ۆاليۋتا باعامى
  • USD -

    543.9
  • EUR -

    638.5
  • RUB -

    6.49
شەتەلدە وقىعىسى كەلەتىن قازاقستاندىقتارعا 2 مىڭنان اسا گرانت ءبولىندى
فوتو: gov.kz 17 قاڭتار 2025
شەتەلدە وقىعىسى كەلەتىن قازاقستاندىقتارعا 2 مىڭنان اسا گرانت ءبولىندى

مەملەكەت باسشىسى 2024 جىلعى 2 قىركۇيەكتەگى قازاقستان حالقىنا جولداۋىندا: «ۇكىمەت جوعارى ءبىلىم سالاسىن حالىقارالىق ءبىلىم بەرۋ كەڭىستىگىمەن ىقپالداستىرىپ جاتىر. ءقازىردىڭ وزىندە ەلىمىزدە شەتەلدىڭ بەلگىلى 23 جوعارى وقۋ ورنى جۇمىس جۇرگىزە باستادى. ولارعا مەيلىنشە قولداۋ كورسەتۋ كەرەك. اتاپ ايتقاندا، مامان دايارلاۋعا بەرىلەتىن مەملەكەتتىك تاپسىرىستى بىرتىندەپ كوبەيتكەن ءجون»، – دەپ اتاپ ءوتتى.

34 شەتەلدىك جوعارى وقۋ ورنىمەن سەرىكتەستىك كەلىسىمدەر جاسالدى. بۇگىنگى تاڭدا ەلىمىزدە ۇلىبريتانيا، يتاليا، جۇڭگو، رەسەي، اقش، فرانسيا جانە وڭتۇستىك كورەيانىڭ 23 سەرىكتەس جوعارى وقۋ ورىندارى جۇمىس ىستەيدى. 2025 جىلى تاعى 11 كەلىسىمدى ىسكە اسىرۋ قاجەت.

شەتەلدىك سەرىكتەستىك جوعارى وقۋ ورىندارىندا قازاقستاندىق ستۋدەنتتەرگە ارنالعان 2 090 گرانت وقۋعا مەملەكەت ءبولدى.

بۇگىنگى تاڭدا مىڭداعان ستۋدەنت 34 ماماندىق بويىنشا ءبىلىم الادى، ونىڭ ىشىندە پەداگوگيكالىق، ينجەنەرلىك-تەحنيكالىق جانە جاساندى ينتەللەكت سياقتى نەگىزگى باعىتتار بار. بۇل ماقساتتارعا مەملەكەتتىك ءبىلىم بەرۋ گرانتتارى (بىرلەسكەن ءبىلىم بەرۋ باعدارلامالارى جانە قوس ديپلوم باعدارلامالارى) جانە مەملەكەتتىڭ قولداۋىمەن ولارعا جاعداي جاساۋ ارقىلى ينۆەستورلاردىڭ قاراجاتى بولىنەدى.

شەتەلدىك سەرىكتەس جوو-لاردى ىرىكتەۋ جەكەلەگەن سالالارداعى كادرلىق قاجەتتىلىككە جانە وڭىرلەردىڭ سۇرانىستارىنا نەگىزدەلەدى.

شەتەلدىك جەتەكشى جوعارى وقۋ ورىندارىمەن ىنتىماقتاستىق اتوم ونەركاسىبى، «جاسىل» سۋتەكتى ازىرلەۋ، قازاقستاندا بالاماسى جوق سۋ قاۋىپسىزدىگىن قامتاماسىز ەتۋ سياقتى اسا سۇرانىسقا يە جانە تاپشى ماماندىقتار بويىنشا ماماندار دايارلاۋعا باعىتتالعان.

مەملەكەت باسشىسىنىڭ تاپسىرماسىن ورىنداۋ شەڭبەرىندە ق.جۇبانوۆ اتىنداعى اقتوبە وڭىرلىك ۋنيۆەرسيتەتى بازاسىندا مۇناي ينجەنەرياسى، ەلەكتر ەنەرگەتيكاسى جانە كومپيۋتەرلىك ينجەنەريا باعدارلامالارى بويىنشا بريتاندىق Heriot Watt ۋنيۆەرسيتەتىنىڭ فيليالى اشىلدى.

حيميا جانە حيميالىق تەحنولوگيالار سالاسىندا كادرلار دايارلاۋ ءۇشىن م.دۋلاتي اتىنداعى تاراز وڭىرلىك ۋنيۆەرسيتەتى بازاسىندا د.ي.مەندەلەيەۆ اتىنداعى رەسەي حيميا-تەحنولوگيالىق ۋنيۆەرسيتەتىنىڭ فيليالى اشىلدى.

