تۇركىستان وبلىسىنىڭ شاردارا اۋداندىق ءبىلىم بولىمىندە بيۋدجەت قاراجاتىنىڭ شامامەن 3،7 ميلليارد تەڭگەسى جىمقىرىلدى دەگەن ايىپپەن 15 ادام سوتتالدى. ولاردىڭ ءبىرى امنيستياعا ءىلىنىپ بوساتىلدى، سەگىزى سوت زالىنان قاماۋعا الىندى. بۇل تۋرالى Otyrar.kz حابارلايدى.
تۇركىستان وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ءبىلىم ءبولىمى باسشىسى اقشاگۇل بەردىالييەۆانى جانە ونىڭ قاراماعىنداعى قىزمەتكەرلەرىن كىنالى دەپ تاپتى. ۇكىمدى تىڭداۋعا ونداعان ادام كەلدى.
باستى ايىپتالۋشى – بەردىالييەۆا. سوت وعان 10 جىل باس بوستاندىعىنان ايىرۋ جازاسىن تاعايىندادى. سەگىز بۋحگالتەر جەتى جىلعا سوتتالدى.
«شاردارا اۋدانىنىڭ ءبىلىم ءبولىمى باسشىسىنا 10 جىل باس بوستاندىعىنان ايىرۋ جازاسى تاعايىندالدى. بۋحگالتەرلەرگە – 7 جىلدان»، - دەدى سۋديا داۋرەن مادالييەۆ.
ءبولىم باسشىسىنىڭ مىندەتىن ۋاقىتشا اتقارعان ءۇش ادام قىزمەتكە سالعىرت قاراعانى ءۇشىن كىنالى دەپ تانىلدى. ءتورت ايىپتالۋشى امنيستياعا ءىلىندى: ولاردىڭ ءبىرى كەلتىرىلگەن شىعىندى تولىق وتەگەن، ال ۇشەۋى زەينەت جاسىنا جەتكەن. كامەلەتكە تولماعان بالالارى بار ەكى ايەلگە جازاسىن بەس جىلدان كەيىن وتەۋ قۇقىعى بەرىلدى. ال ايىپتالۋشىلاردىڭ ءبىرى تەرگەۋ بارىسىندا قايتىس بولدى، الايدا سوت ونىڭ دا كىناسىن انىقتادى.
«قىلمىستىق جولمەن الىنعان مۇلىك مەملەكەت كىرىسىنە ءوتتى. ولاردىڭ قاتارىندا 20-عا جۋىق جىلجىمالى جانە جىلجىمايتىن مۇلىك، سونداي-اق ساۋدا ورتالىعىنداعى زەرگەرلىك ءبولىم بار»، - دەدى سۋديا.
سوت زالىندا ايىپتالۋشىلاردىڭ رەاكسياسى ايقىن بايقالدى: كوبىسى كوز جاسىن تىيا المادى.
سوت دەرەگىنشە، شىعىندى تەك كەيبىر ايىپتالۋشىلار عانا ءىشىنارا وتەگەن. ءاربىرىنىڭ يەمدەنگەن قاراجاتى 22-دەن 200 ميلليون تەڭگەگە دەيىنگى سومانى قۇراعان. جابىرلەنۋشى تاراپ وتەمدى ازاماتتىق تالاپ ارقىلى قايتارۋدى كوزدەپ وتىر.
«مەن سوت شەشىمىمەن كەلىسپەيمىن. ول ەشتەڭە العان جوق. ءبىز اپەللياسياعا بەرەمىز»، - دەدى ايىپتالۋشىنىڭ كۇيەۋى قۇدايبەرگەن ماحانوۆ.
تەرگەۋ شامامەن ءبىر جىلعا سوزىلدى. ءىس ماتەريالدارى 730 تومنان تۇردى. جالپى، وبلىستىڭ سەگىز اۋدانىندا ءبىلىم بولىمدەرى قىزمەتكەرلەرىنىڭ شامامەن 12 ميلليارد تەڭگە بيۋدجەت قاراجاتىن جىمقىرعانى بويىنشا كۇدىك بار.
