Qazaqstan Premer-Mınıstri Oljas Bektenov Astana qalasynyń ákimi Jeńis Qasymbek jáne Aqmola oblysynyń ákimi Marat Ahmetjanovpen aǵymdaǵy sý tasqyny jaǵdaıyn tekserdi. Bul týraly Úkimettiń baspasóz qyzmeti habarlady.
Astana qalasy arqyly tasqyn sýlardy ótkizýge jáne yqtımal sý tasqynynan qorǵaýǵa arnalǵan Astana kontrrettegishiniń jaı-kúıi tekserildi. Sonymen qatar, Maıbalyq kóli men Vácheslav sý qoımasynyń jaǵdaıyn baqylady.
Astanalyq kontrrettegishte sýdyń aǵýy qazir sekýndyna 30 tekshe metrdi quraıtyny baıandaldy. Kontrrettegishke kelip jatqan aǵyn sekýndyna 248 tekshe metrdi quraıdy. Búgingi tańda kontrrettegishtiń sý aǵyzý qabiletin sekýndyna 40 tekshe metrge deıin arttyrý josparlanyp otyr.
Sý resýrstary jáne ırrıgasıa mınıstrliginiń málimetteri boıynsha ahýal turaqty jáne udaıy baqylaýda, Astana qalasyn sý basý qaýpi joq.
Oljas Bektenovke Astana sý qoımasyndaǵy jaǵdaı týraly baıandaldy.
Sýdy aǵyzý sekýndyna 400 tekshe metr deńgeıinde júzege asyrylady, sý qoımasynyń kólemi 409 mln tekshe metrdi quraıdy. Preobrajenskıı torabynda sharyqtaý shegine jetti, Nura ózeni arqyly torapqa quıatyn sý aǵyny azaıyp keledi: qazirgi ýaqytta sekýndyna 1400 tekshe metr ótýde.
Astana qalasy men Aqmola oblysynyń ákimdigi jaqyn mańdaǵy eldi mekender men qalalardy sý basýdyń aldyn alý boıynsha birlesken jumystar júrgizýde.
Taıtóbe aýylynda sý tasqynynan negizgi qorǵanys qyzmetin atqarǵan úıindilerdi nyǵaıtý jumystary aıaqtalýda. Bıyl qoldanystaǵy 2400 metrlik bógetke uzyndyǵy 1200 metr, bıiktigi 2,5 metr bolatyn jańa bóget turǵyzyldy.
Jedel shtab Astana, Qosshy qalalary men Taıtóbe aýylyndaǵy sý qoımalarynan sý jiberý derekteri boıynsha jasalǵan boljamdardy eskere otyryp, sý tasqyny jaǵdaıyna monıtorıń júrgizedi.
