حالىقارالىق تۇپ-كەگەن تاس جولىنىڭ قۇرىلىسى اياقتالىپ، پايدالانۋعا بەرىلۋ الدىندا تۇر.  بۇل تۋرالى تەلەارنالاردىڭ بىرىنە بەرگەن سۇحباتىندا قۇرىلىس ينجەنەرى سۇلتان سارىباعىشيەۆ ايتتى. ونىڭ ايتۋىنشا، تاس جول ىستىقكول وبلىسىنىڭ سولتۇستىك-شىعىسىندا، قارقىرا جايلاۋىنا اپارادى.
بۇل جول حالىقارالىق باعىتتاردى جاقسارتۋعا، ءتۋريزمدى دامىتۋعا جاقسى مۇمكىندىك بەرەدى.
" جولدىڭ جالپى ۇزىندىعى 37 شاقىرىمدى قۇرايدى. جوبادا تاس جولدان بولەك اۋىل ىشىندەگى جولداردى جوندەۋ جانە سارى-جازعا دەيىن 13 شاقىرىمدىق جول سالۋ دا قاراستىرىلعان".
بۇگىنگى كۇنى جول بەلگىلەرى سىزىلىپ، جارىقتاندىرۋ ورناتىلىپ، تاپسىرۋعا تولىق دايىن»، - دەدى ول.

قىرعىزستاندا بيلىكتى باسىپ الۋ ماقساتىندا جاپپاي تارتىپسىزدىك ۇيىمداستىرماق بولعان 7 ادام قاماۋعا الىندى. بۇل تۋرالى قىرعىز ءىىم حابارلادى.

مالىمەتتەرگە قاراعاندا، بۇل ۇيىمداسقان توپ جاپپاي تارتىپسىزدىكتەر ۇيىمداستىرىپ، بيلىكتى كۇشپەن باسىپ الۋ ماقساتىندا قۇرىلعان. 

«ۇلتتىق سپورت ويىندارىن وتكىزەمىز دەگەن سىلتاۋمەن كۇدىكتىلەر 2024 جىلعى 17 قاراشادا وتەتىن جەرگىلىكتى كەڭەس سايلاۋى كۇنى كۇش كورسەتۋگە ۇندەپ، كونستيتۋسياعا قايشى شاقىرۋلاردى ناسيحاتتاپ، كەيىننەن بيلىكتى كۇشپەن باسىپ الۋ ارقىلى جاعدايدى تۇراقسىزداندىرۋدى كوزدەگەن، – دەلىنگەن حابارلامادا.

وسى ءىس بويىنشا جاپپاي تارتىپسىزدىكتەر ۇيىمداستىرۋعا دايىندالۋ فاكتىسى بويىنشا قىلمىستىق ءىس قوزعالعان.

تەرگەۋ بارىسىندا بۇل توپتىڭ 7 مۇشەسى ۇستالدى. ولاردىڭ اراسىندا شەتەلدىك ازاماتتار دا بار.