پەداگوگيكالىق كادرلاردى دايارلاۋ ماقساتىندا وڭتۇستىك قازاقستان پەداگوگيكالىق ۋنيۆەرسيتەتى بازاسىندا گازي ۋنيۆەرسيتەتىنىڭ (تۇركيا) فيليالى جۇمىس ىستەيدى.

بەيجىڭ ءتىل جانە مادەنيەت ۋنيۆەرسيتەتىنىڭ (قحر) فيليالى استانا حالىقارالىق ۋنيۆەرسيتەتى بازاسىندا جۇمىس ىستەيدى.

كۆينس ۋنيۆەرسيتەتىنىڭ فيليالى (يرلانديا) نارحوز ۋنيۆەرسيتەتى بازاسىندا جۇمىس ىستەيدى.

2025 جىلعا دەيىنگى جوعارى ءبىلىم بەرۋدى ينتەرناسيونالداندىرۋ ستراتەگياسى شەڭبەرىندە شەتەلدىك ازاماتتارعا، سونىڭ ىشىندە قازاقستان رەسپۋبليكاسىنىڭ ازاماتتارى بولىپ تابىلمايتىن قازاق دياسپوراسىنىڭ وكىلدەرىنە ارنالعان ستيپەنديالىق باعدارلاما ىسكە قوسىلدى.

2024-2025 وقۋ جىلىندا شەتەلدىك ازاماتتارعا ارنالعان ستيپەنديالىق باعدارلاما بويىنشا قازاقستاننىڭ 37 جوو-دا 550 ءبىلىم الۋشى قابىلداندى (باكالاۆريات - 490، ماگيستراتۋرا - 50، دوكتورانتۋرا - 10). ستيپەنديالىق باعدارلاما تەگىن ءبىلىم الۋدى جانە اي سايىنعى ستيپەنديانى قامتيدى.

 

قازاقستاندا ءبىلىم بەرۋ ءتۋريزمىن دامىتۋ

«بولاشاق» حالىقارالىق ستيپەندياسى 30 جىل بويى جۇزەگە اسىرىلىپ كەلەدى. مەملەكەت باسشىسىنىڭ تاپسىرماسى بويىنشا «بولاشاق» حالىقارالىق ستيپەندياسى تەحنيكالىق، ينجەنەرلىك، مەديسينالىق جانە پەداگوگيكالىق باعىتتارعا قايتا باعىتتالدى.

وسى جىلدار ىشىندە ستيپەنديا 12 727 قازاقستاندىققا الەمنىڭ جەتەكشى جوعارى وقۋ ورىندارىندا ءبىلىم الۋعا مۇمكىندىك بەردى، ونىڭ ىشىندە 55%-ى گۋمانيتارلىق، 36%-ى ينجەنەرلىك-تەحنيكالىق، 7%-ى مەديسينالىق، 2%-ى مادەنيەت جانە ونەر باعىتى بويىنشا ءبىلىم الدى.

تۇلەكتەر الەمنىڭ 30-دان استام ەلىندە 400-دەن استام جەتەكشى شەتەلدىك جوعارى وقۋ ورىندارىندا وقىدى جانە تاعىلىمدامادان ءوتتى.

2024 جىلى باعدارلاما تۇلەكتەرى 213 مىڭ مەديسينالىق وتا جاساپ، 145 مىڭ ءبىلىم الۋشى مەن ستۋدەنتتەردى وقىتىپ، مىڭنان استام عىلىمي ەڭبەكتەرىن جاريالادى.

2024 جىلى جوو كونتينگەنتىندەگى شەتەلدىك ستۋدەنتتەردىڭ ۇلەسى 15%-دى قۇرادى، الەمنىڭ 23 ەلىنەن 97 ۋنيۆەرسيتەتتەرمەن 245 قوس ديپلوم باعدارلاماسى ىسكە اسىرىلدى.

شەتەلدىك ستۋدەنتتەر سانى 93 ەلدەن 31 400 ادامدى قۇرادى، بۇل 2023 جىلعى 82 ەلدەن 26 800 ستۋدەنتكە قاراعاندا 4 600 ادامعا كوپ.

قازاقستاننىڭ جوعارى وقۋ ورىندارىنا وقىتۋشىلىق قىزمەتكە 1600-دەن استام شەتەلدىك ساراپشى تارتىلدى.

2024 جىلعى ءبىلىم بەرۋ باعدارلامالارىنىڭ ناتيجەسىندە QS World University Rankings 2024 الەمنىڭ ۇزدىك ۋنيۆەرسيتەتتەرىنىڭ حالىقارالىق رەيتينگىنە 21 قازاقستاندىق جوو كىردى.

