Májilis depýtaty Irına Smırnova Qazaqstanǵa shetel agentterine qatysty zańqajet dep, Úkimet basshysynyń atyna saýal joldady, dep habarlaıdy Ulys.

 Ótken plenarlyq otyrysta biz elimizdegi USAID qyzmetine qatysty depýtattyq saýal joldadyq. USAID tarıhyndaǵy sıaqty, amerıkalyqtardyń ózderi qarjylandyratyn memlekettik BAQ-tyń destrýktıvtiligin taǵy da moıyndaıdy. Olardy ózderi soǵystan keıingi shyndyqta ıdeologıalyq kúres úshin qurylǵan ótkenniń qaldyǵy dep ataıdy, - dedi Irına Smırnova Májilistiń jalpy otyrysynda. 

Halyq qalaýlysynyń málimetinshe, qazir elimizde 200-ge jýyq úkimettik emes uıymdy shetel qarjylandyrady. Onyń 70%-na AQSH qarjy quıady. 

— Bizdiń úkimettik emes uıymdarǵa qarjylyq jáne materıaldyq-tehnıkalyq kómekti kórsetilgen tizimderge kirmeıtin basqa da sheteldik qurylymdar men elshilikter usynady. Qoldaý negizinen BAQ pen sóz bostandyǵy, maqsatty toptardyń quqyqtary men múddelerin qorǵaý, demokratıa men azamattyq qoǵamdy damytý, lıberaldy reformalar, toleranttylyq pen azamattyq belsendilikti arttyrý salasyndaǵy jobalarǵa beriledi, - deıdi ol.

Qazaqstan Halqy Assambleıasynyń 30 jyldyǵyna oraı Almaty qalasyndaǵy «Ózbek ulttyq-mádenı ortalyǵy» qoǵamdyq birlestiginiń tóraǵasy Abdýlla Ismatýllaevpen shaǵyn suhbat

– Abdýlla Japaruly, Qazaqstan Halqy Assambleıasynyń 30 jyldyǵymen quttyqtaımyz! Osy data siz úshin neni bildiredi?

– Raqmet! Men úshin bul mereke – Qazaqstandaǵy turaqtylyqtyń, beıbitshiliktiń jáne birliktiń nyshany. Assambleıa – jaı ǵana ınstıtýt emes, ol – halyqtyń júregindegi senim, tatýlyqqa degen umtylystyń sımvoly. Bul 30 jyl – túrli etnostar men ulttardyń ózara qurmetpen ómir súrip kele jatqanyn dáleldeıtin jyldar.

– Siz jetekshilik etetin ózbek ulttyq-mádenı ortalyǵy Assambleıamen qalaı jumys istep keledi?

– Almaty qalasyndaǵy ortalyǵymyz Assambleıa qurylǵan kúnnen bastap tyǵyz baılanysta jumys istep keledi. Biz mádenı sharalar, til úıretý kýrstary, ulttyq merekeler ótkizý arqyly qazaq halqymen birlikte ómir súrip jatqanymyzdy kórsetip kelemiz. Assambleıa bizge óz bolmysymyzdy saqtaı otyryp, Qazaqstan qoǵamyna paıdaly bolýǵa múmkindik berip otyr.

– Qazirgi jastar arasynda etnosaralyq kelisimdi saqtaý úshin ne mańyzdy dep esepteısiz?

– Birinshiden – bilim, ekinshiden – ashyq dıalog. Jastar óz tarıhyn, tilin bilýimen qatar, Qazaqstandy ortaq úıi retinde qabyldaýy kerek. Biz olarǵa senýimiz kerek, ári olardy yntalandyrýymyz qajet. Assambleıa – dál osyndaı ashyq alań. Munda ultqa bólinbeı, ıdeıa men jaýapkershilikke negizdelgen yntymaqtastyq qalyptasqan.

– 30 jylda jetken basty jetistik qandaı dep oılaısyz?

– Eń basty jetistik – halyqtyń arasynda senim ornady. Biz qazir ártúrli ult ókilderimen bir dastarqanda otyryp, qýanysh pen qaıǵyny birge bólise alatyn deńgeıge jettik. Bul – naǵyz rýhanı jetistik. Beıbit ómirdiń qadirin bilý – bizge amanat.

– Oqyrmandarǵa qandaı tilegińiz bar?

– Birligimiz bekem bolsyn. Qazaqstan – bárimizge ortaq úı. Osy úıde árkim óz tilin, dástúrin saqtaı otyryp, bir maqsatqa qyzmet etýi kerek. Assambleıa soǵan jol ashyp berip otyr. Sol múmkindikti baǵalaı bileıik!

Astana qalasynda S. Seıfýllın atyndaǵy Qazaq agrotehnıkalyq zertteý ýnıversıtetinde «Quqyqtyq dıalogtar» jobasy aıasynda «Eýropalyq Odaq elderindegi advokattardyń quqyqtyq mártebesi» taqyrybynda vebınar ótti.

İs-sharany Qazaqstan Respýblıkasy Prezıdentiniń janyndaǵy Adam quqyqtary jónindegi komısıa, S. Seıfýllın atyndaǵy Qazaq agrotehnıkalyq zertteý ýnıversıteti jáne «Akselerator dobra: İzgilik elshisi» Ulttyq eriktiler qozǵalysymen birlesip uıymdastyrdy.

 Vebınardyń moderatory Qazaqstan Respýblıkasy Prezıdentiniń janyndaǵy Adam quqyqtary jónindegi komısıanyń tóraǵasy Igor Rogov boldy.

 Vebınardyń negizgi baıandamashysy Eýropa Keńesi adam quqyqtary jónindegi dırektoratynyń yntymaqtastyq baǵdarlamalary basqarmasynyń bólim basshysy Sergeı Dıkman boldy, ol Eýropalyq Odaq elderindegi advokattardyń quqyqtyq mártebesi týraly aıtyp berdi.

 İs-sharaǵa sondaı-aq Qazaqstan Respýblıkasynyń Ádilet vıse-mınıstri Laýra Mersalımova, Respýblıkalyq advokattar alqasynyń tóraǵasy Aıdyn Bıkebaev, Basqarma múshesi - operasıalyq qyzmet jónindegi prorektor Saparhan Omarov, QR Prezıdentiniń janyndaǵy Adam quqyqtary jónindegi komısıa tóraǵasynyń orynbasary, Sorbonna-Qazaqstan Instıtýtynyń dırektory Aınur Sábıtova, QR Prezıdentiniń janyndaǵy Adam quqyqtary jónindegi komısıanyń hatshysy Álıa Ehlasova, sonymen qatar qashyqtan baılanysta bolǵandar QR Prezıdenti janyndaǵy Adam quqyqtary jónindegi komısıanyń músheleri men Saraptamalyq keńesi, advokattar, Ádilet mınıstrligi ortalyq apparatynyń jáne aýmaqtyq bólimshelerdiń tıisti qyzmetkerleri, «Akselerator dobra: İzgilik elshisi» eriktileri qatysty.

Atalǵan is-shara Qazaqstan Respýblıkasy Prezıdentiniń janyndaǵy Adam quqyqtary jónindegi komısıanyń otyrysy qarsańynda ótkizildi, onda Qazaqstanda advokatýra ınstıtýtyn damytý máselesin qaraý josparlanýda. 

 Vebınar praktık-zańgerlerdiń, advokattardyń, memlekettik organdar men qoǵamdyq uıymdardyń ókilderiniń úlken kásibı qyzyǵýshylyǵyn týdyrdy.