Валюта бағамы
  • USD -

    512.3
  • EUR -

    582
  • RUB -

    6.41
«ҚАЗАҚСТАН» КОРПОРАЦИЯСЫ «KINOMAX» МОБИЛЬДІ ҚОСЫМШАСЫН ІСКЕ ҚОСТЫ
04 сәуір 2019
«ҚАЗАҚСТАН» КОРПОРАЦИЯСЫ «KINOMAX» МОБИЛЬДІ ҚОСЫМШАСЫН ІСКЕ ҚОСТЫ

Бүгін орталық коммуникациялар қызметінде «Қазақстан» телерадиокорпорациясының Digital платформадағы жаңа жобалары мен Димаш Құдайбергеннің  29 маусым күні  Нұр-Сұлтанда өтетін «Arnau»  концертіне арналған баспасөз конференциясы өтті.

Шара барысында «Қазақстан» РТРК» АҚ Басқарма төрағасы Ерлан Қарин «Kinomax» жаңа мобильдік қосымшасының іске қосылуы жайында және «Arnau» концертінің дайындық барысы жөніндегі жаңалықтарды айтып берді. «Қазір цифрландыру дәуірі, сондықтан көрермендердің көбісі әлеуметтік желілерде, түрлі интернет сайттарда өздеріне қызықты да қажетті контентті тауып, тамашалай алады.  Таңдау көп, сондықтан танымал трендтерге сәйкес келетін контент жасаушылар саны күннен-күнге көбейіп келеді, бәсекелестік күшейе түсуде. Осы орайда «Қазақстан» корпорациясы заман талабына сай жұмыс істеуде. «Өткен жылы «Qazaqstan Tv» мобильдік қосымшасын  іске қосқан болатынбыз, сол арқылы телеарналарымыздың жобаларын онлайн режимде көру мүмкіндігі пайда болды. Аздаған уақыттың ішінде қосымшаны жарты миллионнан астам қолданушы жүктеп  алды.  Сондай-ақ әлеуметтік желілердегі жеке аккаунттарымызда жазылушылар саны 1 599 762 адамға жетті. Ал «Qazaqstan Tv» Youtube арнасының жазылушылар саны миллионға жетіп отыр, сондықтан қазіргі сәтте еліміздегі мемлекеттік телеарналардың ішінде ең алдыңғы орында тұр.  Маусым айында «Youtub-тың алтын батырмасын» иеленуіміз әбден мүмкін. Одан басқа,  корпорациямызға қарасты барлық аккаунттар мен домендер Qazaqstan Tv-ге ауыстырылды.  Жастар жылы аясында Youtube арнамызда жастарға арналған ситком дайындап жатырмыз, ол туралы кейінірек білесіздер», - деді Басқарма төрағасы Ерлан Тынымбайұлы.  Сонымен қатар ол корпорацияның жаңадан іске қосылған «Kinomax»  мобильді қосымшасын таныстырды.

 

«KINOMAX»  МОБИЛЬДІ ҚОСЫМШАСЫ БАРШАҒА ҚОЛАЙЛЫ

 

«Бүгін Сіздердің назарларыңызға ұсынып отырған  «Kinomax»  мобильді қосымшасы – бұл Andriod және IOS платформаларында тәулігіне 24 сағат бойы қолжетімді видеосервис. Осы қосымша арқылы отандық телехикаялар, көркем және деректі фильмдер, анимациялық фильмдерді онлайн режиммен қатар, оффлайн режимде де көруге болады. Қосымшада «Kinomax-тегі жаңа фильмдер» деген айдарда жаңадан енгізілген кинотуындылар жиналған, «Осы аптада танымал» бөлімінде қолданушылардың арасында танымал, жоғары бағаланған контент, ал «Дәл қазір көруде» - сол сәтте қолданушылардың тамашалап жатқан контентін көре аласыздар. Сонымен қатар, кішкентай бүлдіршіндер үшін «Балапан» режимі қарастырылған. Бұл топтамада «balapan» телеарнасының бағдарламалары, анимациялық фильмдер ұсынылған. Бұл видеосервис отандық контентті дамытумен қатар, аудитория сұранысына  сай  сапалы жобаларды ұсыну мақсатында іске асырылды. Осы арқылы біз көрермендеріміздің талғамын ескеріп, бәсекеге қабілетті және түрлі жанрлардағы контентті ұсынуды көздейміз»,-деді Ерлан Қарин.

