1 ناۋرىزعا قاراعان ءتۇنى 3 مەگاپوليس پەن 11 وبلىستا ۋاقىت ءبىر ساعات ارتقا شەگەرىلۋىنە بايلانىستى ناماز ۋاقىتتارى دا وزگەرەدى. 2024 جىلدىڭ 29 اقپانىنان 1 ناۋرىزعا قاراعان ءتۇنى ساعات 00:00-دە استانا، الماتى، شىمكەنت، اباي، اقمولا، جامبىل، جەتىسۋ، قاراعاندى، قوستاناي، پاۆلودار، سولتۇستىك قازاقستان، تۇركىستان، ۇلىتاۋ جانە شىعىس قازاقستان وبلىستارى جەرگىلىكتى ۋاقىتتى 1 ساعاتقا ارتقا جىلجىتادى. 

كوپشىلىككە تۇسىنىكتى بولۋ ءۇشىن ايتا كەتسەك، بۇگىنگى تاڭدا قازاقستاندا UTC+5 جانە UTC+6 ەكى ۋاقىت بەلدەۋى بار. ەل اۋماعىنىڭ كوپ بولىگى (باتىس وبلىستاردى قوسپاعاندا) UTC+6 ايماعىندا ورنالاسقان. جالپى قازاقستاندا ءبىرىڭعاي ۋاقىت بەلدەۋىن ورناتۋدى ۋاقىتتى ەسەپتەۋ ماسەلەلەرى جونىندەگى جۇمىس توبىنا كىرگەن قازاقستاندىق عالىمدار مەن ساراپشىلار ۇسىنعان.

جۇمىس توبى 2023 جىلدىڭ اقپانىندا قازاقستاندىقتاردىڭ ەڭ قولايلى ۋاقىت بەلدەۋىنە كوشۋ تۋرالى بىرنەشە مارتە كەلىپ تۇسكەن وتىنىشتەرىنە بايلانىستى قۇرىلعان. بۇل ماسەلەنى وتكەن جىلدان باستاپ مەديسينا، فيزيولوگيا، گەوگرافيا، مەترولوگيا جانە باسقا دا ءتۇرلى سالالاردى قامتيتىن جۇمىس توبىنىڭ مۇشەلەرى قازاقستاندا قولايلى ۋاقىت بەلدەۋىن بەلگىلەۋ ماسەلەسىن زەرتتەۋدە.

جۇمىس توبىنا قاتىسۋشىلار UTC+5 ءبىرىڭعاي ۋاقىت بەلدەۋىنە كوشۋ ەڭ دۇرىس جانە وڭتايلى نۇسقاسى ەكەنىن جانە قازاقستاننىڭ كوپتەگەن ايماقتارى تابيعي ۋاقىتقا ەڭ جاقىن ۋاقىتتى پايدالاناتىن بولادى دەگەن ورتاق پىكىرگە كەلدى.

وسى رەتتە ءبىز قازاقستان مۇسىلماندارى ءدىني باسقارماسى تاراتقان نامازدىڭ جاڭا كەستەسىن جاريالايمىز.

