foto: Aqorda
Memleket basshysy Sý tasqynyna qarsy is-sharalardy úılestirý jáne sý tasqyny saldaryn joıý jónindegi respýblıkalyq shtabtyń otyrysyn ótkizdi, dep habarlaıdy Aqorda.
Qasym-Jomart Toqaev qazirgi ýaqytta ahýal áli de óte kúrdeli ekenin atap ótti.
Onyń aıtýynsha, bes aımaqta, ıaǵnı Atyraý, Batys Qazaqstan, Shyǵys Qazaqstan, Aqmola jáne Soltústik Qazaqstan oblystarynda sý tasqynynyń ekinshi tolqyny bolýy múmkin.
Qalǵan alty oblysta, atap aıtqanda, Qostanaı, Qaraǵandy, Aqtóbe, Abaı, Pavlodar, Ulytaýda jaǵdaı turaqtala bastaǵan.
Memleket basshysy adamdardy der kezinde qaýipsiz jerge kóshirý jáne qarǵyn sýdan zardap shekken azamattarǵa qajetti kómek berý qazirgi basty mindet ekenine nazar aýdardy.
Prezıdent óziniń tapsyrmasy boıynsha memlekettik materıaldyq rezervten arnaýly tehnıka jáne basqa da jabdyqtar alýǵa ruqsat etilgenin aıtty.
— Men shyǵyndy óteý úshin tıimdi tásilder qarastyrý jóninde naqty tapsyrma berdim. Bul maqsatqa búdjet qarajatymen qatar «Qazaqstan halqyna» qory men iri bıznes ókilderi bólgen qarjy jumsalady. Sondaı-aq taǵy bir óte mańyzdy másele. Bul — sý basqan aımaqtardaǵy epıdemıologıalyq ahýal. Jaǵdaıdy qatań baqylaýda ustaý qajet. Kóktemgi egis naýqanyna da daıyndalý kerek. Sý astynda qalǵan eldi mekenderde eshqandaı zań buzýshylyqqa jol bermeý qajet. Meniń tapsyrmammen Úkimet basshysy jáne onyń orynbasarlary qazir aımaqtarda júr. Olar jaǵdaı turaqtalǵansha barlyq jumysty úılestiredi, elmen birge bolady, — dedi Qasym-Jomart Toqaev.
Memleket basshysy tabıǵı apattan zardap shekken aımaqtardaǵy azyq-túlik qaýipsizdigi máselesin aıryqsha baqylaýda ustaý jáne baǵanyń ósýine jol bermeý qajet ekenine taǵy da nazar aýdardy.
Sondaı-aq azamattar úshin áýe jáne temir jol kólikterine bılettiń qymbattaýyna jol berýge bolmaıtynyn eskertti.
— Úkimet pen ákimdikter zardap shekken adamdardy ornalastyrý, olarǵa qajetti kómek berý máselelerin tez arada sheshýge tıis. Qazir bul jumystar atqarylyp jatyr. Evakýasıalyq pýnktterdegi jaǵdaıdy turaqty baqylaýda ustaý kerek. Joǵalǵan qujattardy qalpyna keltirý, quqyqtyq jáne psıhologıalyq kómek kórsetý pýnktterin jedel uıymdastyrý qajet. Aıtpaqshy, joǵalǵan qujattar da problema bolady. Adamdar úılerin asyǵys tastap ketti. Qujattaryn qalpyna keltirýge kómektesý kerek. Jaǵdaı óte kúrdeli aýdandarda qoǵamdyq shtabtar ornalastyrylyp, túsindirý jumystary júrgizilsin, — dedi Prezıdent.
Jıyn barysynda Densaýlyq saqtaý mınıstrligine Aýyl sharýashylyǵy mınıstrligimen birge elimizdegi sanıtarıalyq-epıdemıologıalyq jáne epızootıalyq jaǵdaıǵa baqylaýdy kúsheıtip, táýlik boıy monıtorıń júrgizý, sondaı-aq kóppáterli úılerge, áleýmettik jáne basqa da nysandarǵa dezınfeksıa jasaý jóninde tapsyrma berildi.
Sý tasqynyna baılanysty juqpaly aýrýlardyń taralyp jatqany jáne epıdemıologıalyq jaǵdaıdyń nasharlaǵany týraly áleýmettik jelilerde jarıalanǵan aqparat rastalmady.
Ónerkásip jáne qurylys mınıstrligine turǵyn úılerdi, áleýmettik ınfraqurylymdy, komýnaldyq sharýashylyq nysandaryn qaıta qalpyna keltirý jumystaryn úılestirý úshin jedel top jasaqtaý jóninde tapsyrma berildi.
— Sý basqan óńirlerdiń ákimderi qajetti qarjylandyrý týraly esepti jedel shtabqa tez arada berýi kerek. Sondaı-aq aýmaqty qoqystan, qıraǵan úıler men qurylystardyń úıindilerinen tazartqan jón. Zardap shekken óńirlerge Aýyl sharýashylyǵy, Kólik, Densaýlyq saqtaý, Sý resýrstary, Tótenshe jaǵdaılar, Ekologıa, Ǵylym jáne joǵary bilim vıse-mınıstrlerin jiberý qajet. Aıtpaqshy, sý tasqynyna ushyramaǵan óńirlerde meniń tapsyrmammen «Taza Qazaqstan» naýqany bastaldy. Men ákimderdiń bárine bul birrettik naýqan emes ekenin eskerttim. Basqasha aıtqanda, senbilikke shyǵyp, jumys istegen syńaı tanytyp, kózboıaýshylyq jasaýǵa bolmaıdy. Kórshiles elderdegi sekildi bizge de Qazaqstandy kógaldandyrý, óńirler men qalalardyń aýmaqtaryn tazartý jumystaryn únemi júrgizý kerek, — dedi Qasym-Jomart Toqaev.
Memleket basshysy azamattar úshin turǵyn úılerdi qalpyna keltirý jumystaryna naqty ýaqyt rejıminde monıtorıń júrgizý jóninde tapsyrma berdi.
Sondaı-aq jyl sońyna deıin sý tasqynyna qarsy sharalardy basqarýdyń uzaqmerzimdi strategıasyn anyqtap, tıisti baǵdarlamalyq qujattardy qabyldaý mindetin júktedi.
Jıyn barysynda Premer-Mınıstr Oljas Bektenov, Tótenshe jaǵdaılar mınıstri Shyńǵys Árinov, Ónerkásip jáne qurylys mınıstri Qanat Sharlapaev, Densaýlyq saqtaý mınıstri Aqmaral Álnazarova, Aýyl sharýashylyǵy mınıstri Aıdarbek Saparov, Atyraý oblysynyń ákimi Serik Shápkenov, Aqtóbe oblysynyń ákimi Asqat Shaharov, Batys Qazaqstan oblysynyń ákimi Narıman Tóreǵalıev, Qostanaı oblysynyń ákimi Qumar Aqsaqalov, Soltústik Qazaqstan oblysynyń ákimi Ǵaýez Nurmuhambetov, Shyǵys Qazaqstan oblysynyń ákimi Ermek Kósherbaev, Mańǵystaý oblysynyń ákimi Nurlan Noǵaev baıandama jasady.