«ۋنيۆەرسيتەت پاندەرىن وقىتۋدىڭ مازمۇنى مەن ءادىسىن ايتارلىقتاي جاڭارتۋ قاجەت. بولاشاق مۇعالىمدەر، دارىگەرلەر، اگرونومدار، زاڭگەرلەر جانە سالالىق ماماندار جاساندى ينتەللەكت بويىنشا بازالىق ءبىلىمدى مىندەتتى تۇردە مەڭگەرۋى كەرەك»، – دەپ اتاپ ءوتتى قاسىم-جومارت توقايەۆ.

مەملەكەت باسشىسىنىڭ تاپسىرماسىن ىسكە اسىرۋ ماقساتىندا ەلىمىزدىڭ عىلىمي ۇيىمدارى مەن جوو-نا حالىقارالىق دەرەكقورلارعا تەگىن قولجەتىمدىلىك قامتاماسىز ەتىلدى.

Google كومپانياسىمەن بىرلەسىپ ەلىمىزدىڭ 15 جوعارى وقۋ ورنىنىڭ 5000 ستۋدەنتىنە ارنالعان جاساندى ينتەللەكت بويىنشا كۋرستار ىسكە قوسىلدى.

Coursera ونلاين ءبىلىم بەرۋ پلاتفورماسى جوباسى اياسىندا قازاقستاندىق ستۋدەنتتەرگە 40 مىڭ ليسەنزيا ءبولىنىپ، 93 جوعارى وقۋ ورنىنان 153 مىڭ سەرتيفيكات بەرىلدى.

كورەيا مەن قىتايدىڭ جەتەكشى جوعارى وقۋ ورىندارىمەن ءبىلىم بەرۋ جانە مامانداردى بىرلەسىپ دايارلاۋ بويىنشا ۋاعدالاستىقتارعا قول جەتكىزىلدى.

 

مەملەكەت باسشىسىنىڭ تاپسىرماسى بويىنشا ءۇش قازاقستاندىق جوو بازاسىندا جاساندى ينتەللەكت مەكتەپتەرى جۇمىس ىستەيدى:

  • قورقىت اتا اتىنداعى قىزىلوردا ۋنيۆەرسيتەتىندە سەۋل ۇلتتىق عىلىم جانە تەحنولوگيالار ۋنيۆەرسيتەتىنىڭ جاساندى ينتەللەكت جانە ينفورماتيكا مەكتەبى اشىلدى.
  • ق.ي.ساتبايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىندە City University of Hong Kong فيليالى اشىلدى.
  • د.سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتىندە لۋ بان شەبەرحاناسىنىڭ بازاسىندا جي بويىنشا حالىقارالىق زەرتتەۋ ورتالىعى جانە كولىكتى باسقارۋدىڭ اقىلدى تەحنولوگيالار ورتالىعى اشىلدى.

 

وتاندىق جوعارى وقۋ ورىندارىندا Google، NVIDIA، Huawei، Coursera جانە باسقا دا حالىقارالىق تەحنولوگيالىق الپاۋىتتارىنىڭ ءتيىستى كۋرستارى ەنگىزىلدى.

Coursera، Google، Nvidia، «Huawei Technologies Kazakhstan» LLP، 01 Edu System، Binance Kazakhstan-مەن مەموراندۋمدارعا قول قويىلدى.

AstanaHub تەحنوپاركى بازاسىندا باعدارلامادا قازاقستاننىڭ 47 جوعارى وقۋ ورنىنان 700 وقىتۋشىنى قامتيتىن جي باعىتتارى بويىنشا جوو وقىتۋشىلارىن وقىتۋعا ارنالعان تولىققاندى كۋرستار ىسكە قوسىلدى.

جاساندى ينتەللەكت (جي) سالاسىندا ۋنيۆەرسيتەتارالىق جي ستاندارتى قابىلداندى، 20 جوو-مەن 20 ءبىلىم بەرۋ باعدارلاماسى ازىرلەندى.

قازاق، اعىلشىن، ورىس تىلدەرىندە 148 ميلليارد توكەن نەگىزىندە KazLLM تىلدىك مودەلدى وقىتۋ اياقتالدى.

مودەل Nazarbayev University، ءال-فارابي اتىنداعى قازاق ۇلتتىق ۋنيۆەرسيتەتى، شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى جانە ت.ب. كومانداسىنىڭ قاتىسۋىمەن ازىرلەندى.

ازىرلەۋگە 117 ساراپشى، ونىڭ ىشىندە 40-تان استام عىلىم كانديداتتارى، PhD جانە زەرتتەۋ ينستيتۋتتارى مەن جوعارى وقۋ ورىندارىنىڭ ماگيسترلەرى تارتىلدى.