تاياۋدا اتىراۋدا «ادال ادام – ادال ەڭبەك – ادال تابىس» اتتى تاقىرىپپەن ۇلتتىق قۇرىلتايدىڭ ءۇشىنشى وتىرىسى وتكەن بولاتىن. وسى قۇرىلتايعا ارنايى قاتىسقان مەملەكەت باسشىسى قاسىم-جومارت توقايەۆ ماڭىزدى يدەولوگيالىق تۇجىرىمدارىمىز بەن نەگىزگى باعىتتارىمىز – تاۋەلسىزدىك جانە وتانشىلدىق، بىرلىك جانە ىنتىماق، ادىلدىك جانە جاۋاپكەرشىلىك، زاڭ جانە ءتارتىپ، ەڭبەكقورلىق جانە كاسىبي بىلىكتىلىك، جاسامپازدىق جانە جاڭاشىلدىق ەكەندىگىن جان-جاقتى ايتا كەلە ەلدەگى ءدىن ماسەلەسىنە، مەشىت ماسەلەسىنە دە ايرىقشا توقتالعان بولاتىن. 
«ەلگە جاناشىر ىسكەر ازاماتتار بىزدە دە از ەمەس. مۇنداي ازاماتتار قوعامعا قاجەتتى كوپتەگەن جوباعا قارجى سالىپ، يگى ىستەردىڭ باسى-قاسىندا ءجۇر. قايىرىمدىلىق جانە ۆولونتەرلىك باستامالارعا دەمەۋشىلىك جاساپ كەلەدى. مەملەكەت تە وتانشىل ازاماتتاردى وزگەلەرگە ۇلگى ەتىپ، ولارعا قولداۋ كورسەتەدى. ارينە، ايماقتاردا ءوز قارجىسىنا مەشىت سالعان كاسىپكەرلەردىڭ نيەتى ءتۇزۋ، ونى تۇسىنۋگە بولادى. الايدا جاڭا مەكتەپ، جاتاقحانا، اۋرۋحانا، كىتاپحانا، مۇراجاي نەمەسە سپورت سارايىن تۇرعىزۋ الدەقايدا ماڭىزدىراق. مۇنىڭ ساۋابى مول. كەيىنگى ۇرپاق تا وسىنداي يگى ىستەرگە العىس ايتارى انىق»، - دەگەن ەدى پرەزيدەنت.
استاناداعى «اللانىڭ گ ۇلى» اتالىپ كەتكەن ىرىسكەلدى قاجى اتىنداعى مەشىتتىڭ باس يمام نۇرلان يمام بايجىگىت ۇلى دا پرەزيدەنتتىڭ مەشىت سالۋعا قاتىستى پىكىرىن قۇپ كورەتىندىگىن ايتادى.
«مەملەكەت باسشىسى اتىراۋدا وتكەن ۇلتتىق قۇرىلتايدا دىنگە قاتىستى وتە دۇرىس ماسەلەلەر كوتەرىپ، مەشىت سالۋ ىسىنە قاتىستى ايرىقشا توقتالىپ ءوتتى. ياعني، دىنگە قىزمەت ەتۋ، ۇلتقا قىزمەت ەتۋ تەك مەشىت سالۋمەن عانا شەكتەلمەيدى. جول سالۋ، بالاباقشا سالۋ، مەكتەپ سالۋ دا ۇلتقا قىزمەت سانالادى. مەشىت سالىنعان كەزدە نورماتيۆتىك-قۇقىقتىق اكتىلەرىنىڭ ءبارى رەتتەلۋى ءتيىس جانە دە ەلىمىزدە ورىندى جۇرگىزىلىپ كەلەدى»، - دەدى نۇرلان يمام. 
ەستە بولسا، سول قۇرىلتايدا مەملەكەت باسشىسى يسلام ەلدەرىندە ايگىلى ءدىن قايراتكەرلەرىنىڭ بەيىتى مىندەتتى تۇردە جاپقىشپەن جابىلاتىندىعىن ايتا كەلە ياساۋي كەسەنەسىنە قاتىستى كونە جادىگەرگە نازار اۋدارتقان ەدى.
«ءماديناداعى مۇحاممەد پايعامباردىڭ ءقابىرى دە وسىلاي بۇركەلگەن. بۇل – يسلام وركەنيەتىنىڭ ءداستۇرى. ال قاسيەتتى تۇركىستانداعى ياساۋي قابىرىندە كوپتەن بەرى ارنايى جاپقىش جوق. تالاي زاماننان كەلە جاتقان كونە جاپقىشتى قالپىنا كەلتىرۋ جۇمىسى ءبىراز جىل بۇرىن باستالىپ، اياقسىز قالعان. مەن قۇزىرلى مەملەكەتتىك ورگانعا وسى قۇندى مۇرانى تەزىرەك ساپالى جوندەۋدەن وتكىزىپ، تاريحي ورنىنا قايتارۋدى تاپسىرامىن»، - دەگەن بولاتىن قاسىم-جومارت كەمەل ۇلى.
نۇرلان يمام ءدال وسى ماسەلەگە دە ايرىقشا توقتالىپ ءوتتى. 
«ءيا، يسلام قوجا احمەت ياساۋي سىندى تاريحي تۇلعالاردىڭ قابىرىندە جاپقىش بولادى. جالپى، جاپقىش تەك تاريحي تۇلعالارعا عانا ەمەس، كەز كەلگەن ادامنىڭ جانازاسىندا جابىلادى. وندا «ءبارىمىز جاراتقاننان كەلگەنبىز»، «ءبارىمىز اللاعا قايتامىز» دەگەن سياقتى ەسكەرتپە، اڭداتپا دۇعالار جازىلادى. مۇنداي جاپقىشتار بار دۇنيە. مەنىڭشە، بۇل جاپقىشتى قىمبات تاستارمەن اسپەتتەپ، ەرەكشە دايىنداسا، وتە قۇندى ءارى دۇرىس بولادى. بارلىق ادامعا، اسىرەسە، مۇسىلمان ەلدەرىنەن كەلەتىن تۇلعالارعا تۇسىنىكتى بولۋى ءۇشىن ول كىسىنىڭ ءومىرىن، ەڭبەكتەرىن ارابي نۇسقادا جازىپ قويعان ءجون. ەرتەرەكتە بابالارىمىزدا كالليگرافيا ونەرى جاقسى دامىعان. سونى قايتا جانداندىرۋىمىز قاجەت»، - دەدى ىرىسكەلدى قاجى اتىنداعى مەشىتتىڭ باس يمامى.
سونىمەن قاتار ول مارال يشان، ىرعىزباي بي، قابانباي، بوگەنباي، رايىمبەك باتىرلار سىندى ەسىمى ەلىمىزگە تانىمال ادامداردىڭ قابىرىندە دە جاپقىش بولۋى تيىستىگىن باسا ايتتى. 
«ەلىمىزدە تىيىم سالىنعان «اتا جولى» سىندى ۇيىمدار ءقابىر باسىنا ماتا جاۋىپ كەتە بەرەدى. ءقابىر باسى اقتىققا تولىپ قالادى. شامانيزم ەلەمەنتىن جاساماماۋىمىز كەرەك. جالپى، پرەزيدەنتىمىزدىڭ ايتقان ءسوزىنىڭ استارىندا مۇسىلمان ەكەنىمىزدى كورسەتەتىن ۇلكەن دانالىق جاتىر. سوندىقتان تولىقتاي قولدايمىن»، - دەدى ول.