ДИМАШТЫҢ КОНЦЕРТІНЕ КӨПТЕГЕН ЕЛДЕРДЕН КӨРЕРМЕН КЕЛЕДІ

Бұдан соң тақырып Димаш Құдайбергеннің концертіне дайындық барысы жайына ойысты. Тума таланттың концертіне келетіндердің қарасы күн санап артып, әлемінің әр түкпірінен билет сатып ала бастапты. «Концертке билет сатып алушылардың ең көбі қазақстандықтар, одан кейін Ресей, АҚШ, Қытай, Ұлыбритания, Франция, Германия, Жапония, Түркия, Нидерланды, Румыния, Польша және т.б. Ең алыс елдердің арасында Бразилия, Мексика, Африка, Канада, Австралия. Билеттер сатылымға шыққан алғашқы күні  6926 билет (30%) сатылған. Бір аптадан кейін билеттер сатылымы 11099-ға (48,2%) жеткен. Бүгінде сатылым 66%-ды құрады, яғни, 15156 билет сатылды. Димаштың концертіне келем деушілердің саны өте көп, үлкен аншлагпен өтеді. Димаштың дауысы – бұл адамдардың жүрегін жаулап алатын,  ерекше импульс, былай айтқанда  «Kinetic Voice» (от греч. Kinetikos – қимылға әкелетін әрекет). Бұл - Димаштың концертінің басты концепциясы. Шоу  кинетикалық стильде құрылған, оның образына дейін имиджмейкерлермен кеңінен ойластырылған. Әр номер – ортақ идеяны жеткізетін жеке оқиға, мини-спектакль деуге болады. Қазіргі сәтте барлық техникалық жағдайлар, мультимедиялық шешімдер, сахнаның әрленуі, дыбыс пен жарық мәселесі шешілді. Енді декорация мен реквизит қарастырылып жатыр. Концерттін теленұсқасын сапалы түсіру жұмыстары да ойластырылуда, алдағы 3 айға жоспар құрылған.  Шығармашылық топпен музыкалық материалдар, қойылым жұмыстары мен графикалық шешімдер толық іске асырылып жатыр.  Концертке қатысатын түрлі жанрдағы бишілер тобына арнайы кастинг жүргізілді. Кастинг қорытындысы бойынша халықаралық алаңдарда өнер көрсеткен еліміздің ең мықты бишілері қатысатын болды». Тағы да бір жаңалық, 1 мамыр күні Ұлттық арна эфирінен Димаштың Наурызда Мәскеудегі Кремль сарайында өткен концерті көрсетіледі. Сондай-ақ, корпорация Димаш туралы деректі фильмнің түсірілімін бастап кетті. Бұл туындыда Димаштың өмірі, шығармашылығы жайлы баяндалады.  
 

 

RELATED NEWS
«Үздік болу үшін көп жұмыс істеу керек» - Димаш Euronews-ке сұхбат берді
18 қыркүйек 2024
«Үздік болу үшін көп жұмыс істеу керек» - Димаш Euronews-ке сұхбат берді

 Euronews-ке эксклюзивті сұхбат берген Димаш Құдайберген классикалық музыка, қазақтың халық күйі мен заманауи әуен астасып жатқан бірегей шығармашылығы жайлы айтып берді. Kazinform аталған сұхбаттың бейресми аудармасын жариялады.

Қазақ музыканты Димаш Құдайберген жай ғана әнші, ән авторы әрі мультиинструменталист қана емес, ол миссиясы бар адам. Ол жанрда баламасы жоқ виртуоз вокалымен және музыкасымен әлемдік аудиторияға Қазақстанның бай мәдениеті мен салт-дәстүрін жеткізуге ниетті. Әлемдік турнеден кейін Отанына оралған Димаш Астанада V Дүниежүзілік көшпенділер ойының жабылуын екі күндік концертімен айшықтай түсті.

Димаш Euronews-ке берген эксклюзивті сұхбатында мансап жолына, музыка стилінің дамуына және ойынның (Дүниежүзілік көшпенділер ойыны) Қазақстан мұрасын паш етуде бірегей алаң болғанына қатысты ойымен бөлісті.

– Сіз классикалық білім алдыңыз әрі «Астана-Операдан» орын да ұсынылды. Бірақ классикалық элементтерді дәстүрлі қазақ және поп-музыкамен үйлестіре отырып, заманауи музыкант мансабын таңдадыңыз. Осынау бірегей қоспаны қалай жасай алдыңыз?

– Астанадағы опера директоры мені өздерімен бірге жұмыс істеуге шақырғаны есімде. Бірақ барынша әртүрлі музыкалық жанрда өнер көрсеткенді қалайтынымды білетінмін. Енді мен опера айтқым келсе, оны концерттерімде де айта аламын. Менде сондай еркіндік бар. Мен «Астана-Операға» үлкен құрметпен қараймын. Бірнеше ай бұрын ғана ұстазым Пласидо Доминго мені Еуропада өзімен бірге өнер көрсетуге шақырған кезде арманым орындалды. Ол маған: «бұл арияға дайындалу үшін екі күнің ғана бар», - деді. Мен бас тарта алмадым.

