بيىل قازاقستاننىڭ باسىم وڭىرلەرىندە بولعان كوكتەمگى سۋ تاسقىنى قازاقستاندىقتارعا اۋىر ءتيدى. ەلدىڭ سولتۇستىگى مەن باتىس ايماقتارى قاتتى زارداپ شەكتى، مىڭداعان ۇيلەر قيراپ، مال باسى قىرىلىپ، جۇزدەگەن مىڭ ادامدار باس ساۋعالاپ، ءقاۋىپسىز جەرگە ۋاقىتشا كوشۋگە ءماجبۇر بولدى. ول تۋرالى تالاي ايتىلدى، جازىلدى. ەل بولىپ قيىن كۇندەردە بىر-بىرىمىزگە قولداۋ كورسەتىپ، ايتىپ كەلمەيتىن تابيعات اپاتىن ەڭسەردىك.
سۋ تاسقىنى كەزىندە قازاقستاندىقتار ءبىر جاعادان باس، ءبىر جەڭنەن قول شىعارىپ، ءوزىنىڭ بىرلىكتى ەل ەكەنىن كورسەتتى. ەڭبەكتەگەن بالادان، ەڭكەيگەنگەن قارياعا دەيىن اپاتپەن كۇرەستى. مىسال رەتىندە ايتساق، اتىراۋ وبلىسى ماحامبەت اۋدانى، بەيبارىس اۋىلىنىڭ 92 جاستاعى تۇرعىنى ورىنشا قوجييەۆا جاعانى بەكىتۋگە كەلدى. 90-نان اسقان قاريانىڭ «ەرلىگى» كوپشىلىككە ۇلگى بولدى. ورىنشا اپا تاسقىن ءقاۋپى تونگەندە قول قۋسىرىپ وتىرا الماعان.
«مەن ءبىراز جاسقا كەلىپ قالدىم. سوندىقتان، مەنىڭ قولىمنان كەلەتىنى قۇم تولتىرۋعا قاپشىقتاردى جەدەل دايىنداپ وتىرۋ. تابيعاتتىڭ توسىن مىنەزىن بولجاپ ءبىلۋ مۇمكىن ەمەس، وسى جاسىما دەيىن مۇندايدىڭ تالايىن كوردىك قوي. سوندىقتان، سۋ تاسقىنىنا الدىن - الا دايىندالۋ كەرەك»،-دەگەن ەدى كەيۋانا.
قيىن ساتتە كومەككە كەلگەندەردىڭ اراسىندا ەرەسەكتەردەن بولەك مەكتەپ وقۋشىلارى دا ءوز ۇلەستەرىن قوستى. وقۋشىلار ساباقتان كەيىن، جايىق وزەنىن بەكىتۋگە قولۇشىن سوزدى.
كەنتاۋ قالاسىندا تۇراتىن گاۋھار شايمەردەن ءوزى جيناپ جۇرگەن قارجىسىن قۇلسارى قالاسىنىڭ تۇرعىندارىنا اۋداردى. ونىڭ قايىرىمدى ءىسى كوپشىلىكتىڭ جۇرەگىنە ىزگىلىك سىيلادى. الەمدە قايىرىمدىلىق، ىزگىلىك ورناعان كەزدە كەز- كەلگەن قيىنشىلىقتى جەڭۋگە بولاتىنىن پاش ەتتى.
50 مىڭنان اسا ەرىكتىلەر، مىڭداعان بەلسەندىلەر، قۇتقارۋشىلار، مەملەكەتتىك قىزمەتكەرلەر، بيلىك وكىلدەرى كۇن-تۇن دەمەي جۇمىس جاساپ، زارداپ شەككەن حالىققا قولدان كەلگەنشە كومەك قولىن سوزدى. اسىرەسە اتىراۋ قالاسىن الاپات تاسقىن قاۋپىنەن كۇرەس ەرەكشە ەستە قالدى. حالىقتىڭ كوپشىلىگى كۇنى-تۇنى جاعانى بەكىتتى. ەكى-ۇش اپتانىڭ ىشىندە اتىراۋ قالاسى اۋماعىنان 200 شاقىرىمنان اساتىن بوگەت سالىندى.
بۇدان بولەك قازاقستاننىڭ باسقا جاعىندا تۇراتىن تۇرعىندار زارداپ شەككەن ايماقتارعا كەزەڭ-كەزەڭمەن كومەكتەر جونەلتتى. كوپتەگەن ەرىكتى ۇيىمدار مەن بەلسەندى ازاماتتار، قوعامدىق بىرلەستىكتەر وسىنداي يگى ىستەردىڭ باسى-قاسىندا بولىپ، قيىن-قىستاۋ كەزەڭدە تاعى دا ۇيىمشىلدىق، بىرلىگىنىڭ مىعىم ەكەنىن تانىتتى. تەك قازاقستان حالقى اسسامبلەياسى سۋ تاسقىنىنان زارداپ شەككەن ازاماتتارعا كومەك بەرۋ ءۇشىن، ارنايى رەسپۋبليكالىق شتاب قۇرىپ، ودان ءارى قاراي وڭىرلەردە شتابتاردى قۇرىپ گۋمانيتارلىق كومەك بەرۋ بويىنشا جۇمىستاردى ۇيلەستىردى. اسسامبلەيا مۇشەلەرى سۋدان زارداپ شەككەن وبلىستارعا «جۇرەكتەن جۇرەككە» اكسياسى اياسىندا 227 توننا گۋمانيتارلىق كومەك جىبەرىپ، 277 ميلليون تەڭگە جيناپ، قارجىلاي كومەك كورسەتتى. سونىمەن قاتار وڭىرلەردە 10 مىڭعا جۋىق ەرىكتىلەر زارداپ شەككەن ازاماتتارعا، قۇتقارۋشىلارعا، اسكەري قىزمەتكەرلەرگە، قۇرىلىسشىلارعا ءوز كومەكتەرىن بەرگەن.