بۇقارالىق اقپارات قۇرالدارىنىڭ جاريالانىمدارىندا جانە الەۋمەتتىك جەلىلەردە جوعارعى سوت مەكتەپتەردە ورامال تاعۋدى زاڭدى دەپ تاپتى دەگەن جالعان اقپارات تارالۋدا. بۇل جالعان اقپارات، دەپ حابارلايدى Ulys.

"ءىستى قاراۋ اياسىندا جوعارعى سوتتىڭ اكىمشىلىك ىستەر جونىندەگى سوت القاسى ءبىلىم بەرۋ مەكەمەسىندە ورامال تاعۋدىڭ زاڭدىلىعى جونىندەگى ماسەلەنى تالقىلاۋعا ارالاسپاعان. كاسساسيالىق ساتى مەكتەپتىڭ وقۋشىنى ساباققا جىبەرمەۋىن زاڭسىز دەپ تانىدى، ويتكەنى ءبىلىم الۋ قۇقىعى قازاقستان رەسپۋبليكاسى ازاماتتارىنىڭ نەگىزگى كونستيتۋسيالىق قۇقىقتارىنىڭ ءبىرى بولىپ تابىلادى.  سونىمەن قاتار، بەيىندى مينيسترلىكتە ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتاردى بەكىتۋ جونىندەگى وكىلەتتىكتەر بار. ءمينيستردىڭ ءتيىستى بۇيرىعى زاڭسىز دەپ تانىلماعان جانە كۇشى جويىلماعان. سونداي-اق، اتا-انالار مەكتەپ جارعىسى مەن مەكتەپ فورماسىنا قويىلاتىن تالاپتاردى ساقتاۋ مىندەتىنە جاۋاپتى ەكەنىن اتاپ وتەمىز. بۇل رەتتە اتا-انالاردىڭ بالالاردى تاربيەلەۋ مەن ءبىلىم بەرۋ، ولاردىڭ قۇقىقتارى مەن مۇددەلەرىن قورعاۋ جونىندەگى وزدەرىنە العان جانە زاڭدا بەلگىلەنگەن، ونىڭ ىشىندە اكىمشىلىك قۇقىق بۇزۋشىلىق تۋرالى كودەكستە كوزدەلگەن مىندەتتەردى ورىنداماۋى جاۋاپتىلىققا اكەپ سوعادى"، - دەلىنگەن جوعارعى سوتتىڭ حابارلاماسىندا.

ايتا كەتسەك، ءبىرقاتار باق-تا مەكتەپتە وقۋشىلارعا ورامال تاعۋعا رۇقسات بەرىلدى دەگەن سىڭايدا اقپاراتتار تاراعان بولاتىن.