Jetisý oblysy Sarqan qalasynyń mańyndaǵy sharýa qojalyqtarynyń birinde maıly zyǵyr ósirile bastady. Egis naýqanynyń barysymen jumys sapary aıasynda aýdanǵa barǵan oblys ákimi Beıbit Isabaev tanysty, - dep habarlaıdy Jetisý oblysy ákiminiń baspasóz qyzmeti.

«Ǵalym» sharýa qojalyǵynda bıyl100 ga maıly zyǵyr egildi. Dándi júgeri, soıa, arpa, bıdaı ósirýge beıimdelgen bul sharýashylyq osy daqyldy bıyl alǵash ret seýip otyr.

- Zyǵyrdyń agrotehnıkasyn, tuqym naryǵyn zertteı otyryp, biz «ortasha Lırına» sortyn otyrǵyzdyq. Bul óte ónimdi, quramynda maıy kóp sort. Ár gektarynan 20-25 s alamyz, al maıdyń mólsheri keminde 50% bolady dep kútip otyrmyz. Aımaq aýmaǵynda maıly daqyldardy qaıta óńdeıtin birneshe kásiporyn bar ekenin eskersek, shıkizatty ótkizýde qıyndyq týyndamaıdy dep oılaımyz. Aldyn ala kelisimder jasasyp ta qoıdyq. Sonymen qatar zyǵyr dándi daqyldardyń aýyspaly egisine de paıdaly, - dep atap ótti SHQ basshysy Ǵalym Rahmetqalıev.

Aýdannyń Almaly aýylyndaǵy «Jumaǵalı» sharýa qojalyǵynyń egistikterinde de kóktemgi dala jumystary qarqyndy júrip jatyr. Sharýashylyqta egistik te, mal ósirý de qolǵa alynǵan. Munda 537 bas iri qara, 600 bas usaq mal jáne 630 jylqy ósirilip otyr.

- Bıyl biz jazdyq arpa, kúnbaǵys jáne birinshi ret qant qyzylshasyn septik. Ázirge qyzylshany 38 gektardan bastap otyrmyz. Kelesi jyly ulǵaıtý josparymyzda bar, óıtkeni bul tabysty daqyl, ári osy daqyldy ósirýshilerge memlekettik qoldaý kórsetiledi. «Konvıza Smart» joǵary ónimdi tuqymyn seýip jatyrmyz. Sharýashylyǵymyzda qajetti aýyl sharýashylyǵy tehnıkasy bar, degenmen ótken jyly aýdanda servıstik-daıyndaý ortalyǵyna arnap satyp alynǵan zamanaýı tehnıka bizge úlken kómek boldy, osy tehnıkalardyń qyzmetterin paıdalanyp otyrmyz. Mysaly, pnevmatıkalyq sepkishtiń artyqshylyǵy sol, avtopıloty bolǵandyqtan onyń jyldamdyǵy jaqsy, onymen kúndiz de, túnde de jumys isteı alasyz. Osy tehnıkanyń kómegimen bir kúnde 30 ga jer egýge bolady, - deıdi SHQ basshysy Egemen Jumaǵalı.

Osy oraıda Beıbit Isabaev Jetisý oblysynda óndiriletin aýyl sharýashylyǵy shıkizatynyń 65%-y óńirde qaıta óńdeletinin, sonyń ishinde qant óndirisine erekshe kóńil bólinip otyrǵanyn atap ótti.  

- Mysaly, ótken jyly oblystyń 5 aýdanynda 8 jańa servıstik-daıyndaý ortalyǵy quryldy, sonyń arqasynda 30 sharýa qojalyǵy qant qyzylshasyn óndirýge qajetti jalpy somasy 2,5 mlrd.teńgege 62 birlik tehnıka satyp alýǵa múmkindik aldy. Aýyl sharýashylyǵyn damytý úshin, ónimdilikti arttyrý úshin ozyq tehnologıalardy meńgerý kerek. Buǵan zamanaýı aýyl sharýashylyǵy tehnıkasy da úlken yqpal etedi, - dedi oblys ákimi.

Ótken jyly Sarqan aýdanynda 3 jańa servıstik-daıyndaý ortalyǵy quryldy, olarǵa 4 sepkish, 3 qyzylsha kombaıny jáne 3 pálek jınaıtyn mashınasy satyp alyndy. Qazir aýdanda 6 SDO jumys isteıdi, onda 30-ǵa jýyq aýyl sharýashylyǵy tehnıkasy bar. Aýdanda qant qyzylshasyn ósirýdiń agrotehnologıasy damyǵanyn eskersek, ótken jyly tátti túbir alańy 2 esege ulǵaıtyldy, al bıyl taǵy 900 gektarǵa artady. Osylaısha, Sarqan aýdanynda bul daqyldyń alqaby 3,8 myń gektar bolmaq.

