Қазақстанда 2025 жылы запастағы 915 офицер әскери қызметке шақырылады. ҚР Үкіметінің тиісті қаулысына премьер-министр Олжас Бектенов қол қойды, деп хабарлайды Ulys.

Құжаттың мәтіні Қазақстан Республикасы нормативтік құқықтық актілерінің эталондық бақылау банкінің порталында жарияланды.

«Әскери қызмет және әскери қызметшілердің мәртебесі туралы» Қазақстан Республикасы Заңының 32-бабына сәйкес Қазақстан Республикасының Үкіметі қаулы етеді:

1. Осы қаулыға қосымшаға сәйкес санда офицер құрамының лауазымдарында әскери қызмет өткеру үшін әскери қызметке жарамды және оны өткермеген запастағы офицерлер заңнамада белгіленген тәртіппен 2025 жылы жиырма төрт ай мерзімге әскери қызметке шақырылсын.
2. Осы қаулы алғашқы ресми жарияланған күнінен кейін күнтізбелік он күн өткен соң қолданысқа енгізіледі», - делінген қаулы мәтінінде.

Оған сәйкес, 2025 жылы әскери қызметке шақырылуға жататын запастағы офицерлердің саны жарияланды: 

• ҚР Қарулы Күштеріне – 700 запастағы офицер,
• ҚР Ұлттық қауіпсіздік комитетінің Шекара қызметіне – 80,
• ҚР Ішкі істер министрлігінің Ұлттық ұланына – 131,
• ҚР Төтенше жағдайлар министрлігіне – 4.

Қаулы алғашқы ресми жарияланған күнінен кейін күнтізбелік 10 күн өткен соң қолданысқа енгізіледі.

Былтыр Алматыда «Ақкент» дейтін тұрғын үйден өрт шығып, үрей бой алдырған халық балаларын биіктен жердегі төсенішке лақтырған болатын. Ел ішінде осы оқиғадан кейін өрт сөндірушілердің қаланың биік ғимараттарындағы өртті сөндіруге қауқарсыз екені туралы сын көп айтылды.

Ал министрлік өрт сөндіру қызметінің материалдық-техникалық базасында автобаспалдақтар бар екенін айтты. 
Дегенмен министрлік сол сыннан қорытынды шығарып, заманауи технологияның жетістіктерін өрт сөндіру қызметіне де кіріктіріп жатыр деуге болады. Министрлік ондаған қабаттық биік ғимараттардағы өртті сөндіру үшін әуелі 2 дрон сатып алмақшы. Пилоттық жоба өзін ақтап жатса, Астанадан бөлек Алматы және өзге де  биік ғимараты көп қалаларға осы тәжірибе таратылмақ.

Бұл дрондар Қытайдың технологиясымен жасалғанымен, Қазақстанда құрастырылады. Яғни, тапсырысты отандық компания алады. Біреуінің бағасы 120 млн теңгеден аспайды.
Министрлік мамандары дрон өздігімен су алып ұшпайтынын, өрт сөндіру көлігінің су шашатын шлангасын көтеріп ұшатынын айтады. Яғни, бұл дрондар өздігінен су тасымайды. Өрт сөндіру көлігін толықтыратын қосымша қызмет атқарады.

Жалып ТЖМ биыл бюджет есебінен 728 арнайы техника мен 18 мыңнан астам құрал-жабдық сатып алмақшы.

Көпқабатты үйлердегі өрттер, лифттерден шыққан ақаудың қайғылы салдары, тұтас бір тұрғын үйлердің салынып бітпей жатып қирап қалуы, қолданысқа берілген үйлердің қабырғасынан сетінеп сөгілуі. Кейінгі кезде құрылыс саласында осындай кемшіліктер көбейіп кетті. Әрине, мұның бәрі ең әуелі құрылыс компаниялары мен солардың жұмысын қадағалаушы органдардың салғырттығынан болатыны түсінікті. Бірақ кейде қауіпсіздікке жауапты қызметтердің қолын заңның томпақ нормалары байлайтын сәттері болады.

Төтенше жағдайлар министрлігіндегі 2016 жылы биік ғимараттарды қолданысқа беру өкілетін ведомстводан алып қою шарасын осындай томпақ норманың бірі деп есептейді.  Ведомство басшысы Шыңғыс Әрінов министрлікке осы өкілетті қайтаруға күш салып жүр.

«Көп қабатты үйлер мен халық көп шоғырланатын нысандарды қолданысқа қабылдау өкілеттіктерін министрлікке беру мәселесін шешіп жатырмыз. Қазір Мәжілісте заң жобасы қаралып жатыр. Жыл аяғына дейін біз ұсынған түзету бекітіледі деп үміттеніп отырмыз», - дейді ол.

Министр айтып отырған өкілетті заң ТЖМ-нен 2016 жылы «алып қойғанын» жоғарыда айттық. Ал 2011 жылға дейін тұрғын үй құрылысының жобалары да осы министрліктің мақұлдауынсыз қабылданбайтын.