Memleket basshysy Qasym-Jomart Toqaev «Ulytaý – 2019» halyqaralyq
týrısik forýmyna qatysyp, týrızmge qatysty keleli máselelerdi atap ótti.
Forýmnyń ashylýynda «Bul – búkil Qazaq eli qadir tutatyn qasterli ólke. Ulytaý – ultymyzdyń altyn besigi, taǵylymdy tarıhymyzdyń kýási. «Úsh júzdiń basyn qosqan Ulytaýda» babalarymyz ulttyń keleshegin oılap, birliktiń týyn jelbiretken. Qalyń qaýym osy kıeli ólkede el bılegen handardy aq kıizge kóterip, taqqa otyrǵyzǵan. Sondyqtan biz Ulytaý jerine han ordasy, qazaq jeriniń kindigi dep, erekshe qurmetpen qaraımyz!»-dep sózin bastaǵan prezıdent Qasym-Jomart Toqaev qasıetti mekenniń qadir-qasıetin barsha álemge tanymal ǵulamalar da moıyndaǵanyna toqtalyp, oǵan áıgili Gerodottyń jazbalary dálel ekenin alǵa tartty. «Ulytaý topyraǵy – alyp tulǵalardyń rýhy toǵysqan jer.Halyq bul jerge Joshy han, Alasha han, Dombaýyl kesenelerin, Han ordasy men Áýlıetaýdaı kıeli oryndardy kórý úshin keledi.«Azıanyń arystany» atanǵan ataqty Aqsaq Temir de osy óńirge at shaldyrǵan. Ulytaý ańyzdarynda ulttyń uıysýy, jurttyń jumylýy aıqyn kórinis tapqan.
Tirliginde egesken, topyraǵy teńesken batyrlar týraly áńgimeler osy maqsattan týǵan.
Bir-birin daýǵa qısa da, jaýǵa qımaǵan halqymyz bereke-birlikti bárinen joǵary qoıǵan.
Babalardan qalǵan salt-dástúrlerdi búgingi urpaq laıyqty jalǵastyrýy tıis.
Elbasymyz osydan bes jyl buryn Ulytaý tórinde arnaıy suhbat berip, qasıetti mekenniń mán-mańyzyn erekshe atap kórsetkenin bilesizder. Sol sebepti biz búgin kıeli ólkege taǵzym etip, onyń keleshegi jóninde oı bólisý úshin Ulytaý jerinde bas qosyp otyrmyz» degen ol tarıhy tereń Ulytaýdyń qadir-qasıetin baǵalaı bilý – barshamyzǵa ortaq paryz ekenin aıryqsha atap ótti. Sosyn osy ýaqytqa deıin biraz jumystar jasalǵanyn atap aıtqanda, «Ulytaý» ulttyq tarıhı-mádenı jáne tabıǵı murajaı qoryǵy el ıgiligine aınalǵanyn, Ulytaý aýdanynyń ortalyǵynda Qazaq handarynyń aleıasy boı kótergenin mysalǵa keltirdi. Sonymen qatar, memleket basshysy budan bylaı elimizdiń osyndaı baǵa jetpes baı murasyn ózge jurtqa tanytýdyń jańasha joldaryn oılastyrýdyń qajettigine toqtaldy. «Mysaly, Monǵolıa Shyńǵys han tulǵasyn halyqaralyq týrızmdi damytý úshin óte tıimdi paıdalanyp otyr. Al, uly hannyń úlken uly – Joshynyń mazary qazaq jerinde turǵanyn búginde elimizdegi jáne sheteldegi jurtshylyqtyń kóbi bile bermeıdi. Ata-babalardyń amanatyna adal bolý – bizge syn. Sondyqtan biz Altyn ordanyń negizin qalaǵan Joshy hannyń esimin ulyqtaýdy mindetti túrde qolǵa alýymyz qajet. Onyń tarıhı tulǵasyna álemniń nazaryn aýdaryp, kesenesin mádenı týrızm nysanyna aınaldyrý – óte mańyzdy mindet. Ulytaý – halyqaralyq deńgeıdegi etnografıalyq týrızmniń ortalyǵy bolýy tıis. Bul jumystar Altyn ordanyń 750 jyldyǵyn merekeleý aıasynda bastalýy qajet. Ashyǵyn aıtý kerek, qazirgi otandyq týrızm ındýstrıasy – kenje qalyp kele jatqan sala. Jyl saıyn qyrýar qarajat salsaq ta, bul sala tolyqqandy damymaı otyr. Al, Qazaqstannyń barlyq óńirinde týrızm aımaǵy bolýǵa laıyqty kıeli oryndar jetkilikti.
Túrkistan men Otyrar, Saýran men Syǵanaq, Sherqala men Oǵylandy, Berel men Marqakól, Baıanaýyl men Qarqaraly, Sharyn men Kólsaı barsha jurttyń qundylyǵyna aınalýy tıis.
Qorqyt ata, Arystan bab, Qoja Ahmet Iassaýı, Beket ata, Báıdibek bı, Begim ana, Qabanbaı batyr, Raıymbek batyr, Máshhúr Júsip, hakim Abaı, taǵy basqa kóptegen dara tulǵalarymyzdyń esimderin týrızm arqyly keńinen nasıhattaý – búgingi, ıaǵnı bizdiń zamanymyzdyń talaby.
Biz, qazaq halqy, uly tarıhı tulǵalardyń izbasar urpaǵy ekenimizdi eshqashan umytpaýymyz qajet. Ata-babalarymyzdyń rýhyn týrızmniń ozyq úlgileri arqyly dáripteýimiz kerek.
Sondyqtan elimizdegi týrızm salasynyń qazirgi ahýalyn túbegeıli ózgertetin ýaqyt keldi.
Bul jumystardy Ulytaýdaı qasıetti jerlerden bastaýymyz qajet»-dep oılaryn tizbeledi. Sonymen qatar ol otandyq týrızmdi órkendetý úshin jumys istelýi tıis birqatar baǵyttardy atap ótti.
Birinshi. Ulytaý aımaǵy mindetti túrde Qazaqstannyń týrıser tartý kartasynyń aldyńǵy qatarynda bolýy tıis.
Buryn jobalanǵan «Ulytaý» ulttyq tabıǵı parkin qurý máselesin júzege asyrý kerek.
Bıyl munda týrıser úshin arnaıy ortalyq ashylýy tıis.
Bul úshin oblys ákimdigi Úkimetpen birlesip, qazirgi kólik-logıstıkalyq ınfraqurylymdy qajetti tártipke keltirýi kerek.
Óńir týrızm ári demalys aımaǵyna aınalýy úshin joldardyń sapasyn jaqsartý qajet.
Jezqazǵan – Beıneý, Arqalyq – Shubarkól temirjoldarynyń iske qosylýy – Ulytaý úshin óte mańyzdy.
Temirjolmen qatar avtojoldardyń jaǵdaıyna kóńil bólingeni óte qajet.
Qyzylorda – Jezqazǵan – Qaraǵandy – Nur-Sultan qalalary arasyndaǵy joldardy jedel retke keltirý kerek.
Sonymen birge Arqalyq – Ulytaý avtojolynyń ahýaly kún tártibinen túspeýi tıis.
Sýretter akorda.kz saıtynan alyndy
