8 مامىر كۇنى قىرعىز-تاجىك مەملەكەتتىك شەكاراسىندا قارۋلى قاقتىعىس بولدى. وقىس وقيعا بارىسىندا قىرعىز تاراپىنان 30-40 ادام جانە تاجىكستان تاراپىنان 30-40 ادام بىر-بىرىنە تاس اتا باستاپ، سوڭىندا اڭشى مىلتىعىنان وق اتىلعان. جانجالدىڭ ۋشىعىپ كەتۋىنە جول بەرمەۋ ءۇشىن قىرعىزستاننىڭ جانە تاجىكستاننىڭ شەكارا كەزەكشىلىگى اۋەگە بىرنەشە مارتە ەسكەرتۋ وعىن اتۋعا ءماجبۇر بولدى.
وسى جاعدايدان كەيىن قىرعىزستان مەن تاجىكستان شەكاراسىنداعى قارۋلى قاقتىعىسقا بايلانىستى ەكى ەل نارازىلىق نوتالارىمەن الماستى.
قىرعىزستاندىق كابار اگەنتتىگىنىڭ حابارلاۋىنشا، تاجىكستاننىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى ن.اليزودا قىرعىزستاننىڭ مەملەكەتتىك شەكاراسىندا 8 مامىر كۇنى قىرعىز-تاجىك مەملەكەتتىك شەكاراسىندا بولعان قارۋلى قاقتىعىسقا بايلانىستى قىرعىزستان سىرتقى ىستەر مينيسترلىگىنە شاقىرىلعان. تاجىك ديپلوماتىنا قىرعىز رەسپۋبليكاسىنىڭ سىرتقى ىستەر مينيسترلىگى اسكەري قىزمەتشىلەر مەن قىرعىزستان ازاماتتارىن ۇڭعىاستىلىق گراناتا وقتارى بار اۆتوماتتاردان، سونىڭ ىشىندە توپتىق مينومەت قارۋلارىنان ماقساتتى اتىلىپ، سالدارىنان شەكارا قىزمەتىنىڭ ءۇش اسكەري قىزمەتشىسى جانە قىرعىزستاننىڭ ءبىر جەرگىلىكتى تۇرعىنى اتىلعان وقتان اۋىر جاراقات الۋىنا بايلانىستى نارازىلىق نوتاسىن تاپسىردى.
سونداي-اق، بولعان جاعدايعا بايلانىستى قىرعىز رەسپۋبليكاسىنىڭ تاجىكستان رەسپۋبليكاسىنداعى توتەنشە جانە وكىلەتتى ەلشىسى جانىش رۇستەنبەكوۆ سىرتقى ىستەر مينيسترلىگىنە شاقىرىلدى.
تاجىكستاندىق «حوۆار» اگەنتتىگىنىڭ حابارلاۋىنشا، ەلشىگە تاجىكستان رەسپۋبليكاسىنىڭ سىرتقى ىستەر مينيسترلىگى قارۋلى قاقتىعىسقا الىپ كەلگەن قىرعىزستان ازاماتتارى مەن اسكەري قىزمەتكەرلەرىنىڭ ارانداتۋشىلىق ارەكەتتەرىنە بايلانىستى نارازىلىق نوتاسىن تابىس ەتتى.
وندا قىرعىز رەسپۋبليكاسىنىڭ ازاماتىنىڭ وق اتۋى، سونداي-اق قىرعىز شەكاراشىلارىنىڭ كەيىنگى ارەكەتتەرى، تاجىكستان شەكارا بولىمشەلەرىن كەك قايتارۋ شارالارىن قابىلداۋعا ءماجبۇر ەتكەنى تۋرالى ايتىلعان.