مۇنداي مىسالدار جۇزدەپ سانالادى. بارلىعىنىڭ ماقساتى ءبىر بولدى، ەل مەن جەردى تاسقىن سۋدان امان الىپ قالۋ ەدى. ماقساتقا حالىق بولىپ جەتىپ، اپاتتىڭ زاردابىمەن ءبۇتىن ەل بولىپ كۇرەسە الدىق
كەيىن جاعداي رەتتەلىپ، ەتەك-جەڭدى جيناعاننان كەيىن پرەزيدەنت اقوردادا سۋ تاسقىنىمەن كۇرەسكە بەلسەنە اتسالىسقان ازاماتتاردى سالتاناتتى تۇردە ماراپاتتادى.
«سىن ساعاتتا ەلىمىز ىرىستى ىنتىماعىن تانىتتى. ءبىز تابيعي اپات كەزىندە جۇرت بولىپ جۇمىلدىق. ءبىرتۇتاس ەل ەكەنىمىزدى كورسەتتىك. قۇتقارۋشىلار، اسكەريلەر، ىشكى ىستەر ورگاندارى مەن اكىمدىك قىزمەتكەرلەرى تاۋلىك بويى جۇمىس ىستەدى. ولار وتان الدىنداعى پارىزىن ءمىنسىز اتقاردى. ءبىر سوزبەن، انتقا ادال بولدى... الاپات سۋ تاسقىنداپ كەلىپ قالعاندا وتانداستارىمىز تابيعات اپاتىمەن كۇرەسىپ جاتقان قۇتقارۋشىلارعا كومەك قولىن سوزدى. ولار سۋ باسقان ايماقتاردا جاۋاپتى قىزمەت مەكەمەلەرىنە جاردەمدەسىپ، جانقيارلىقپەن ارەكەت ەتتى ءارى باتىلدىق تانىتتى. كوبى ادامدار مەن جانۋارلاردى ءوز كولىكتەرىمەن ءقاۋىپسىز جەرگە الىپ شىقتى. مىڭداعان جاناشىر ازامات تاسقىن سۋدان قورعايتىن بوگەن سالۋعا قاتىستى. ورتاق كۇش-جىگەردىڭ ارقاسىندا ءبىز جاعدايدىڭ ۋشىعىپ كەتۋىنە جول بەرمەدىك»، – دەدى مەملەكەت باسشىسى 19 ماۋسىمدا وتكەن سالتاناتتى جيىندا.
پرەزدەنتتەن العىس حات العاندار كوپ بولدى. ولاردىڭ اراسىندا ۆەتەرينار عابيت مۋسيندە بولدى. عابيت مۋسين سولتۇستىك قازاقستان وبلىسى، قىزىلجار اۋدانىنىڭ ياكورسكيي اۋىلدىق وكرۋگىندە 35 جىلدان بەرى ۆەتەرينارلىق فەلدشەر بولىپ جۇمىس ىستەپ كەلەدى. ول سۋ تاسقىنى كەزىندە جوعارى كاسىبيلىك پەن كورەگەندىك تانىتقان. سۋ تاسقىنى كەزىندە تاۋلىكتەپ جۇمىس ىستەپ، ءوز اۋماعىنداعى مالدىڭ بارلىعىن امان الىپ قالعان. ونىڭ ارقاسىندا ەرەكشە ءقاۋىپتى اۋرۋلاردىڭ پايدا بولۋى مەن تارالۋىنا جول بەرىلمەدى.
«مەن ءوزىم مال اۋىرسا تاعات تاپپايتىن اداممىن. مەنىڭ قاراماعىمدا 4 اۋىلدىڭ مالى بار. ونىڭ بارلىعىنا ۋاقتىلى ەكپە سالىپ، تەكسەرىپ وتىرۋ قاجەت. ۆەتەريناريا سالاسىندا جۇمىس ىستەگەنىمە 30 جىلدان استى. تالاي قيىن كەزەڭدەردى باستان وتكەردىك. سۋ تاسقىنى كەزىندە جاعداي كۇردەلى بولدى. الايدا جۇمىلا اتقارعان جۇمىستار ناتيجەسىن بەرىپ جاتىر. ەڭبەگىمىز دە باعالانىپ جاتىر»، - دەيدى عابيت مۋسين Ulys تىلشىسىنە.
قورىتى ايتقاندا، جوعارىدا پرەزيدەنت ايتىپ كەتكەندەي سىن ساعاتتا ەلىمىز ىرىستى ىنتىماعىن ءتانىتىپ، ءبىرتۇتاس ەل ەكەنىمىزدى كورسەتتىك. ىرىسى ورتايمايتىن، بىرلىگى مىعىم ەل عانا كەز كەلگەن قيىنشىلىققا توتەپ بەرە الادى.
