Astana mańyndaǵy «Arǵymaq» at-sporttyq saýyqtyrý kesheninde elordalyq elshilerdiń qatysýymen 5-shi Dúnıejúzilik kóshpendiler oıyndary aıasynda «Atqa miný dástúri» respýblıkalyq chellendji ótti, dep habarlaıdy qalalyq ákimdiktiń resmı saıty.
Jyldyń eń mańyzdy oqıǵasy sanalatyn 5-shi Dúnıejúzilik kóshpendiler oıyndaryn qoldaýǵa jáne jobany halyq arasynda nasıhattaý maqsatynda qurylǵan bir top elshi aıtýly sharanyń kýási boldy. Elshilerdiń quramynda Ulttyq at sporty Federasıasy men Ulttyq sport túrleri Qaýymdastyǵynyń negizin qalaýshylardyń biri, «Atbegiler men shabandozdary» qazaqstandyq uıymynyń tóraǵasy, Ulttyq sport túrlerinen eńbek sińirgen jattyqtyrýshy, jazýshy-pýblısıst Sádibek Túgel boldy. İs-shara aldynda Sádibek Túgel qatysýshylarǵa aq batasyn berip, kezekti respýblıkalyq «Atqa miný dástúri» chellendjiniń shymyldyǵyn ashyp berdi.
«Dúnıejúzilik kóshpendiler oıyndaryna qatysatyn barlyq sportshylarǵa shyn júrekten sáttilik tileımin! Sizder qazaq halqynyń maqtanyshy bolyp, ulttyq sportymyzdy álemge tanytady degen senimdemin. Árbir jarysta óz sheberlikterińizdi, batyldyqtaryńyzdy jáne qajyrly eńbekterińizdi kórsetip, elimizdiń týyn bıikke kóterýlerińizge tilektespin. Jeńisti sátterimiz kóp bolyp, ata-babalarymyzdyń rýhy sizderge qýat bersin!» - dedi Astana qalasynyń elshisi Sádibek Túgel.
Aıtýly sharaǵa Astana qalasy Dene shynyqtyrý jáne sport basqarmasyna qarasty mekeme qyzmetkerleri jáne elimizge tanymal birqatar sportshylar qatysty.
Aıta keteıik, «Birlik kerýeni» jobasy elimizdiń barlyq aımaǵynda uıymdastyrylýda. Astana qalasynyń bir top elshisi kúni keshe kókpardan ótken sheberlik sabaǵyna arnaıy qatysqan bolatyn. Uıymdastyrýshylardyń aıtýynsha, «Birlik kerýeni» jobasy aıasynda qurylǵan elshiler aldaǵy ýaqytta da elorda tórinde Ulttyq sport túrlerinen ótetin jarystardyń kýási bolady.