Parıjde Qazaqstan Prezıdenti Qasym-Jomart Toqaevtyń Fransıaǵa memlekettik sapary aıasynda Gıme Azıa óneriniń ulttyq mýzeıinde «Qazaqstan: Uly Dala jaýharlary» kórmesiniń saltanatty ashylý rásimi ótti, dep habarlaıdy QR Mádenıet jáne aqparat mınıstrliginiń baspasóz qyzmeti.
Kórmeniń ashylý saltanatynda Qazaqstan Respýblıkasynyń Mádenıet jáne aqparat mınıstri Aıda Balaeva álem tarıhyndaǵy Uly dalanyń úsh myń jyldyq erekshe mádenı fenomenin pash etetin kórmedegi biregeı eksponattardyń mańyzdylyǵyn atap ótti.
Ol fransýz áriptesterine kórmeni uıymdastyrýǵa qoldaý kórsetkeni úshin alǵys bildirip, Qazaqstan men Fransıa arasyndaǵy mádenı qarym-qatynastyń mańyzdylyǵyna erekshe toqtaldy.
«Keıingi jyldary Qazaqstan men Fransıa arasyndaǵy baılanys artyp, jańa serpin aldy. Qazaqstan Prezıdenti Qasym-Jomart Toqaev pen Fransıa Prezıdenti Emmanýel Makronnyń ózara saparlary ekijaqty yntymaqtastyqty nyǵaıta tústi. Áriptesim, mınıstr hanym Rashıda Datı men Gıme mýzeıiniń prezıdenti, doktor Iannık Lıntske osy kórmeni uıymdastyrýda kórsetken qoldaýy úshin, sondaı-aq, Gıme mýzeıi ujymyna joǵary deńgeıdegi kásibı biliktiligi men úılesimdi jumysy úshin erekshe alǵysymdy bildiremin», – dedi Aıda Balaeva.
Ekspozısıada Qazaqstannyń Ulttyq mýzeıi men «Áziret Sultan» mýzeı-qoryǵynyń koleksıalarynan alynǵan 35 sırek artefakt usynylǵan. Olar Qazaqstan tarıhynyń negizgi kezeńderin pash etedi.
«Mýzeıdiń bıik mısıasy – ótkenniń mádenı qundylyqtaryn kórsete otyryp, zamanaýı tarıhty jasaý. Kórmege qoıylǵan eń qundy jádigerler alǵash ret sheteldik kórermenge zamanaýı, jańashyl formatta usynylyp otyr. Búgin biz jańa tarıhtyń – elderimiz arasyndaǵy qarym-qatynastardyń damý tarıhynyń kýási bolyp otyrmyz», – dedi mınıstr.
Kórermender kóshpeli mádenıettiń jáne memlekettiliktiń damýyn beıneleıtin qundy muralardy tamashalaı alady, olardyń qatarynda ǵun-sarmat kezeńinen bastap Qazaq handyǵyna deıingi jádigerler bar. Kórmeniń ereksheligi – kórermenge Qazaqstan mádenıetiniń sanǵasyrlyq tarıhy men baı qazynasyn tereń tanýǵa múmkindik beretin ımmersıvti mýltımedıalyq kontent.
«Kórmede Qazaqstannyń bes «Djokondasy» qoıylǵan. Bul kórmeniń ıdeıasy bir jyl buryn Fransıa prezıdentiniń Qazaqstanǵa sapary kezinde týyndady. Onyń maqsaty – kórermenge Qazaqstan mádenıetin, onyń álemdik tarıhta alar ornyn tanystyrý. Kórme ejelgi tarıhtan bastap 18-shi ǵasyrdaǵy Qazaqstanǵa deıingi aralyqty qamtyǵan. Bul – Qazaqstannyń peızajdaryn, dybystaryn, ásirese, osy órkenıettiń bes kezeńin beıneleıtin bes shedevrdi nemese shedevrler ansamblin kórsetetin ımmersıvti saıahat», – dedi Gıme – Azıa óneriniń ulttyq mýzeıi dırektory Iannık Lıns.
Kórme 2025 jyldyń 24 naýryzyna deıin jalǵasady. 5 qarashada, kórmeni Qazaqstan men Fransıa Prezıdentteri Qasym-Jomart Toqaev pen Emmanýel Makron tamashalaıdy.
Aıta ketý kerek, kórme jobasyna Qazaqstannyń Fransıadaǵy elshiligi, Bolat Ótemuratov qory men Alstom Kazakhstan kompanıasy, Visor Group JSHS jáne Keńes Raqyshev qoldaý kórsetti.
