Biz qazir aqparat ǵasyrynda ómir súrip jatyrmyz. Tehnologıa qaryshtap damyp jatqan kezeńde zaman talabyna saı bilimdi de bilikti, damyǵan, jan-jaqty urpaq tárbıeleý búgingi kúnniń basty talaby. El bolyp turaqty damý úshin bizge árıne birinshi kezekte bilim men mádenıet kerek. Adam balasyn bilim men parasattylyqqa baýlyp, dúıim jurtty tárbıeleıtin jer ol - kitaphana. Al osy kıeli ordanyń tynys-tirshiligine jan beretin jandar árıne, kitaphanashylar.
Qanshaıym Izambekova kitaphana salasynda 40 jyldan astam ýaqyt eńbek etip keledi. Búgingi tańda QR Ulttyq kitaphanasynda kitap qoryn tolyqtyrý qyzmetiniń jetekshisi bolyp jumys isteıdi. Kitap qoryn saqtap, qordy tolyqtyryp, ulǵaıtyp, el ıgiligine jaratýdyń has sheberi. Materıaldardy jikteý, bıblıografıa jáne taǵy basqa kóptegen qyzmetterdi atqarady.
«Bala kezimnen kitap oqyǵandy qatty jaqsy kóretinmin. Sodan kitaphanashy bolsam eken dep armandadym. Sondaǵy oıym, mol kitaptyń ortasynda otyryp alyp qalaǵan kitabymdy oqý. Balanyń armany ǵoı endi. Tilegim oryndalyp, bıblıografıa mamandyǵyna oqýǵa túsip, qazir ózimniń súıikti mamandyǵym boıynsha jumys istegenime bıyl 42 jyl tolady. Jalpy san túrli mamandyq bar ǵoı. Biraq menińshe kitaphanashy eń tartymdy, eń qyzyqty mamandyq. Osy mádenı mekende júrip bilimimdi arttyrdym, adamdarmen qarym-qatynas qurýdy meńgerdim, barynsha shyńdaldym. Bul baǵa jetpes kıeli mamandyq, sebebi kitaphana eń mádenıetti meken», - dep oı túıindedi Qanshaıym Izambekova.
Kitap qoryn tolyqtyrý – kitaphanashy jumysynyń mańyzdy tusy. Kóne kitaptar men sırek qoljazbalardy durys saqtaý, elektrondy nusqaǵa aınaldyrý, materıaldardy sıfrlandyrý syndy jaýapty jumystar kóp. Óz isine adal qyzmetker retinde Qanshaıym apaı áriptesteri men oqyrmandarynyń arasynda syı-qurmetke ıe. Áli de kóp oqıdy, únemi izdenedi, jas kadrlarǵa kórgen-bilgenin úıretedi.
«Qazaqstan Respýblıkasynyń Ulttyq kitaphanasynda 24 bólim jumys isteıdi. 14 oqý zaly bar. Sol zaldardyń barlyǵynda oqyrmandar tolyq otyrady, bizden aqparat alady. Búginde eshkim kitap oqymaıdy degen sózge senbeımin. Óıtkeni bizdiń zaldarymyzda oqyrmandar jetkilikti. Qazirgi tańda kitaphanashylardyń mártebesi ósip, aılyq jalaqysy jyldan jylǵa kóbeıip keledi. Jalpy elimizde mádenıet salasyna kóp kóńil bólinip jatyr. Memleket tarapynan qoldaý bar. Qoldaýsyz bolmaıdy, óıtkeni kitaphanashynyń eńbegi qoǵam men memlekettiń damyp, ósip-órkendeýine óte qajet. Bunyń bári QR Prezıdenti Qasym-Jomart Toqaevtyń kitaphanalar men kitaphanashylardyń áleýmettik jaǵdaıyna erekshe mán berýiniń arqasy.
«Adam balasy óz-ózimen ońasha qalyp oılanatyn, bilim álemińne alańsyz súńgıtin, tynyshtyqta jan rahatyna bólenetin jer qaıda? dese men «kitaphanada» der edim. Bizge kelgen oqyrmandardyń alǵysyna qarap osyny baıqadym. Sondyqtan da kitaphanashy men oqyrman arasyndaǵy jyly qarym-qatynas bolýy kerek. Munda jıi bas suǵatyn adamdar bir jaqynyń sıaqty bolyp qalady, tipti bizdiń jumysymyzǵa shabyt berip, turaqtylyq pen senimdilikti nyǵaıtady desek bolady. Sondyqtan da oqyrmanǵa barynsha jaıly ortany qalyptastyrýǵa tyrysamyz», - dep oı túıindedi tájirıbeli kitaphanashy.
ıta ketelik, kitaphanashy mamandyǵy - eń kóne mamandyqtardyń biri. Kitaphanalar álemde tórt myń jarym jyldyq tarıhy bar shýmer mádenıeti kezeńinen paıda bolǵan. Sol zamannan beri kitaphanashylar bilim men mádenıet jarshysy bolyp kele jatyr.
