Oralda áıeliniń ıntımdik fotosýretterin Whatsapp messendjeri arqyly taratqan er adam sottaldy, dep habarlaıdy Ulys.
BQO sotynyń baspasóz qyzmeti habarlaǵandaı, A. atalǵan baptarǵa sáıkes aıypty dep tanylyp, oǵan 3 jyl 2 aıǵa bas bostandyǵynan aıyrý jazasy taǵaıyndaldy. Ol jazasyn qaýipsizdigi ortasha qylmystyq-atqarý júıesi mekemesinde óteıdi.
Sot talqysynda belgili bolǵandaı, sottalýshy A. men B. zańdy nekede turǵan. Birge ómir súrgen ýaqytta B. Whatsapp messendjeri arqyly kúıeýi A-nyń ótinishi boıynsha oǵan ıntımdik sıpattaǵy fotosýretti óz erkimen jibergen.
«Keıinirek aralaryndaǵy kelispeýshilikterdi eskere otyryp, B. sotqa nekeni buzý týraly aryz bergen kezde, oǵan A. kelispegen. Sóıtip B-ny masqara etetin ıntımdik sıpattaǵy fotosýretterin taratamyn dep qorqytyp, odan aqsha talap ete bastaǵan. Aqyry A. óziniń uıaly telefonynan B-nyń ákesiniń uıaly telefonyna, sondaı-aq Whatsapp messendjerindegi jalpy topqa odan buryn alynǵan ıntımdik sıpattaǵy fotosýretterdi jibergen. Osylaısha, B-nyń jeke ómiri týraly qupıa málimetterdi onyń kelisiminsiz taratqan», delingen sot habarlamasynda.
Úkim zańdy kúshine engen joq.