AÓK-ke qatysty máselelerdiń keń aýqymy qamtyldy.
«Memleket basshylarymyzdyń ózara senim men shynaıy dostyq rýhyndaǵy turaqty baılanystary bizdiń kópqyrly qatynastarymyzdy jańa belesterge kóterýge yqpal etti. Saýda baılanystaryn nyǵaıtý jáne tereńdetý eki el ekonomıkasynyń damýyna mýltıplıkatıvti áser etedi. Ótken jyldyń qorytyndysy boıynsha ózara saýda kórsetkishteri taǵy da artyp, $1,7 mlrd-ty qurady. Sonymen qatar biz saýda-ekonomıkalyq ózara is-qımyldy odan ári keńeıtý úshin aıtarlyqtaı áleýetti kórip otyrmyz», — dep atap ótti Oljas Bektenov.
«Shyn máninde, eki baýyrlas memleket arasyndaǵy ekijaqty yntymaqtastyǵy erekshe strategıalyq sıpatqa ıe. Ejelden baýyrlas halyqtarymyzdy ǵasyrlar boıy qalyptasqan dostyq, tatý kórshilik jáne týysqandyq qarym-qatynas, ortaq mádenıet, til, tipti salt-dástúrimiz baılanystyrady. Bul kezdesý eki tarapty da qyzyqtyratyn kóptegen máseleler boıynsha pikir almasýǵa, eki eldiń múddelerine saı keletin jańa usynystar ázirleýge múmkindik beredi dep senemin», — dep atap ótti Adylbek Qasymalıev.
Kelissózder barysynda áleýetti ashý jáne taýar aınalymyn arttyrý tetikteri talqylandy.
Tranzıttik-kólik salasynda qazaq-qyrǵyz shekarasynyń ótkizý qabiletin arttyrý boıynsha keshendi sharalar iske asyrylýda. Shekarada «Aqsý» – «Kamyshanovka» jáne «Besaǵash» – «Kıchı-Kapka» beketteri sıaqty avtomobıl ótkizý pýnktterin jańǵyrtý jáne keńeıtý jumystary júrgizilýde. Sondaı-aq «Sortóbe» – «Tokmok» jáne «Aýqatty» – «Ken-Býlýn» ótkizý beketterin damytý josparlanǵan.
Sý-energetıka salasyndaǵy yntymaqtastyqqa erekshe kóńil bólinedi. Shý jáne Talas ózenderi boıynda vegetasıalyq kezeńde sýmen qamtamasyz etý, Kırov sý qoımasyn qaýipsiz paıdalaný jáne óńirlik energetıkalyq qaýipsizdik máseleleri talqylandy.
Týrızm – ózara tıimdi yntymaqtastyqtyń mańyzdy baǵyty. Jańa týrısik baǵyttardy damytý sharalary onyń ishinde, transshekaralyq eko-baǵyttar qurý, belsendi týrızm úshin ınfraqurylymdy damytý jáne qonaq úı bıznesine ınvestısıalar tartý máseleleri talqylandy.
Mádenı-gýmanıtarlyq yntymaqtastyq jelisi boıynsha bıyl Qyrǵyzstanda Qazaq kınosy kúnderin ótkizý josparlanǵan, sondaı-aq Qyrǵyzstan aýmaǵynda qazaqstandyq joǵary oqý oryndarynyń fılıaldaryn ashý máseleleri pysyqtalýda.
Kelissózder qorytyndysy boıynsha Premer-mınıstr Oljas Bektenov Qazaqstan Úkimeti qazaq-qyrǵyz saýda-ekonomıkalyq áriptestiginiń joǵary serpinin qoldaýǵa daıyn ekenin atap ótti.
