بۇگىندە ەلدەگى جوعارى وقۋ ورىندارىنىڭ 48-ىنە 61 435 جاتاقحانا ورنى كەرەك. ونىڭ ىشىندە 25 مەملەكەتتىك جوو-عا 46 402 ورىن، 23 جەكە ججو-عا 15 033 ورىن قاجەت. مەملەكەت تالايدان بەر وسى ماسەلەنى شەشۋگە مەملەكەتتىك-جەكەشەلىك ارىپتەستىك تەتىگىن قولدانىپ كەلەدى.
2018-2022 جىلدارى وسى تەتىك ارقىلى 40 662 ورىنعا ارنالعان 168 جاتاقحانا قولدانىسقا بەرىلگەن. وسى قارقىنمەن جىلجىساق، قازىرگى جاتاقحانا تاپشىلىعىن تولىق جويۋ ءۇشىن تاعى 5-6 جىل كۇتۋ كەرەك. ءبىراق جىل سايىن جوعارى ءبىلىم ىزدەپ قالاعا اعىلاتىن جاستاردىڭ سانى قارقىندى ارتىپ كەلە جاتقانىن ەسكەرسەك، قارقىندى ارتتىرماسا، الداعى10 جىلدا جاتاقحانا ماسەلەسى وزەكتى بولاتىن ءتۇرى بار. ونىڭ ۇستىنە «اتامەكەن» ۇلتتىق كاسىپكەرلەر پالاتاسى مەملەكەتتىك-جەكەشەلىك ارىپتەستىك اياسىندا قولعا الىنعان جوبالار كەيىنگى بەس جىلدا 7 ەسەدەن استام ازايعان.
وسىنىڭ ءبارىن ەسكەرگەن عىلىم جانە جوعارى ءبىلىم مينيسترلىگى ينۆەستيسيالىق تارتىمدىلىقتى ارتتىرۋدىڭ بىرنەشە شاراسىن قابىلدادى.
ناقتى ايتساق، جاتاقحانا سالعان كەزدە مەملەكەتتىك تاپسىرىستى ورنالاستىرۋ مەرزىمى 8 جىلدان 6 جىلعا دەيىن قىسقارتىلدى. ال جاتاقحاناداعى ءبىر ورىنعا مەملەكەتتىك تاپسىرىستىڭ مولشەرى رەسپۋبليكا بويىنشا 122 اەك-تەن 195 اەك-كە دەيىن، الماتى قالاسى ءۇشىن 144 اەك-تەن 230 اەك-كە دەيىن كوتەرىلدى.
بۇل فورماتتا سالىناتىن جاتقانا قۇرىلىسىنا كەتەتىن شىعىننىڭ 30 پايىزى مينيسترلىك بيۋدجەتتەن قارجىلاندىرادى. قالعان 70 پايىزىن ينۆەستور ءوزى تابۋ كەرەك. نىسان قولدانىسقا بەرىلگەننەن كەيىن 6 جىل بويى مەملەكەتتىڭ جەكە مەنشىك ارىپتەسىنىڭ يەلەگىندە بولادى. وسى ۋاقىتتا ول قۇرىلىسقا كەتكەن شىعىندا ءوندىرىپ الۋعا ءتيىس. ودان كەيىن نىسان مەملەكەتتىڭ نەمەسە ۋنيۆەرسيتەتتىڭ بالانسىنا الىنادى. ءقازىردىڭ وزىندە وسى فورماتپەن 9 جاتاقحانانىڭ قۇرىلىسى قولعا الىندى. ونىڭ بەسەۋى الماتى قالاسىندا، ەكەۋى اباي جانە پاۆلودار وبلىستارىندا، ەكەۋى قىزىلوردا جانە ماڭعىستاۋ وبلىستارىندا بوي كوتەرەدى.