مينيسترلىك مەملەكەت باسشىسىنا جاساندى ينتەللەكت، باعدارلامالاۋ جانە ستارتاپ اكسەلەراسياسىن وقيتىن 100 مىڭ ستۋدەنتتى قامتيتىن باسىم ماماندىقتار بويىنشا بارلىق دەڭگەيدەگى ستۋدەنتتەر اراسىندا جي سالاسىنداعى داعدىلاردى جان-جاقتى دامىتۋعا باعىتتالعان AI-Sana جي بويىنشا پيلوتتىق باعدارلامانى ۇسىندى.

RELATED NEWS
«بولاشاق» باعدارلاماسىنىڭ تالاپتارى وزگەردى
21 قاڭتار 2025
«بولاشاق» باعدارلاماسىنىڭ تالاپتارى وزگەردى

«بولاشاق» حالىقارالىق ستيپەندياسىن تاعايىنداۋ ءۇشىن ۇمىتكەرلەردى ىرىكتەۋ جاڭا قاعيدالارى بەكىتىلدى، دەپ حابارلايى عىلىم جانە جوعارى ءبىلىم مينيسترلىگى.

2025 جىلعى 17 قاڭتارداعى قاۋلى العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.

«بولاشاق» حالىقارالىق ستيپەندياسىن تاعايىنداۋ ءۇشىن ۇمىتكەرلەردى ىرىكتەۋدىڭ جاڭا قاعيدالارىندا سۇرىپتاۋ تەتىكتى ەنگىزۋ ارقىلى كونكۋرستىق ىرىكتەۋدى جاڭارتۋ كوزدەلگەن. وسىلايشا، وسى جاڭاشىلدىققا سايكەس قاجەتتى بالل سانىن جيناماعان ۇمىتكەرلەر كەلەسى تۋرعا جىبەرىلمەيدى.

مەملەكەتتىك قىزمەت اپپاراتىن ودان ءارى جاقسارتۋ ماقساتىندا «مەملەكەتتىك قىزمەتشىلەر» كاتەگورياسى ەنگىزىلدى. بۇل كاتەگوريا بويىنشا مەملەكەتتىك قىزمەتكەرلەرگە «ماگيستراتۋرا» باعدارلاماسىنا قاتىسۋ ءۇشىن ءتىل كۋرستارىنان ءوتۋ مۇمكىندىگى ۇسىنىلادى.

سونداي-اق باعدارلاما تۇلەكتەرى ەڭبەك ءوتىلىمىن قازاقستان رەسپۋبليكاسى مۇشە حالىقارالىق ۇيىمداردا، مىسالى، بۇۇ، يۋنەسكو، شىۇ جانە تمۇ سياقتى ۇيىمداردا وتەۋ مۇمكىندىگى قاراستىرىلعان.

كونكۋرستىق ىرىكتەۋ ءۇشىن قاجەتتى قۇجاتتار تىزبەسىنە ۋاجدەمەلىك حات ەنگىزىلدى. بۇدان باسقا، كونكۋرستىق ىرىكتەۋدەن وتە الماعان ۇمىتكەرلەرگە سول كۇنتىزبەلىك جىلى كونكۋرسقا قايتا قاتىسۋ قۇقىعى بەرىلەدى.

جالپى بۇل وزگەرىستەر «بولاشاق» حالىقارالىق ستيپەندياسىن جەتىلدىرىپ، ەلىمىزدىڭ ءارتۇرلى سالالارىندا بىلىكتى ماماندار دايارلاۋعا باعىتتالعان.

كاليفورنيا مەملەكەتتىك ۋنيۆەرسيتەتىنىڭ پروفەسسورى، دوكتور تاناي ۇلى ەرتاي
07 قاراشا 2019
كاليفورنيا مەملەكەتتىك ۋنيۆەرسيتەتىنىڭ پروفەسسورى، دوكتور تاناي ۇلى ەرتاي

 

اقش-قا قالاي باردىڭىز؟

2003-2005 جىلدارى ۇلانباتىر قالاسىندا موڭعوليا ۇلتتىق ۋنيۆەرسيتەتىندە قارجى مامانى بويىنشا وقىپ، ءۇندىستان ۇكىمەتىنىڭ گرانتى بويىنشا 2005 جىلى جازدا پۋنە قالاسىنا اتتاندىم. 2005-2008 جىلعى وقۋ جىلدارىندا ءۇندىستاننىڭ پۋنە ۋنيۆەرسيتەتىنەن ءبىلىم الىپ، ونى قارجىگەر ماماندىعى بويىنشا ءتامامدادىم. سونىمەن ەلگە ورالىپ، 2009 جىلى اقپان ايىنا دەيىن ۇلانباتىر قالاسىنداعى كاپيتال بانكتە Financial Risk analyst ماماندىعى بويىنشا قىزمەت اتقاردىم. بۇل مەنىڭ العاشقى جۇمىس ورنىم بولدى.

