Qazaqstan Prezıdenti Qasym-Jomart Toqaev baýyrlas eldiń basshysy Shavkat Mırzıóevtiń shaqyrýymen Ózbekstan Respýblıkasyna memlekettik saparmen bardy. Búgin Tashkentte Ózbekstan Prezıdenti Shavkat Mırzıóevpen shaǵyn quramda kezdesýler ótkizdi. Sosyn taraptar birqatar eikjaqta qujattarǵa qol qoıyp, birlesken málimdeme jasady. Akorda.kz saıtynda jarıalanǵan Qazaqstan Respýblıkasynyń Prezıdenti Qasym-Jomart Toqaev jáne Ózbekstan Respýblıkasynyń Prezıdenti Shavkat Mırzıóevtiń birlesken málimdemesin tolyq usynamyz.
2019 jylǵy 14-15 sáýirde Ózbekstan Respýblıkasynyń Prezıdenti Shavkat Mırzıóevtiń shaqyrýymen Qazaqstan Respýblıkasynyń Prezıdenti Qasym-Jomart Toqaevtyń Ózbekstanǵa Memlekettik sapary ótti.
Ózbekstan Respýblıkasynyń Prezıdenti Shavkat Mırzıóev Qasym-Jomart Toqaevty Qazaqstan Respýblıkasynyń Prezıdenti laýazymyna kirisýimen jyly jáne shyn kóńilmen quttyqtap, Qazaqstannyń qazirgi zamanǵy damýyna jáne shet memlekettermen kópjaqty baılanystaryna laıyqty úles qosqan halyqaralyq aýqymdaǵy saıasatker jáne memlekettik qaıratker retindegi mol tájirıbesin atap ótti.
Memleket basshylary Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń eki el arasyndaǵy baýyrlastyq baılanystar men strategıalyq seriktestikti, onyń ishinde Ortalyq Azıadaǵy beıbitshilikti, turaqtylyq pen qaýipsizdikti qamtamasyz etýdegi yntymaqtastyqty damytýǵa qosqan kórnekti rólin aıryqsha atap kórsetti.
Osy turǵyda, Prezıdent Q.Toqaev Prezıdent Sh.Mırzıóevti Qazaqstan-Ózbekstan qatynastary men óńirlik yqpaldastyqty keńeıtýge jáne nyǵaıtýǵa baǵyttalǵan Qazaqstannyń qazirgi syrtqy saıası baǵytynyń saqtalatynyna sendirdi.
Kelissózder barysynda prezıdentter dástúrli dostyq, ózara syılastyq, senim men ashyq rýhta eki jaqty qatynastardyń negizgi máselelerin, ózara múddelilik tanytylǵan ózekti óńirlik jáne halyqaralyq problemalardy talqylap, eki el arasyndaǵy keńformatty yntymaqtastyqty odan ári tereńdetý men keńeıtýdiń perspektıvalaryn qarastyrdy.
Memleket basshylary tereń tarıhı jáne rýhanı baılanystarǵa, tatý kórshilik pen ózara qoldaýǵa negizdelgen Qazaqstan Respýblıkasy men Ózbekstan Respýblıkasy arasyndaǵy jaqyn ári myǵym dostyq qatynastardyń óspeli sıpatyn rızashylyqpen atap ótip, ekijaqty qatynastardy jańa sapalyq deńgeıge kóterý eki baýyrlas eldiń múddelerine jaýap beretinine senim bildirdi.
Prezıdentter, Qazaqstan Respýblıkasy men Ózbekstan Respýblıkasy arasyndaǵy 1998 jylǵy 31 qazandaǵy Máńgilik dostyq týraly shart pen 2013 jylǵy 14 maýsymdaǵy Qazaqstan Respýblıkasy men Ózbekstan Respýblıkasy arasyndaǵy Strategıalyq seriktestik týraly shartta bekitilgen prınsıpter men mindettemelerge buljymas beriktigin rastaı otyryp, tómendegiler týraly málimdeıdi:
Qazaqstan Respýblıkasynyń Úkimeti jáne Ózbekstan Respýblıkasynyń Úkimeti arasyndaǵy 2017-2019 jyldarǵa arnalǵan Ekonomıkalyq yntymaqtastyqtyń strategıasyn júıeli oryndaý eki eldiń strategıalyq múddeleriniń birligine negizdelgen, ekonomıka salasyndaǵy ózara tıimdi jáne jemisti yqpaldastyqty ulǵaıtýǵa qyzmet etedi.
Ekijaqty saýdanyń oń qarqynyn rızashylyqpen atap óte otyryp, memleket basshylary ekijaqty saýda kólemin 2020 jyldyń sońyna 5 mlrd.dollarǵa deıin ósirýdi, onyń qurylymyn ártataptandyrýdy, sondaı-aq óńiraralyq yqpaldastyqty qosa alǵanda, ekonomıkalyq kooperasıa men ınvestısıalyq yntymaqtastyqtyń uzaq merzimdi jańa nysandaryn damytýdy qamtamasyz etýge óz umtylystary boıynsha ortaq pikirde.
