Berik Ábdiǵalıulynyń "Umytylǵan qaharmandar" atty kitabynyń tusaýkeseri ótti
«Nur Otan» partıasynyń Ortalyq apparatynda «Umytylǵan qaharmandar» atty jańa kitap kópshilikke tanystyryldy. Bul eńbekke Uly Otan soǵysynda erligimen kózge túsip, joǵary nagradalarǵa usynylǵanymen túrli sebepterge baılanysty tıisti marapatyna qol jetkize almaǵan batyrlar týraly málimetter jınaqtalǵan. Kitaptyń jáne jalpy jobanyń avtory, belgili qoǵam qaıratkeri Berik Ábdiǵalıuly. Partıa baspasóz qyzmetiniń habarlaýynsha, jańa eńbek «Nur Otan» partıasynyń «Ardagerlerdi ardaqtaıyq» partıalyq jobasy aıasynda jaryq kórdi. Saltanatty rásimge partıa Tóraǵasynyń Birinshi orynbasary Máýlen Áshimbaev, belgili memleket jáne qoǵam qaıratkerleri, Parlament depýtattary, úkimettik emes uıymdardyń ókilderi jáne kitapqa esimderi engizilgen batyrlardyń urpaqtary qatysty.
«Nur Otan» partıasy Tóraǵasynyń Birinshi orynbasary jobanyń basty maqsaty umyt qalǵan ardagerlerimizdiń esimderin dáriptep, olardyń erlikterin keńinen nasıhattaý ekenin aıtty.
– Osy ıgilikti isimiz arqyly biz jas urpaqty otansúıgishtikke tárbıeleýdi maqsat tuttyq. Kezinde ózderi kóre almaı ketken qurmet pen marapatty búgingi urpaqtaryna kórsetip, atalarymyzdyń erlikterin dáripteýdi kózdedik. Bul – búgingi beıbit kúnimizdiń kepili bolǵan ákelerimiz ben atalarymyzdyń aldyndaǵy perzenttik boryshymyz, – dedi Máýlen Áshimbaev.
Sonymen qatar ol atalǵan eńbekti Berik Ábdiǵalıulynyń «Zabytye Geroı. Geroı Sovetskogo Soıýza» atty jınaǵynyń jalǵasy dep qabyldaýǵa da bolatynyn jetkizdi. B.Ábdiǵalıulynyń buǵan deıin de osy salada zertteýler júrgizip, 2015 jyly joǵaryda atalǵan jınaqty jaryqqa shyǵarǵan bolatyn.
«Umytylǵan qaharmandar» atty jańa eńbekke Keńes Odaǵynyń Batyry ataǵyna usynylǵan 133 maıdanger týraly málimetter engizilgen. Olardyń kópshiligi jaıaý ásker. Sondaı-aq artıllerıst, pýlemetshi, saper, tankıst, tankige qarsy ózdiginen júretin (SÝ, ISÝ) atqysh, mergen, sanıtar, baılanysshy, kavalerıs, desantshy, áýe desanty, ushqysh, ınjenerlik ásker jáne İİHK-niń (NKVD) qyzmetkerleri bar.
Jınaqqa tek marapattaý paraqshasy tiziminen tabylǵan ardagerler ǵana engizilgen. Degenmen, partıa Tóraǵasynyń Birinshi orynbasary elimizde soǵysta eren erlik kórsetse de laıyqty marapatyn ala almaǵan batyrlarymyz tizimdegiden áldeqaıda kóp ekenine nazar aýdardy.
– Erlikteri eskerilse de, der kezinde elenbeı qalǵan batyrlarymyzdyń budan da kóp ekeni belgili. Sol sebepti «Nur Otan» partıasy osy baǵytta eńbektenip júrgen azamattarǵa qoldaý kórsetýdi odan ári jalǵastyra beredi. Búgin kópshilikke tanystyrylǵan jańa týyndy bizdiń aýqymdy jumysymyzdyń birinshi kezeńi ǵana. Kelesi kezeńde bastamanyń aıasyn keńeıtip, batyrlarymyzdyń esimderin mektepterge, kóshelerge jáne aýyldarǵa berý isin qolǵa alsaq degen josparymyz bar. Aldaǵy ýaqytta sol josparlarymyzdyń da júzege asatynyna senemiz, – dedi Máýlen Áshimbaev.