2009 جىلى اقش-قا ماگيسترانتۋراعا اتتاندىم.  ءبىر قىزىعى سول،  ماگيسترانتۋرا وقۋىن تۋرا باستاي المادىم. ويتكەنى مەنىڭ ءۇندىستاندا بىتىرگەن باكالاۆر دەڭگەيدەگى ديپلومىم 3 جىلدىق بولىپ سانالادى ەكەن. ال ماگيسترلىك شارتى بويىنشا 4 جىلدىق جوعارى وقۋ ورنىن بىتىرگەن بولۋىم كەرەك. سوندىقتان اقش –تا تاعى باكالاۆرياتتا وقي باستادىم. ءبىراق پۋنە جانە موڭعوليا ۇلتتىق ۋنيۆەرسيتەتىندە العان ساباق كرەديتتەردى كورسەتىپ، قۇجاتتار وتكىزدىم. مۇندا ءبىر جىل ءبىلىم الىپ، 2009-2010 جىلى الەۋمەتتىك عىلىمدارى (social science) ماماندىعى بويىنشا باكالاۆر ءبىتىردىم. سودان كەيىن ماگيستردى 2010-2012 جىلدارى ەكونوميكا سالاسى بويىنشا ءتامامداپ، ارى قاراي PhD دوكتور دارەجەسىن الۋ ءۇشىن 2012-2016 ارالىعىندا ءبىلىمىم مەن بىلىكتىلىگىمدى شىڭدادىم. جالپى العاندا،  PhD دوكتور دارەجەسىن العانعا دەيىن 13 جىل جوعارى ءبىلىم جولىندا تەر توكتىم دەسەم بولادى.

ءسىزدىڭ ماماندىعىڭىزدىڭ ەركەشەلىگى قانداي؟

«ءبىلىم ينەمەن قۇدىق قازعانداي» دەگەندەي ماماندىعىم ءبىلىم جولى بولعاندىقتان كوپ ۋاقىتىم ستۋدەتتەرگە وقيتىن دارىستەرگە دايىندالۋ مەن زەرتتەۋ جۇمىستارىن جۇرگىزۋمەن وتەدى. قازىرگى بۇكىل دۇنيە تەز وزگەرەتىن جاھاندانۋ زامانىندا بيزنەس پەن وركەنيەت الەمىندە نە بولىپ جاتقانىن ءجىتى باقىلاپ، ءبىلىپ وتىرۋ كەرەك. سوعان وراي ءبىلىم سالاسىندا اشىلعان جاڭالىقتار مەن ادىستەمەلىك تاسىلدەر، جۇمىستا قولدانىلاتىن جاڭا كومپيۋتەرلىك باعدارلامالاردى قاراستىرىپ، وقۋلىق كىتاپ جانە ماتەريالداردى وزگەرتىپ وتىرۋىمىز قاجەت. ودان تىس سوڭعى اكادەميالىق ماقالالاردى وقىپ، ءبىلىم جۇيەسىندە نە بولىپ، قالاي وزگەرىپ جاتقانىن باقىلاپ، زەرتتەۋ جۇمىستارىن دا سوعان قاراي سايكەستىرىپ جۇمىستاۋ كەرەك. اقش كوپ سالالارداعىداي اكادەميالىق ءبىلىم بەرۋ سالاسىندا دا الدا كەلە جاتقان ەلدەردىڭ ءبىرى. سوندىقتان وسى ەلگە دۇنيەجۇزىنەن ءبىلىمدى ادامدار كوپ كەلىپ، كوپتەگەن عىلىمي جينالىس، كونفەرەنسيالار وتكىزىپ وتىرادى. مەن دە جىلىنا 2-3 رەت وسىنداي كونفەرەنسيالارعا بارىپ قاتىسىپ تۇرامىن.

قاراپايىم وقىرماندارعا وپەراسيالىق تالداۋ، ماتەماتيكالىق ۇلگىلەۋ پروفەسسورى دەگەن دارەجەڭىزدى ءتۇسىندىرىپ بەرسەڭىز؟ ونىڭ بيزنەستى جۇرگىزۋدە ماڭىزى قانداي؟

نەگىزگى تاقىرىبىم – قانداي ءبىر ءونىمنىڭ ديزاين جانە ءوندىرىس پروسەسسىنەن باستاپ تۇتىنۋشىعا دەيىنگى جولىنداعى بارلىق ۇدەرىس جانە ءوندىرىس كەزەڭدەرىندەگى شىعىستى ازايتىپ، تيىمدىلىكتى (efficiency) كوبەيتۋ.  ياعني، قىسقاشا ايتساق، تۇتىنۋشىعا ءونىمدى ەڭ ارزان، ءبىراق ساپالى تۇردە جەتكىزىپ،  قامتاماسىز ەتۋ جولدارىن ىزدەستىرۋ. سول ناتيجەگە جەتۋ ءۇشىن ماتەماتيكالىق جانە داتا اناليتيكالىق مودەلدەردى شىعارىپ، ونى قولدانۋ بولىپ سانالادى.