5 жасымда, үйімізде Пласидо Доминго мен Паваротти өнері таспаланған видеокассета болатын. Сол концерттер менің әнші болуға деген құштарлығымды оятты. Домингоға оның арқасында әнші болғанымды айттым. Оған ұқсағым келді. Вокальдық тұрғыда олар мықты.

– Ата-анаңыз 5 жасыңызда керемет дауысыңыз бар екенін түсінді. Ал өзіңіз кәсіби әнші болғыңыз келетіндігін қай уақытта түсіндіңіз?

– Бес жасымда әжем аяғының ауыратына қарамастан мені күн сайын музыка мектебіне апаратын. Жетістікке жетіп, танымал болып, ақша таба бастасам да мұның бәрі отбасымның – ата-анамның, ата-әжемнің және достарымның арқасында екенін есімнен шығармаймын. Олардың қолдауынан асқан дүние жоқ. Менің жетістігіме өзімнен гөрі әжем лайық.

– Қазақстан өмірінде мәдениет пен музыка неліктен соншалықты маңызды?

– Дәстүрлі музыкамызға жете үңілген, зер салған адамдар біздің бүкіл тарихымызды танып-біле алады. Атам төрт-бес жасымда ұлттық аспабымыз – домбыраны шертуді үйретті. Егер сіз өзіңізді нағыз қазақпен деп есептесеңіз, онда алдымен домбыра шертуді үйренуіңіз керек. Қазір әлемді біздің мәдениетімізбен таныстыратын уақыт келді. Қазақстан – жас ел, егемендігіне небәрі – 33 жыл. Бұл – мұрамызды әлемдік аудиториямен бөлісудің бірегей уақыты.

– Әндеріңізді қалай сипаттар едіңіз?

– Бұрынырақ оны неоклассикалық деп атайтынмын, бірақ қазір мен барлық жанрды біріктіруге тырысамын. Әлі де болса неоклассикалық әншімін. Алайда, басқа стильдерді зерттегенді ұнатамын — поп, рок, кейде тіпті рэп. Бұл мен үшін аса маңызды емес. Мен бәрін сынап көргім келеді.

– Сіз қазақ мұрасын әрдайым мақтан тұтасыз әрі еліңізді музыкалық бейнебаяндарыңызда декорация ретінде жиі қолданасыз. Бұл сіз үшін неліктен маңызды?

– Қазақ болып туғаныма мақтанамын. Менің миссиям – әлемді еліміздің мәдениетімен, әнімен, дәстүрлі музыкасымен таныстыру. Бүкіл әлемде, Нью-Йоркте, Еуропа мен Азияда 20-30 мың адам аудиторияның алдында өнер көрсеттім және бұл менің нағыз тыңдармандарымның арқасында ғана мүмкін болды.

– Сіз Дүниежүзілік көшпенділер ойындарында жеке шығармашылық кешіңізді өткіздіңіз. Бұл оқиға неліктен соншалықты маңызды?

– Осыдан 6 ай бұрын Үкімет Дүниежүзілік көшпенділер ойындарының ашылу салтанатында өнер көрсетуге шақырды. Бірден келістім. Өйткені бұл ойынның еліміз бен мәдениетіміз үшін қаншалықты маңызды екенін жақсы білемін. Бұл – біздің салт-дәстүрімізді ғана емес, сонымен қатар спорттағы, ат спорты ойындарындағы таланттарымызды көрсетудің тамаша мүмкіндігі. Аздап қобалжу болса да жеке концертімнің өткеніне өте қуаныштымын. Басқа елде өнер көрсету оңайырақ, бірақ Қазақстанда кеш өткізген бір бөлек. Емтихан тапсырғанмен тең.  Өйткені елімізде өткен концертте менің вокалдан сабақ берген ұстаздарым мен білікті музыка майталмандары қатысады. 

– Егер сіз өткен шаққа оралар болсаңыз, 5 жастағы Димашқа қандай ақыл-кеңес берер едіңіз? 

– Көбірек жаттығу керек. Мен 25 жыл білім алдым, қазір 30 жасымда да PhD дәрежесін алу үшін оқуымды жалғастырып жатырмын. Егер спортта чемпион болғыңыз келсе, онда тынбай жаттығуыңыз қажет. Музыкада да солай – үздік болу үшін көп жұмыс істеу, еңбектену, жаттығу керек. 

