Elimizdiń medıa keńistigi «Qańtar qasiretinen» keıin san alýan mazmundy  aqparattarǵa toldy. Arasynan «Elimizde bılik álsirep, berekemiz qashsa, mıllıardtaǵan ınvestısıasyn qorǵaý úshin Qytaı ásker engizýi ábden múmkin edi» degen pikirler de kezdestirýge bolady. Osyny taldap kórsek.  
Táýelsizdik jyldarynan beri Qytaı halyq respýblıkasynyń Qazaqstanǵa quıǵan tikeleı ınvestısıasynyń kólemi $22 mlrd shamasynda. Bul elimizge kelgen jalpy tikeleı sheteldik ınvestısıanyń 5% ǵana quraıdy. 
Al 2010-2020 jyldar aralyǵynda Qytaıdyń shet elderge quıǵan  ınvestısıanyń jalpy kólemi $1,4 trln. Iaǵnı elimizge 30 jyl ishinde kelgen qytaıq ınvestısıa olardyń sońǵy on jyldaǵy syrtqy shyǵarǵan jalpy tikeleı sheteldik ınvestısıanyń 1,5% ǵana quraıdy. 
1,5 paıyzdyq ınvestısıany qorǵaýǵa Qazaqstanǵa ásker jóneltý Qytaı úshin qanshalyqty rasıonaldy sheshim bolýy múmkin? Qazaqstannyń geosaıası strategıalyq mańyzdylyǵyna qaramastan Pekın mundaı sheshimge barady degenge sený qıynyraq. 
Qytaıdyń qorǵanys boıynsha «Aq kitaby» (Áskerı doktrına) 2015 jáne 2019 jyldary eki ret ózgertilip tolyqtyryldy. Atalǵan  qujattyń aldyńǵylarynan basty aıyrmashylyǵy retinde «budan bylaı Qytaı óziniń qorǵanys shebin burynǵydaı tek memlekettik shekara syzyǵy tóńireginde eseptemeıtindigin» ataýǵa bolady.
 Alaıda jańarǵan «Aq kitaptyń» negizgi mazmuny burynǵylarymen sabaqtas: «Qytaı eshqashan gegemon bolýǵa umtylmaıdy. Pekın syrtqy saıasatta árqashan «win-win» qaǵıdasyn basshylyqqa alady. 
Halyqaralyq qatynastar men álemdik damýda Qytaı ózin «úlken jaýapkershilik arqalaǵan alyp memleket» (负责任大国 fu zeren da guo) ustaıdy. Halyqaralyq qaýipsizdikti qamtamasyz etý men álemniń turaqty damýynyń basty kepili retinde Qytaı memleketterdiń ishki isine múlde aralaspaıdy. 
Qytaıdyń ustanmy boıynsha, kez kelgen memleket óziniń ishki zańnamasyna jáne ulttyq múddesine sáıkes derbes saıası, ekonomıkalyq, áleýmettik sheshimder qabyldaýǵa jáne qalyptasyp otyrǵan ishki shıelenisti jaǵdaılardy óz paıymynsha sheshýge quqyly». 
«Qańtar qasireti» boıynsha resmı Pekınniń basty ustanymy da osy mazmundas ekenin Almatydaǵy alasapyran kezinde qytaılyq saıasatkerlerdiń jasaǵan pikirlerinen de, 25 qańtardaǵy Ortalyq Azıa-Qytaı samıtindegi Sı Szınpınniń baıandamasynan da baıqaýǵa bolady.

Aıbolat Dálelhan, qytaıtanýshy