قازىرگى ەركىن نارىقتىق ەكونوميكادا الەمدىك باسەكەلەستىككە تۇسەتىن كومپانيالارلار ءۇشىن ونىڭ ماڭىزى وتە زور.

مەن ماگيسترانتۋرا / MBA / وقىتۋلارىن قاداعالايتىن كوميسسيا مۇشەسى بولعاندىقتان ءبىراز ۋاقىتىمدى سوعان جۇمسايمىن.

ورتاشا تاۋلىكتىك جۇمىس كۇنىڭىز قالاي وتەدى؟

كوپ ۋاقىتىمدى  ۋنيۆەرسيتەتتە وتكىزەمىن. ءدارىس وقۋ، ساباق ۇيرەتۋ، ستۋدەنتتەرمەن بىرگە زەرتتەۋ جۇمىسىن جۇرگىزۋ دەگەن سياقتى. ونىڭ سىرتىندا ۋنيۆەرسيتەتتە ءارتۇرلى جۇمىستار اتقاراتىن كوميسسيالار بولادى. مەن ماگيسترانتۋرا / MBA / وقىتۋلارىن قاداعالايتىن كوميسسيا مۇشەسى بولعاندىقتان ءبىراز ۋاقىتىمدى سوعان جۇمسايمىن.

ەڭ كوپ قولداناتىن باعدارلامالارىڭىز قانداي؟

ءقازىر GitHub-تى كوپ قولدانامىن. سونىمەن قاتار ماماندىعىم بويىنشا ءبىر سالادا جۇمىس اتقاراتىن، ءبىراق باسقا جوعارى وقۋ ورىندارىندا  ءدارىس بەرەتىن ادامدارمەن  Slack ارقىلى الەۋمەتتىك جەلىدەگى توپتار سياقتى بايلانىس جاسايمىن.

جۇمىس كەڭسەڭىزدى سۋرەتتەپ بەرسەڭىز؟

 

 

ۋاقىت ۇنەمدەۋدىڭ ۇتىمدى ءتاسىلى نە؟

مەن كەلەر اپتادا ىستەيتىن جۇمىستاردى الدىمەن ويلانىپ، ءتىزىمىن جاساپ العان دۇرىس دەپ ويلايمىن. ەرتەڭگى كۇنى سول ءتىزىم ارقىلى جاسالعان  جوسپار بويىنشا جۇمىس اتقارساڭىز، ەڭبەگىڭىز ءونىمدى بولماق. ەگەر جوسپارىڭىز ءساتتى جۇزەگە اسسا، جۇمىسىڭىزدى اياقتاعان سوڭ ءلاززاتقا بولەنەسىز.

اتقارىلاتىن ىستەر ءتىزىمىن قايدا بەلگىلەپ،  قالاي جۇرگىزەسىز؟

ونلاين كۇنتىزبە مەن قابىرعاعا جاپسىرىپ قوياتىن قاعازداردى قولدانامىن.

جۇمىسىڭىزدىڭ وڭ جانە كەرى اسەرلەرى؟

ۋنيۆەرسيتەت كەلەشەك ماماندىق جەتىلدىرەتىن ورتا بولعاندىقتان ونىڭ ماڭىزى زور. ستۋدەنتتەرگە ءدارىس بەرۋ ادىستەمەسىن جەتىلدىرۋ ءۇشىن كوپ تەر توگۋ قاجەت. سوڭعى كەزدە جاڭالىق بولىپ ەنىپ جاتقان بيزنەستىك امال-تاسىلدەردى ۇنەمى قاداعالاپ، سول ارقىلى زەرتتەۋ تاسىلدەرى مەن وقۋ مازمۇنىن ۇنەمى وزگەرتىپ وتىرعان ءجون. سوندىقتان دا بۇرىڭعى وقۋ جۇيەسىنە قاراعاندا قازىرگى كەزدىڭ جوعارى وقۋ ورىندارى ديناميكالىق سەرپىندى وزگەرىس جاساپ كەلەدى. سوعان ىلەسۋ ءۇشىن ۇنەمى وزگەرىستە بولۋ جاعىمەن ەرەكشەلىكتە دەپ ويلايمىن.

وقۋ، ءبىلىم ارقىلى ادام ءوزىن-وزى ۇنەمى دامىتىپ وتىراتىندىقتان جۇمىسىمنىڭ كەرى اسەرى جوق. ءبىراق جاساعان جۇمىس، ىستەگەن ارەكەتتەرىڭنىڭ جەمىسىن ۇزاق ۋاقىتتان كەيىن سەزىنەسىڭ. مىسالى ءبىر اكادەميالىق ماقالا جازعانعا 1-2 جىل ۋاقىت الادى. ونى اكادەميالىق جۋرنالدارعا جىبەرگەن سوڭ ولار تەكسەرىپ كورۋ ءۇشىن 1 جىلدان استام ۋاقىت كەتەدى. ياعني ءبىر ماقالا ەڭ از دەگەندە 2 جىلدا باسپاعا ارەن شىعادى.