Taraptar Qazaqstan men Ózbekstan arasyndaǵy 2018 jylǵy 16 qarashada Shymkent qalasynda ótken alǵashqy Óńiraralyq yntymaqtastyq forýmynyń jáne 2019 jylǵy 15 naýryzda Tashkent qalasynda ótken Ortalyq Azıa elderiniń birinshi óńirlik ekonomıkalyq forýmynyń qorytyndylaryn oń baǵalady.
Mundaı formattar ekijaqty jáne óńirlik deńgeılerde ózara tıimdi ekonomıkalyq yntymaqtastyqty nyǵaıtý men ulǵaıtýǵa, saýda, ınvestısıalar, logıstıka salalaryndaǵy jańa perspektıvti jobalardy iske asyrýǵa, ıntegrasıalanǵan ónerkásiptik tehnoparkter, ǵylymı-ınnovasıalyq klasterler men erkin ekonomıkalyq aımaqtardy qurýǵa septigin tıgizedi.
Prezıdentter ekijaqty yntymaqtastyq jónindegi birlesken úkimetaralyq komısıanyń qyzmetin jandandyrý men jetildirýdiń, sondaı-aq eki eldiń Úkimet basshylaryn teń tóraǵalar etip taǵaıyndaý jolymen onyń statýsyn kóterýdiń mańyzdylyǵyn atap ótti.
Memleket basshylary halyqaralyq saıasattyń ózara múddeli, mańyzdy máseleleri boıynsha taraptar ustanymdarynyń uqsastyǵyn rastady jáne Ortalyq Azıanyń gúldenýi men halyqtarynyń ıgiligi úshin turaqtylyq pen qaýipsizdik atmosferasyn nyǵaıtýǵa qolǵabys etýge eki jaqtyń da umtylysyn atap kórsetti. Taraptar SHYU, TMD, AÓSSHK men basqa da halyqaralyq jáne óńirlik uıymdar sheńberinde ózara tıimdi yntymaqtastyqty jalǵastyrýǵa ýaǵdalasty.
Ózbekstan lıderi Qazaqstan Respýblıkasynyń 2017-2018 jyldardaǵy BUU Qaýipsizdik Keńesiniń turaqty emes múshesi retinde Ortalyq Azıa memleketteriniń ortaq múddelerin halyqaralyq arenada ilgeriletý máselelerindegi qyzmetine joǵary baǵa berdi.
Elderdiń basshylary BUU jáne basqa halyqaralyq uıymdar sheńberinde eki taraptyń halyqaralyq bastamalaryn ózara qoldaý boıynsha eki el ustanymdarynyń myzǵymastyǵyn rastady.
Taraptar óńirde jáne jalpy álemde qalyptasyp otyrǵan ahýaldy baǵalaýdaǵy ortaq ustanymdardy atap kórsetip, óńirdegi qazirgi zamanǵy syn-tegeýrinder men qaterlerge qarsy turý men olardyń aldyn alýǵa baǵyttalǵan, eń aldymen ekijaqty formatta jáne kópjaqty qurylymdar sheńberinde halyqaralyq terorızmge, dinı ekstremızmge, esirtki trafıgine, transulttyq uıymdasqan qylmysqa, zańsyz kóshi-qonǵa jáne basqa da problemalarǵa qarsy kúreste birlesken sharalar qabyldaýdy jaqtap sóıledi.
Memleket basshylary Aýǵanstan Islam Respýblıkasyn (AIR) qalpyna keltirý úderisindegi kúsh-jigerlerdi biriktirýge mańyz beredi. Qazaqstan men Ózbekstannyń prezıdentteri AIR ekonomıkasyn jańartýǵa beıildilikterin rastady jáne Aýǵanstanmen uzaq merzimdi tatý kórshilik yntymaqtastyqty óristetý, sonyń ishinde kólik komýnıkasıalary, bilim berý men densaýlyq saqtaý salalaryndaǵy iri jobalardy iske asyrý jolymen damytý qajettigin jaqtaıdy.
Aýǵan basshylyǵy júzege asyryp jatqan beıbitshilik pen tatýlasýǵa qaraı qadamdardy qoldaý úshin «Beıbit úderis, qaýipsizdik salasyndaǵy yntymaqtastyq jáne óńirlik ózara yqpaldastyq» atty Aýǵanstan jónindegi Tashkent konferensıasyn qosa alǵanda, óńirlik jáne halyqaralyq forýmdardyń mańyzdylyǵyn atap kórsete otyryp, eki el basshylary Aýǵanstandaǵy beıbit úderiske múddeli halyqaralyq qoǵamdastyq pen kórshi memleketterdiń kúsh-jigerlerine járdemdesýdi jaqtady.
