Elordada uıymdastyrylǵan 5-shi Dúnıejúzilik kóshpendiler oıyndary máresine jetti. 8-13 qyrkúıek kúnderi ótken kóshpendiler Olımpıadasyna 90-ǵa jýyq memleketten 2500-den astam sportshy qatysyp, 21 sport túrinen 97 medal jıyntyǵyn sarapqa saldy, dep habarlaıdy Ulys Týrızm jáne sport mınıstrligine silteme jasap.
«Qazanat» ıpodromynyń janynda boı kótergen «Kóshpendiler álemi» etnoaýylynda ótken 5- dúnıejúzilik kóshpendiler oıyndarynyń jabylý saltanatyna Týrızm jáne sport mınıstri Erbol Myrzabosynov, Dúnıejúzilik etnosport konfederasıasynyń prezıdenti Bilál Erdoǵan qatysyp, sóz sóıledi. E.Myrzabosynov baıraqty báseke ulttyq sportymyzdy ulyqtap, salt-dástúrimizdi dáriptep, mádenı muramyzdy tórtkúl dúnıege pash etken biregeı oqıǵa retinde tarıhta qalǵanyn atap ótti.
«Memleket basshysy Qasym-Jomart Toqaevtyń tikeleı bastamasymen qazaq topyraǵynda uıymdastyrylǵan Dúnıejúzilik kóshpendiler oıyndary – máni tereń, mazmuny baı biregeı joba. Onyń túrki áleminiń altyn besigi – Qazaq jerinde jalaýyn jelbiretkeni – biz úshin zor mártebe ári shyn maqtanysh. Oıyndarda 30-dan astam eldiń sportshylary medal ıelendi. Júlde alǵan memleketter qatarynda muhıttyń arǵy jaǵynan kelgen Kanada men Meksıka sportshylary da bar. Dúbirli dodaǵa 90-ǵa jýyq memlekettiń qatysýy, 30-dan astam eldiń júldegerler qatarynan kórinýi – dúnıejúzinde kóshpendiler oıyndaryna degen qyzyǵýshylyqtyń artyp kele jatqanyn ańǵartady. Kelesi, 6-shy Dúnıejúzilik kóshpendiler oıyndaryn baýyrlas memleket – Qyrǵyz Respýblıkasy qabyldaıdy. Qyrǵyz eliniń aldaǵy básekeni joǵary deńgeıde ótkizýine tilektespin. Kóshpendiler Olımpıadasynyń bedeli bıikteı bersin!», – dedi Erbol Myrzabosynov.
Jabylý saltanatynyń sońynda oıyndardyń resmı nyshany sanalǵan torsyqty kelesi oıyndardy qabyldaıtyn Qyrǵyz Respýblıkasynyń Mádenıet, aqparat, sport jáne jastar saıasaty mınıstri Altynbek Maqsutovqa tabys etildi.
Aıta keteıik, oıyndar elordadaǵy 7 sport kesheninde, atap aıtqanda, «Astana Arena» stadıony, «Qazanat» ıpodromy, «Alaý» muz saraıy, Jaqsylyq Úshkempirov atyndaǵy Jekpe-jek saraıy, «Qazaqstan» jeńil atletıkalyq sport kesheni, «Dýman» kesheni jáne Ulttyq mýzeıde ótti.