ءسىز نەنى ىستەۋگە شەبەرسىز؟

ەشتەڭە. ءبىراق بىلمەگەن جانە ۇيرەنگىم كەلگەن نارسەنى جۇيەلى تۇردە تەز ارادا ۇيرەنىپ، اتقارۋعا ەبىم بار.

ءقازىر قانداي جۇمىسقا نازار اۋدارىپ جاتىرسىز؟

قازىرگى جاعدايدا لوجيستيكا /تاسىمال/ جانە تۇتىنۋشى سۇرانىسىن قامتاماسىز ەتۋ سالاسىنا زەرتتەۋ جۇمىستارىن جۇرگىزۋدەمىن. دالىرەك ايتقاندا، تۇتىنۋشى كەرى قايتارعان تاۋارلاردى ەڭ قىسقا مەرزىمدە از شىعىنمەن قالاي رەتتەۋ جونىندە ماتەماتيكالىق مودەلدەر جاساپ جاتىرمىن.

كىتاپ كوپ وقيسىز با؟ ءدال ءقازىر قانداي كىتاپ نەمەسە ماقالا وقۋداسىز؟

ماماندىعىما قاتىستى كىتاپتار مەن ماقالاردى كوپ قارايمىن. سوڭعى ۋاقىتتا جاقىندا عانا ەكونوميكا سالاسىندا نوبەل سىيلىعىنا يە بولعان ءۇش عالىمنىڭ ەڭبەكتەرىن وقىپ ءجۇرمىن.

ءسىزدىڭ مىنەزىڭىز تۇيىق پا الدە اشىق پا؟

كوبىنەسە اشىقپىن دەپ ويلايمىن.

ءسىز قانشا ۋاقىت ۇيىقتايسىز؟

شامامەن 7 ساعات ۇيىقتاۋعا تىرىسامىن.

جۇمىس كەزىندە مۋزىكا تىڭدايسىز با؟ قانداي اۋەندەرگە اۋەسسىز؟

كوپ مۋزىكا تىڭدامايمىن. ءبىراق ارەدىك جۇمىس بارىسىندا باياۋ كلاسسيكالىق اۋەندەردى تىڭداۋدى ۇناتامىن.

ءسىزدى جۇمىستان تىس ۋاقىتتا قايدان تابۋعا بولادى؟

جۇمىستان تىس ۋاقىتتا تازا اۋادا جۇرگەندى جاقسى كورەمىن. سوندىقتان ءدال وسى جەردە بولامىن دەپ ايتا المايمىن.

كىمنەن، نەدەن كۇش قۋات الاسىز؟

مەن ءۇشىن ەڭ باستىسى جانە ماڭىزدىسى  – انامنىڭ تىلەك، دۇعالارى. اتا-انانىڭ بالاسىنا جاساعان باتا، دۇعالارى قابىل بولادى دەگەندەي قيىن ساتتەردەن جاقسىلىقپەن وڭاي وتكەن جاعدايلاردى ولاردىڭ دەمەۋلەرى دەپ تۇسىنەمىن.

ومىردەن العان ەڭ جاقسى عيبراتىڭىز…

قۇدايعا شۇكىر، توسىن وقيعالار بولعان جوق. الايدا قولىڭدا باردىڭ ءقادىرىن بىلگەن ءجون.

جەتىستىككە جەتۋ ءۇشىن نەگە ءمان بەرۋ كەرەك؟ جاستارعا قانداي كەڭەس بەرەسىز؟

كەيدە كەجەگەڭىز تارتىپ تۇرسا دا، ۇنەمى تالاپتانۋ كەرەك. نەگىزى كوپ جەتىستىككە جەتكەن ءبىلىمدى ادامدار مەن كاسىپكەرلەردىڭ بارلىعىنىڭ ءساتتى ساتتەرىنەن گورى ساتسىزدىكتەرى كوپ بولعان. كوپشىلىگىمىز سياقتى بىرنەشە قۇلاعان سوڭ ءتۇسىپ بەرە سالماعان. قايتا تاۋەكەل ەتىپ، تالاپتانا بەرگەن. سول ءۇشىن قاراپ جاتپاي، اركەز ارەكەتتە بولۋ قاجەت.

كەلەسى قوناققا كىمدى ۇسىنىپ، جۇمىس ىستەۋ تاسىلىمەن تانىسقىڭىز كەلەدى؟

Rio Tinto كومپانياسىندا مەنەدجەر بولىپ جۇمىستايتىن جەڭىس ۇلى باۋىرجاندى ۇسىنىس ەتەمىن.