Sondaı-aq ol Ekinshi Dúnıejúzilik soǵysyna baǵa bermesten buryn oǵan eń aldymen adamdardyń taǵdyry, qarapaıym halyqtyń erligi turǵysynan qaraý kerektigin aıtty.
– Qazirgi tańda Uly Otan soǵysy týraly túrli pikirler aıtylyp júr. Biraq biz sol kezde atalarymyz ben ákelerimiz, ájelerimiz ben analarymyz batyrlyq pen batyldyqtyń, qaırat pen qajyrlyqtyń, sabyr men tózimniń jarqyn úlgisin kórsetkenin keńinen nasıhattaýymyz kerek. Olar bastaryna túsken aýyr jaǵdaıǵa qaramastan adamı qasıetteri men ómirlik ustanymdarynan aınymaı, Otan úshin otqa túsýden tartynǵan joq. Sondyqtan sol bir surapyl jyldar týraly aıtqan kezde aldymen osyndaı sátterge nazar aýdarǵan jón, – dedi «Nur Otan» partıasy Tóraǵasynyń Birinshi orynbasary.
Óz kezeginde joba avtory Berik Ábdiǵalıuly soǵys jyldarynda 497 otandasymyz Keńes Odaǵynyń Batyry ataǵyna ıe bolǵanyn, alaıda usynylǵandardyń sany budan da kóp ekenin aıtty.
– Ókinishke qaraı, kóptegen jaýyngerge qaharman ataǵy qaıtys bolǵan soń berildi. Reseı, Belarýs, Ýkraına jáne basqa da Eýropa elderinde mıllıondaǵan belgisiz jáne aty saqtalmaǵan jas batyrlar máńgilikke qaldy. Soǵys alańdarynda izdestirý jumystary áli kúnge deıin jalǵasýda. Bizdiń ár batyrymyz este saqtaýǵa, qurmet kórsetýge laıyq. Olardyń esimderi eshqashan umytylyp ketpeýi kerek. Sebebi olardyń árqaısysy naǵyz qaharmandar, – dedi Berik Ábdiǵalıuly.
Budan basqa, avtor segiz birdeı otandasymyzdyń eki ret Batyr ataǵyna usynylǵanyn tilge tıek etti. Olardyń ekeýi kapıtandar Saǵadat Nurmaǵambetov pen Seıthan Temirbaev. Eki ret usynylǵanymen olar bir ret bolsyn Batyr ataǵyn aldy. Al qalǵandaryna eki retinde de berilmegen.
– Olardyń arasynda saperler – qatardaǵy jaýynger Qudaıbergen Janserikov jáne aǵa serjant Minaıqul Saǵyndyqov, atqyshtar rotasynyń komandıri, leıtenant Qabysh Kóktaev, 248 jaýdyń kózin joıǵan mergen, aǵa serjant Zeıtin Baıjanov jáne maıor V.Gýtov pen leıtenant V.Gýtovskıı bar, – degen Berik Ábdiǵalıuly aldaǵy ýaqytta bul baǵytta jumystar ári qaraı jalǵasatynyn jetkizdi.
Al Halyq Qaharmany Muhtar Altynbaev Uly Otan soǵysyna qatysqan jáne sol kezde tylda eńbek etken kez kelgen adamǵa qurmet kórsetý barshamyzdyń basty mindetimiz bolýy kerektigin aıtty.
– Juldyzyn alsa da, almasa da, biz úshin soǵysqa qatysqan aǵa býynnyń bári batyr. Bul – bizdiń elimizdiń tarıhy. Qandaı pikir aıtylsa da tarıhty eshkim joqqa shyǵara almaıdy. Sondyqtan biz Jeńisti jaqyndatqan, soǵan úlken úles qosqan batyrlarymyzdy osylaı dáriptep, tek óz elimizdiń kóleminde emes, odan tys aýdıtorıalarǵa da keńinen nasıhattaýymyz kerek, – dedi Muhtar Altynbaev.
Odan bólek, basqosýda Májilis depýtaty Baqytbek Smaǵul, «Qaharman» qorynyń dırektory Sabyr Qasymov jáne kitapqa esimi engizilgen batyr Minaıqul Saǵyndyqovtyń uly Marat Saǵyndyqov sóz alyp, atqarylǵan jumystyń mańyzy men máni týraly pikirlerin bildirdi. İs-sharany belgili jýrnalıs, kórnekti qalamger Nurtóre Júsip júrgizip otyrdy.