Qazaqstan Prezıdenti 2020 jyly Tashkentte Islam Yntymaqtastyq Uıymynyń (IYU) ǵylym jáne tehnologıalar boıynsha ekinshi samıtin ótkizýge qoldaý bildirdi. Taraptar 2017 jylǵy qyrkúıekte Astanada ótken IYU ǵylym jáne tehnologıalar boıynsha birinshi samıtiniń jumysyn joǵary baǵalap, onyń qorytyndylary men sheshimderin júzege asyrýdy IYU ekinshi samıti sheńberinde jalǵastyrýǵa ýaǵdalasty.
Memleket basshylary qorǵanys jáne áskerı-tehnıkalyq saladaǵy, sondaı-aq ǵaryshtyq zertteýler men ázirlenimder salasyndaǵy yntymaqtastyqty odan ári damytýǵa járdemdesý nıetteri týraly málimdedi.
Eki memlekettiń basshylary Aral teńizi baseınindegi naqty baǵdarlamalar men jobalardy iske asyrý boıynsha óńir elderiniń halyqaralyq uıymdar, qarjylyq jáne ekologıalyq ınstıtýttarmen yqpaldastyǵyn keńeıtý arqyly Araldy qutqarýdyń halyqaralyq qory sheńberindegi yntymaqtastyqty jandandyrýǵa ózara múddelilikti rastady.
Qazaqstan men Ózbekstan halyqtarynyń mádenı, tarıhı jáne rýhanı birligin atap óte otyryp, Q.Toqaev pen Sh.Mırzıóev ǵylym, bilim berý, mádenıet, óner, týrızm, sport jáne basqa da salalardaǵy yntymaqtastyqty odan ári qarqyndy damytýǵa beıildilikterin rastady.
Taraptar 2018 jyly Qazaqstandaǵy Ózbekstan jylynyń sátti ótkizilýin jáne 2019 jylǵy 15 sáýirdegi Ózbekstandaǵy Qazaqstan jylynyń saltanatty ashylýyna rızashylyqtaryn bildirdi. Mundaı is-sharalar qazaq jáne ózbek halyqtarynyń baýyrlastyǵy men rýhanı týystyǵynyń, eki eldiń shynaıy dostyǵy men taǵdyrlarynyń ajyramas jaqyndyǵynyń nyshany bolyp tabylatynyn, sondaı-aq halyqtar arasyndaǵy tatý kórshilik qatynastaryn nyǵaıtýǵa, ózara túsinistik pen senimdi, kórshilik qoldaýdy tereńdetýge járdemdesedi dep atap ótti.
Memleket basshylary Qazaqstan men Ózbekstan arasyndaǵy memlekettik shekarany demarkasıalaý úderisiniń sátti júrip jatqanyn, sondaı-aq eki eldiń shekara mańyndaǵy turǵyndarynyń turmys-tirshiligin jaqsartýdy, transshekaralyq ekonomıkalyq baılanystar men gýmanıtarlyq almasýlardy jandandyrýdy, azamattardyń ózara saparlaryn arttyrýǵa septigin tıgizetin ótkizý beketteri qyzmetiniń tıimdiligin qamtamasyz etýdi quptady.
Eki eldiń prezıdentteri óz aýmaǵynda turatyn ekinshi tarap ókilderiniń etnıkalyq, tildik jáne ulttyq mádenıetterin saqtaý men damytý úshin yntymaqtastyqty nyǵaıtýǵa, taraptardyń zańnamalaryna sáıkes olardyń ókilderiniń qoǵamdyq-saıası, mádenı jáne áleýmettik-ekonomıkalyq ómirine belsendi qatysýyna jaǵdaı jasaýǵa nıetterin rastady.
Qazaqstan Respýblıkasy men Ózbekstan Respýblıkasy ekijaqty jáne kópjaqty qol qoıylǵan sharttardy ýaqytyly jáne sapaly júzege asyrýdyń, sondaı-aq eki memleket arasyndaǵy sharttyq-quqyqtyq bazany odan ári keńeıtýdiń mańyzdylyǵyn atap kórsetti.
Qazaqstan Respýblıkasynyń Prezıdenti Qasym-Jomart Toqaev Ózbekstan Respýblıkasynyń Prezıdenti Shavkat Mırzıóevke, búkil ózbek halqyna jyly qabyldaý men qonaqjaılyq úshin alǵysyn bildirdi jáne Ózbekstan basshysyn oǵan yńǵaıly ýaqytta Qazaqstanǵa saparmen kelýge shaqyrdy. Sapardyń merzimderi dıplomatıalyq arnalar arqyly kelisiledi.
Sýretter akorda.kz jáne presizdent.uz saıttarynan alyndy.
Tashkent, 2019 jylǵy 15 sáýir
