Kóktem shyǵa sala elimizdegi barlyq sý qoımasyna tekserý júrgizip, olardy kúrdeli jóndeýden ótkizý úshin arnaıy joba ázirleý qajet. Óıtkeni, sý qoımalarynyń basym kópshiligi ótken ǵasyrdyń 60-70 jyldarynda salynǵan. Sodan beri durys jóndeý kórmegendikten búginde qalt-qult etip áreń tur. Mundaı pikirdi sý sharýashylyǵy salasynyń ardageri, ınjener-gıdrotehnık Ámirhan Kenshimov bildirdi.
«Elimizdegi sý qoımalary óz ornynda tur. Kezinde olardyń bári arnaıy zerttelgen jerlerge ornalastyrylǵan. Endi 5-6 kúnde olar sýǵa lyq tolady. Bul qoımalarǵa daladaǵy sýdy qýyp ákep, quıa almaısyń. Ol úshin aryq, kanal, tehnıka kerek. Al ondaı múmkindigimiz joq. Osydan kelemiz de «nege sý basyp jatyr?», «nege Úkimet qaramaıdy?» dep baıbalam salamyz. Úkimet qaıtyp qaraıdy, jaǵdaıy joq. Sý resýrstary jáne ırrıgasıa mınıstrliginiń ózin ótken jyly ǵana qurdyq. Elimizdegi sý ınfraqurylymyna 30 jyldan astam ýaqyttan beri eshkim qaramaǵan, ábden tozǵan. Endi ony qaıtyp qalpyna keltirmekpiz? Ol úshin mlrd-taǵan dollar qarajat kerek. Ony Úkimet qalaı bóledi? Múmkin emes. Bólgen kúnniń ózinde osy isteıtin tehnıka joq, mekemeler joq. Jalpy, elimizdegi sý qoımalarynyń kópshiligi 60-70 jyldary salynǵan. Sondyqtan kóbi óte qaýipti. Jóndeý jumystary durystap júrgizilmegen. Osy sý qoımalarynan aıyrylyp qalmaıyq desek, kóktemnen bastap kópfaktorly zertteý júrgizip, ne isteý kerektigin baǵamdap, durys joba ázirleý qajet», - dedi ınjener-gıdrotehnık.
Osy oraıda ol Táýelsizdik jyldary ishinde salynǵan «Kóksaraı» sý qoımasynyń da jaǵdaıy múshkil ekendigine alańdaýshylyq tanytty.
«Máselen, «Kóksaraı» sý qoımasyn elimizdegi múmkindigi mol «Bazıs» korporasıasy saldy. Biraq onyń qurylys isine aralasqan sý sharýashylyǵyn biletin mamandary bolmady. 47 shaqyrymǵa sozylǵan qoıma 3 mlrd tekshe metr sýǵa arnalǵan. Qazir 2 mlrd tekshe metrge de jetkize almaı otyrmyz. Óıtkeni, durys turǵyzylǵan joq. Jobany durys qaramaǵan. Jobany qaraıtyn bilikti mamandary bolmaǵan. Endi oǵan qaıtadan kúrdeli jóndeý júrgizý qajet. Oǵan qurylysqa ketkendeı qyrýar qarajat kerek. Sebebi, 47 shaqyrym dambany qaıta jasaý qajet. Munyń bári elimizde sý sharýashylyǵyna qatysty qurylys mekemeleriniń joqtyǵy. Kezinde bári quryǵan, talan-tarajǵa túsken», - dedi maman.
Onyń atap ótýinshe, qazir oryn alǵan qarǵyn sýǵa Sý resýrstary jáne ırrıgasıa mınıstrliginiń kinási joq.
«Byltyr ǵana qurylǵan mınıstrliktiń eshqandaı kinási joq. Óıtkeni, ol batpandap kirgen aýrýdy bir kúnde julyp tastaı almaıdy. Mysqaldap, mysqaldap shyǵady. 5-6 jyldan keıin ǵan ajóndeledi. Mınıstrlik jaqsy jumys istep jatqanymen mamandary joq. Úkimet bólgen shtattyń ózin toltyra almaı otyr. Sý sharýashylyǵy mamandyǵy boıynsha dıplom alǵandary bar. Al biraq, bilikti mamandary joq», - dedi Ámirhan Kenshimov.

Ulttyq deńgeıdegi lotereıa naryǵynda bul baǵytty aıqyndap otyrǵan qurylym – «Sátti Juldyz».
Lotereıa tek utys mehanıkasymen shektelmeıdi. Máselen, «LOTO 6/49» tırajdyq formaty – 
«Ázirge eshkimge aıtqan emespin. Bul ata-anam úshin tosynsyı bolǵanyn qalaımyn», — deıdi ol.