گرانت يەگەرلەرىنىڭ ءتىزىمى جاريالاندى
03 تامىز 2024
گرانت يەگەرلەرىنىڭ ءتىزىمى جاريالاندى

 عىلىم جانە جوعارى ءبىلىم مينيسترلىگى گرانت يەگەرلەرىنىڭ ءتىزىمىن جاريالادى.  

گرانت ءتىزىمىن تومەندەگى كانالدان جۇكتەپ الۋعا بولادى.

   گرانت تاعايىنداۋ كونكۋرسىنا 104 مىڭنان استام تالاپكەر قۇجات تاپسىردى. بۇل وتكەن جىلمەن سالىستىرعاندا 10 مىڭعا ارتىق.

مەملەكەتتىك گرانتتار رەسپۋبليكالىق كوميسسيا وتىرىسىنىڭ قورىتىندىسى بويىنشا تاعايىندالدى. 

ءبىر گرانت ورنىنا ەڭ ۇلكەن كونكۋرس «ستوماتولوگيا» ماماندىعىندا بولدى. بۇل ماماندىق بويىنشا 35 تالاپكەر ءبىر ورىنعا تالاستى.

ارى قاراي «حالىقارالىق قاتىناستار جانە ديپلوماتيا» (11 ادام)، «دەنە شىنىقتىرۋ مۇعالىمدەرىن دايارلاۋ» (10 ادام)، «اۋدارما ءىسى» جانە «پسيحولوگيا» (9 ادام) بولدى.

گرانتقا ۇمىتكەرلەر اراسىندا بالدار تەڭدىگى جاعدايىندا باسىم قۇقىققا يە بولاتىن 22 مىڭنان استام تالاپكەر، ولاردىڭ ىشىندە «التىن بەلگى» يەگەرلەرى، حالىقارالىق جانە رەسپۋبليكالىق وليمپيادالاردىڭ جەڭىمپازدارى، وقۋ ۇزدىكتەرى بار.

سونداي-اق، گرانت ۇيلەستىرۋ بارىسىندا الەۋمەتتىك وسال ساناتتاعى بالالاردىڭ كۆوتالارى ەسكەرىلدى.

جوعارى وقۋ ورىندارىنا قۇجات تاپسىرۋ 25 تامىزعا دەيىن سوزىلادى.

ەستەرىڭىزگە سالا كەتسەك، گرانتتدىڭ باسىم بولىگى ينجەنەرلىك جانە تەحنيكالىق باعىتتارعا بولىنگەن.

مەملەكەت باسشىسىنىڭ تاپسىرماسىمەن العاش رەت ءىشىنارا وقۋ اقىسى بار سارالانعان گرانتتار ەنگىزىلدى.

«پەداگوگيكالىق عىلىمدار» جانە «الەۋمەتتىك عىلىمدار، جۋرناليستيكا جانە اقپارات» باعىتتارى بويىنشا 150 سارالانعان گرانتتان بولىنگەن. 

سونداي-اق، «سەرپىن» باعدارلاماسى ارقىلى تۇسۋشىلەرگە 3 903 گرانت بولىنگەن.

گرانت تىزىمىندە 5 000 حالىق تىعىز قونىستانعان جانە باتىس وڭىرلەردىڭ جاستارىن جەتەكشى جوعارى وقۋ ورىندارىندا وقىتۋ ءۇشىن ماقساتتى ءبىلىم بەرۋ گرانتى بار.

ءبىز تۋرالى
ulys.kz — اقپاراتتىق، ساراپتامالىق جانە تانىمدىق باعىتتاعى ماتەريالداردى بەرەدى.
 
مۋلتيمەديالىق جوبا زامان تالابىنا ساي جاسالعان. قازاقستاننىڭ اقپاراتتىق نارىعىن ساپالى
كونتەنتپەن قامتاماسىز ەتۋگە ۇلەس قوسۋعا باعىتتالعان. مۇنداعى ساراپتامالىق، تانىمدىق
ماقالالار سان سالانى قامتيدى. گەوستراتەگيا، گەوەكونوميكا، گەوساياسات، حالىقارالىق
قاتىناستار مەن ەلدىڭ ىشكى-سىرتقى ساياساتى، ەكونوميكا، جاھاندا بولىپ جاتقان تەكتونيكالىق
وزگەرىستەر مەن ترەند تاقىرىپتار ۇلتتىق مۇددە تۇرعىسىنان تەرەڭ تالدانىپ قازاق
وقىرماندارىنا جەتكىزىلەدى. ورتالىق ازيا مەن تۇركى الەمىنە ەرەكشە كوڭىل بولىنەدى.