Bıyl bizdiń asyl ákemiz, ardaqty atamyz, soǵys jáne eńbek ardageri Oryn Isabekuly 100 jasqa tolar edi. Ómiri ónegege, eńbegi erlikke toly aıaýly jannyń ǵıbratty ǵumyryn eske alý – bizdiń perzenttik paryzymyz.
Oryn Isabekuly 1925 jyly 6 aqpanda Jambyl oblysy Jýaly aýdanynyń Besjyldyq aýylynda dúnıege keldi. 7 klastyq bilim alyp, jastaıynan eńbekke aralasqan. Eline tóngen aýyr kúnderde, 1942 jyly 18 qańtarda nebári 17 jasynda Keńes Armıasynyń qataryna shaqyrylyp, 12 naýryzda Otanǵa adal qyzmet etýge ant berdi.
Soǵys jyldary 55-shi atqyshtar polkinde kýrsant, keıin bólim komandıri bolyp qyzmet atqardy. 1944 jyldyń kókteminen bastap 820 jáne 380-shi atqyshtar polkterinde aǵa komandır retinde jaýyngerlik tapsyrmalardy minsiz oryndady.
1945 jyldyń mamyrynan 1946 jyldyń qarashasyna deıin áskerı komandırlik qyzmet atqaryp, Uly Otan soǵysynyń sońyna deıin jaýyngerlik sapta boldy.
Berlınge deıin jetip, Brandenbýrg qaqpasynyń túbinde aýyr jaralanyp, gospıtálda emdelip, aqyry elge 1946 jyly qarasha aıynda aman-esen oraldy. Maıdandaǵy erligi úshin «Jaýyngerlik erligi úshin», «Erligi úshin», «Berlındi alǵany úshin», «Germanıany jeńgeni úshin» medaldarymen jáne İİ dárejeli «Uly Otan soǵysy» ordenimen marapattaldy.
1947 jyly ómirlik serigi, anamyz Seıtrahmanqyzy Turǵynmen otbasyn quryp, bir shańyraqtyń uıytqysy atandy. 1950 jyly Semeı qalasyndaǵy aýylsharýashylyq tehnıkýmyna oqýǵa túsip, 1953 jyly agronom mamandyǵy boıynsha dıplommen oraldy.
Soǵystan soń el ıgiligi úshin eńbekke aralasyp, 1953–1954 jyldary Besaǵash aýylynda kolhoz tóraǵasy boldy. Keıin Jambyl atyndaǵy «Jemis-júzim» sovhozynda agronom, brıgadır, bas qoımashy sekildi san túrli qyzmetter atqaryp, zeınetke shyqqanǵa deıin tynymsyz eńbek etti. Keń oıly, tereń bilimdi, kókiregi oıaý azamat retinde aýyl-aımaǵyna syıly, qadirli boldy. 1952 jyldan bastap komýnıstik partıa múshesi boldy.
Ákemizdiń esimi Taraz qalasyndaǵy «Jeńis» saıabaǵyndaǵy soǵys ardagerlerine arnalǵan memorıaldyq taqtada jáne Máskeýdegi Uly Otan soǵysy ardagerleriniń murajaıynda altyn árippen jazýly.
Ókinishke qaraı, maıdandaǵy aýyr jaraqattyń saldary densaýlyǵyna áser etip, 46 jasynda ınsýlt alyp, sodan bastap syrqatqa boı aldyrdy. Alaıda, ómirge degen qushtarlyǵy men rýhynyń myqtylyǵy arqasynda uzaq jyldar boıy kúresip, 1986 jyldyń 17 mamyrynda 61 jasynda dúnıeden ótti. Jan-tánimen elin súıgen erdiń jarqyn beınesi júregimizde máńgi saqtalady.
Ákemiz – biz úshin asqar taý, júregi darhan, sózi men isi bir, adamgershiligi bıik tulǵa edi. Aınalasyna tek jaqsylyq darytqan, úlkenge ini, kishige aǵa bola bilgen jan bolatyn. Otbasy úshin ǵana emes, búkil aýyl úshin «Papa» bolǵan jan. Dostary ár ulttan, orys jáne nemis tilderin jetik meńgergen kózi ashyq, kókiregi oıaý azamat bolatyn. El-jurtyna degen janashyrlyǵy erekshe edi.
Asyl ákemiz ben aıaýly anamyzdan 7 qyz, 1 ul tarady. Búginde urpaqtary – nemereleri, shóbereleri, shópshekteri búkil Qazaqstanǵa tarap, ár salada eńbek etip, oqyp, ósip-órkendeýde. Bir áýlettiń ǵana emes, bir qaýym eldiń tiregindeı bola bilgen asyl adamnyń ǵıbratty ǵumyry urpaqqa úlgi.
Árdaıym:
«Árqashanda bıik kóretin,
Men basqadan,
Meniń ákem, meniń ákem
Eń jaqsy adam...»
-degen óleń joldary bizdiń ákemizdiń beınesin dóp basyp turǵandaı. Ol – biz úshin máńgilik asqar taý, jaryq juldyz, ómirimizdiń temirqazyǵy bolyp qala beredi.
Bıyl ákemiz 100 jasqa tolar edi.
Ómiri ónege, sózi ósıet, beınesi máńgi jadymyzda qalatyn ardaqty ákemizge bas ıemiz.
Siz bizdiń júregimizde máńgi tirisiz.
Isabekovtar áýleti