Jalpy osy jyly oblystyń agroónerkásiptik keshenin damytýǵa 45 mlrd.teńge bólindi, onyń 27 mlrd. teńgesi nemese 59% – sýbsıdıa.

Qazaqstan halqynyń birligi kúnine oraı Almatynyń Jetisý aýdanynda biregeı is-shara ótti.

Almaty ákimdiginiń málimetinshe, «Aınabulaq» shaǵyn aýdanyndaǵy № 4 mamandandyrylǵan balalar-jasóspirimder sport mektebinde el tarıhyndaǵy eń uzyn — 1704 metr bolatyn laǵman daıyndaldy jáne bul fakt Qazaqstannyń Rekordtar kitabynda resmı tirkeldi. Jalpy 19 keli unnan qamyr ılenip, 50-den astam aspaz taǵamdy eki saǵattyń ishinde daıyndaǵan.

— Aspazdardyń aldynda qamyrdy jyrtyp almaı daıyndaý mindeti turdy. Qıyndyqtarǵa qaramastan bizdiń aspazdar ony óte jaqsy daıyndady, — dedi Jetisý aýdany Analar keńesiniń tóraıymy Rahıma Omarova.

Búgin Taldyqorǵan qalasynda Halyqaralyq meıirbıke kúni atalyp ótti. Bul kúndi meıirbıke isi qyzmetiniń negizin qalaýshylardyń biri Florens Naıtıngeıldiń týǵan kúnin atap ótý úshin 1974 jyly Halyqaralyq meıirbıke isi keńesi tańdady.

Saltanatty jıynda Jetisý oblysy Densaýlyq saqtaý basqarmasynyń basshysy Sadykov Asqar Maratuly quttyqtaý sózinde densaýlyq saqtaý júıesindegi meıirbıkelerdiń rólin atap ótti. Olardyń uzaq jyldar boıy jınaǵan baǵa jetpes eńbegi men tájirıbesi naýqastardy túrli dertten saýyqtyrýǵa qyzmet etip keledi.

- Sizderdi 12 mamyr – Halyqaralyq meıirbıkeler kúnimen shyn júrekten quttyqtaımyn! Búgin sizder osy uly istiń laıyqty izbasarysyzdar. Sizder kúndelikti kásipqoılyqtyń joǵary deńgeıin jáne árbir pasıentke shynaıy qamqorlyqty kórsetesizder.

Sizderdiń jumystaryńyz tek tereń bilimdi ǵana emes, sonymen birge shydamdylyqty, meıirimdilik pen janashyrlyqty qajet etedi. Sizderge shydamdylyq pen adaldyq tanyta bilgenderińiz úshin shyn júrekten alǵys aıtamyn! - dedi basqarma basshysy.

Saltanatty jıynda Kóksý aýdandyq ortalyq aýrýhanasynyń onkolog kabınetiniń meıirbıkesi Laıla Balabekova «Eńbek ardageri» tósbelgimen jáne Oblystyq juqpaly aýrýlar aýrýhanasynyń bas meıirbıkesi Janna Karıeva «Densaýlyq saqtaý isine qosqan úlesi úshin» tósbelgisimen marapattaldy.

Kásibı mereke qarsańynda «Óz kásibiniń úzdigi» tórt nomınasıasy boıynsha jeńimpazdar marapataldy.

"Stasıonardyń úzdik medbıkesi" nomınasıasyn Aqsý ortalyq aýdandyq aýrýhanasynyń hırýrgıalyq bólimshesiniń medbıkesi Raýshan Kazıeva, "Alǵashqy medısınalyq-sanıtarlyq kómektiń úzdik medbıkesi"  nomınasıasyn Eskeldi aýdandyq ortalyq aýrýhanasynyń meıirbıkesi Araı Ahmetova,  "Úzdik feldsher" nomınasıasyn Beskól dárigerlik ambýlatorıasynyń feldsheri Azamat Quramysov jáne "Úzdik akýsher" nomınasıayn  Alakol aýdandyq Aqtúbek dárigerlik ambýlatorıasynyń meıirbıkesi Madına Nızabekova  jeńip aldy.

Sonymen qatar meıirbıkeler kásibı merekege oraı Densaýlyq saqtaý mınıstriniń Qurmet gramotasymen jáne Alǵys hattarymen marapattaldy.

Jetisý oblysyndaǵy medısınalyq uıymdarda alty myńnan astam meıirbıke jumys isteıdi.