Qazaqstanda 5-shi Dúnıejúzilik kóshpendiler oıyndary qarsańynda 2024 jylǵy 3-7 qyrkúıek aralyǵynda alǵash ret «Uly dala joryǵy» halyqaralyq marafon-báıgesi ótedi. 

Aýqymdy sporttyq sharaǵa 10-nan astam elden komandalar qatysady dep kútilýde. Iran, Túrkıa, Vengrıa, Qyrǵyzstan, Ońtústik Afrıka Respýblıkasy Reseı Federasıasynyń jáne t.b. elderdiń shnabandozdary dúbirli dodada baq synaıtyn bolady.

Atap aıtsaq, Qyrǵyzstan quramasy «Uly dala joryǵyna» qatysatyn eń úzdik attardy irikteý maqsatynda kópkúndik at sporty marafonyn ótkizdi.

Qyrǵyzstan At sporty federasıasynyń vıse-prezıdenti Manas Sultanov «Uly dala joryǵy» marafon-báıgesine shaqyrýdy qabyldaý úlken mártebe ekenin aıtty.

«Qazaqstanda ótetin kópkúndik at jarysyna daıyndyq aıasynda 300 shaqyrymdyq qashyqtyqqa «Kochmondor jýrýshý» irikteý marafony ótti. Barlyq komandalarǵa sáttilik tileımin jáne jeńimpazdardyń kóp bolýyn qalaımyn. Eń tózimdi jáne jyldam sáıgúlikter jeńiske jetip, tuǵyrdan kórinetinine senimdimin», - dedi M.Sultanov.

Marafon-báıge 5 myń jyldan astam buryn adam balasy jylqy malyn  alǵash ret qolǵa úıretken Soltústik Qazaqstan oblysyndaǵy Botaı eldi mekeninde 3 qyrkúıekte bastaý alady.

«Uly dala joryǵyna» Kabardın-Balqar Respýblıkasynyń quramasy da qatysýǵa daıyndalýda. «AMD Kavkaz» at sporty klýbynyń negizin qalaýshy Ahed Mahov qazaqstandyq at jarysyna qatysýǵa shaqyrtý alǵanyn aıtty.

«Marafon-báıgeniń búkil adamzat úshin kıeli meken sanalatyn Botaı qonysynan bastalýy erekshe mańyzdy. Bizdiń komanda ańyzdar men tarıhı jádigerlerge toly Botaı jerine barýǵa erekshe yntaly. Olaı bolsa, kút bizdi, Qazaqstan!», - dep atap ótti A.Mahov.

At jarysy elorda - Astanada 7 qyrkúıekte aıaqtalady. Onyń jeńimpazdary 8 qyrkúıekte ótetin 5-shi Dúnıejúzilik kóshpendiler oıyndarynyń ashylý saltanatyna qatysady.

 «Uly dala joryǵy» – jylqy balasynyń eń myqty tuqymy anyqtalatyn dalalyq laborotorıasy.

Esterińizge sala keteıik, «JORYQ» respýblıkalyq federasıasy Qazaqstan Respýblıkasy Ulttyq sport qaýymdastyǵynyń quramyna kiredi. Sonymen qatar, Qaýymdastyq quramyna báıge, kókpar, aýdaryspaq, asyq atý, sadaq atý, jamby atý, teńge ilý, qusbegilik jáne t.b. federasıalar kiredi. Qazaqstan Respýblıkasynyń Ulttyq sport qaýymdastyǵyna belgili kásipker, mesenat, «Altyn Qyran» qory qamqorshylyq keńesiniń tóraǵasy» Islambek Saljanov basshylyq etedi.