НҰРҒИСА ТІЛЕНДИЕВ: ҰЛТ РУХЫНЫҢ МҰЗБАЛАҒЫ
01 сәуір 2025
НҰРҒИСА ТІЛЕНДИЕВ: ҰЛТ РУХЫНЫҢ МҰЗБАЛАҒЫ

Биыл қазақ музыкасының жарық жұлдызы, ұлы композитор, дирижер, домбырашы Нұрғиса Тілендиевтің туғанына 100 жыл толды. Бұл мерейтой – қазақ мәдениеті үшін айрықша маңызға ие оқиға. Қазақ музыкасының абызы, композитор, дирижер, домбырашы Нұрғиса Тілендиевтің қазақ руханиятына қосқан сүбелі үлесі зор.

Өмір жолы мен шығармашылық бастауы
Нұрғиса Атабайұлы Тілендиев 1925 жылы 1 сәуірде Алматы облысы, Іле ауданы, Шилікемер ауылында дүниеге келген. Домбыра тартуды әкесінен үйренген ол, кейіннен Ахмет Жұбановтың назарына ілігіп, музыка әлеміне қадам басты. Ахмет Жұбанов жас Нұрғисаны музыка мектебінде, кейіннен консерваторияда білім алуға бағыттады.

Соғыс жылдары
Жас Нұрғиса 1943 жылы өз еркімен майданға аттанып, Курск шайқасынан Берлинге дейінгі ұрыстарға қатысқан. Соғыстағы ерлігі үшін "Ерлігі үшін", "Берлинді алғаны үшін" және "Ұлы Отан соғысындағы жеңісі үшін" медальдарымен марапатталған.

Музыкалық мұра

Нұрғиса Тілендиевтің шығармашылығы қазақ музыкасының алтын қорына енген. Ол 500-ден астам музыкалық туындының авторы, олардың ішінде:

«Аққу» күйі – нәзіктік пен тазалықтың символы;
«Көш керуені» – халықтың көшпелі өмірін бейнелейтін шығарма;
«Саржайлау» – туған жерге деген сағынышты жеткізетін ән.
Сонымен қатар, композитор «Қыз Жібек», «Менің атым Қожа» фильмдеріне музыка жазып, қазақ киносының дамуына үлес қосты.

«Отырар сазы» оркестрі 

1981 жылы Нұрғиса Тілендиевтің бастамасымен құрылған "Отырар сазы" фольклорлық-этнографиялық оркестрі қазақтың ұлттық аспаптарын насихаттауда үлкен рөл атқарды. Оркестрдің репертуарында халық күйлерімен қатар, композитордың өз шығармалары да орындалды.

Жеке өмірі 

Нұрғиса Тілендиевтің жары Дариға Тілендікелінімен бірге өмір сүріп, отбасылық өмірінде де өнегелі тұлға болған. Олардың махаббаты мен сыйластығы көптеген шығармаларына шабыт берген.

Мұрасы және еске алу

Нұрғиса Тілендиевтің есімі қазақ музыкасының символына айналды. Оның құрметіне Алматы қаласында мемориалды музей ашылып, шығармашылық мұрасы ұрпақтан-ұрпаққа жалғасуда.

Дженнифер Лопес Астанаға концерт беруге келеді
08 сәуір 2025
Дженнифер Лопес Астанаға концерт беруге келеді

Америкалық супержұлдыз Дженнифер Лопес өзінің Up All Night әлемдік турнесі аясында осы жазда Қазақстанның астанасында өнер көрсетеді. Бұл туралы турдың ресми парақшасында жарияланды, деп хабарлайды Ulys.

Әлемдік жұлдыз Қазақстанда алғаш рет концерт береді, ол 1 тамызда елордалық «Астана Арена» спорт кешенінің сахнасында өтеді.

"Осы жазда бірнеше таңдаулы шоуда өнер көрсетемін. Сахнаға қайта оралып, бәріңізбен жүздесуді асыға күтемін. Тым көп уақыт өтті. Бұл керемет жаз болады", - деп жазды әнші 7 сәуірде.

Біз туралы
ulys.kz — ақпараттық, сараптамалық және танымдық бағыттағы материалдарды береді.
 
Мультимедиялық жоба заман талабына сай жасалған. Қазақстанның ақпараттық нарығын сапалы
контентпен қамтамасыз етуге үлес қосуға бағытталған. Мұндағы сараптамалық, танымдық
мақалалар сан саланы қамтиды. Геостратегия, геоэкономика, геосаясат, халықаралық
қатынастар мен елдің ішкі-сыртқы саясаты, экономика, жаһанда болып жатқан тектоникалық
өзгерістер мен тренд тақырыптар ұлттық мүдде тұрғысынан терең талданып қазақ
оқырмандарына жеткізіледі. Орталық Азия мен Түркі әлеміне ерекше көңіл бөлінеді.