Iýnýs Emre atyndaǵy túrik mádenı ortalyǵy «Jastar jylyna» oraı talantty jastarǵa qoldaý kórsetý maqsatynda óz is-sharalaryn bastamaq. Ortalyq aldaǵy apta jas sýretshi Nazerke Kemelbaevanyń «Qazaqstandyqtar kózimen Túrkıa» atty kórmesin ótkizedi. Jas talanttyń alǵashqy jeke kórmesiniń tusaýy 14 naýryzda kesiledi. Osy oraıda túrik mádenıeti men ónerine ǵashyq qyl qalam sheberimen bolǵan suhbatty nazarlaryńyzǵa usynamyz.
- Nazerke, aldaǵy apta jeke kórmeń ótpek eken, quttyqtaımyz. Aldymen ózińiz týraly qysqasha aıytyp berseńiz.
-Men 1996 jyly 19 qańtarda Jezqazǵan qalasynda týdym. Balalyq shaǵym ıaǵnı 13 jasqa deıin Semeı qalasynda ótti. Bul qalanyń maǵan bergen rýhanı áseri mol boldy. Qazaq ádebıetiniń uly tulǵalary týǵan, álem tanyǵan Abaı men Muhtardyń elinde óstim. Mektepti Astana qalasyndaǵy №66 qazaq lıseıinde oqyp bitirdim. Qazirgi tańda qazaq Ulttyq óner ýnıversıteti senografıa fakúltetiniń 5 kýrs stýdentimin.
-Beıneleý ónerine qalaı keldiń?
- 15 jasymnan bastap Astana qalasyndaǵy «Balalar sýret mektebi. IýNESKO klýby» atty mektepte qosymsha sýret ónerin oqı bastadym. Atalǵan oqý ornynan akademıalyq bilim aldym. 2014 jyly «Shabyt» ýnıversıtetine oqýǵa tústim. Ýnıversıtette ustazdarym dramatýrgıalyq shyǵarmalarǵa kásibı teorıalyq taldaý jasaýdy úıretti. Alǵan bilimim men tájirıbemniń arqasynda akademıa men analızdi qosqanda jaqsy ılústrasıa shyǵatynyn túsindim. Jalpy, bizdiń úıdegi basty ıdeologıa – kitap kúlti jáne ádebıet álemi. Anamnyń úıde úlken jeke kitaphanasy bar. Meniń anam — Aıgúl Kemelbaeva jazýshy, kınodramatýrg, esseshi, 5 kitaptyń avtory, «Daryn» Memlekettik jastar syılyǵynyń laýreaty. Úıde Balnur ekeýmiz kishkentaıymyzdan mamam oqyp beretin ertegi kitaptardyń mazmunyn jatqa bilip óstik. Ilústrasıalarǵa qyzyǵyp óstim, shımaılap sala beretin balalyq sýretterimdi mamam saqtap qoıypty. Meniń sýret ónerin tańdaýyma úıdegi shyǵarmashylyq atmosfera aıryqsha áser etti.
- Sońǵy kezde túrik mádenıeti, tirshiligi men rýhanıatyna qatysty biraz sýretter salypsyz. Baýyrlas eldiń mádenıetine, ónerine degen qyzyǵýshylyq qaı kezden, qalaı paıda boldy?
-Túrik rýhanıatyna qyzyǵýshylyǵym teleserıaldardan, kıno áleminen bastaldy. Sheber túsirilgen tarıhı fılmderdegi kórikti akterler, kórkem mýzyka, tamasha kostúmder, dızaın men mentalıtet túgel unaıdy. Ápkemniń keńesi boıynsha bir jarym jyl buryn Iýnýs Emre ınstıtýtyn baryp, túrikshe úırene bastadym. Ortalyqta oqyǵan saıyn túrik mádenıetine qyzyǵýshylyǵym artty. Ózim úshin Kappadokıanyń Reri Bacaları men Ystambuldaǵy Sultan Ahmet meshitiniń sýretin kásibı túrli-tústi Faber-Castell qaryndashtarymen grafıka tehnıkasynda salyp, ustazym Ahmet beıge kórsettim. Ol maǵan ary qaraı Túrkıaǵa qatysty sýretter serıasyn salýyma ıdeıa berip, keleshekte kórme asha alatynymyzdy aıtty. Sóıtip, men úshin bul tamasha shyǵarmashylyq úrdiske aınaldy. Meni Nobel syılyǵynyń laýreaty, qazirgi zamanǵy úzdik túrik jazýshysy Orhan Pamýktyń «Meniń atym – Qyzyl» atty romanynda beıneleý ónerine arnalǵan tereń tanym baýraıdy. Romanda mınıatúranyń qas sheberi Kemalıddın Bekzat pen parsynyń uly sýretshisi Bekzat ılústrasıasyn salǵan Nızamıdiń poemalary jıi atalǵan. Jazýshy Bekzatty «Sheberdiń sheberi, sýretshilerdiń padıshahy» dep ataıdy. Bul kitaptan ádebıet pen beıneleý óneriniń óte jaqyn, bir-birin tolyqtyratyn qasıetti óner ekenin ábden uǵýǵa bolady. Keleshekte ádebı shyǵarmalarǵa ılústrasıa salýdy oılap júrmin. Bul rette Bekzat, Gústav Dore, Latıf Qazbekov sıaqty kúshti sýretshilerdiń shyǵarmashylyǵy men úshin shamshyraq sıaqty. 2018 jyly Germanıadan Almaty Gete-Instıtýtynyń arnaıy shaqyrtýymen kelgen maman Tom Vıbberens ótkizgen semınarǵa qatysyp, sertıfıkat alyp, kásibı shyńdalý jolynda bir adym alǵa bastym. Keleshekte myqty ıllústrator bolǵym keledi. Sondyqtan Túrkıada magıstratýrada oqý úshin ótinish berdim.
-Suhbatyńyzǵa kóp raqmet, 14-naýryzda bolatyn kórmeńiz sátti ótsin, armandaryńyzǵa jete berińiz!
Oqyrmandar nazaryna: 14 naryz kúni Iýnýs Emre túrik mádenıet ortalyǵynyń uıymdastyrýymen Qazaq Ulttyq óner ýnıversıtetiniń 5 kýrs stýdenti Nazerke Kemelbaevanyń jeke sýret kórmesi ótedi. «QAZAQSTANDYQTARDYŃ KÓZİMEN TÚRKIA» atty kórme saǵat: 15.00-de bastalady. Kelem deýshilerge esik ashyq.
Meken-jaı: Astana, Turan dańǵyly 37, Han Shatyr OSO, 1 qabat, atrıým zaly.
