«جەر ۇيدەن ءورت شىقتى. اپاتقا ەسكىرگەن گاز باللونى سەبەپ بولعان». «شاعىن اسحانادا گاز باللونى جارىلىپ، ادامدار زارداپ شەكتى». كەيىنگى جىلدارى جاڭالىقتار لەگىنەن وسىعان ۇقساس مالىمەتتەردى ءجيى وقيتىن بولدىق.
توتەنشە جاعدايلار مينيسترلىگى وسى پروبلەمانى تۇپ-تامىرىمەن جويۋ ءۇشىن قولدانىستا جۇرگەن گاز باللوندارىن تۇگەندە شىققان كورىنەدى. وسىلايشا حالىقتىڭ قولىندا 348 مىڭ باللوننىڭ گاز ساقتاۋعا جارامايتىنى انىقتالىپ وتىر.
ەڭ سوراقىسى، حالىق بۇل باللونداردى بۇرىنعىداي ارنايى قىزمەتتىڭ كومەگىمەن ەمەس، جانارماي ستانسالارىنا بارىپ، تولتىرىپ ءجۇر. مينيستر شىڭعىس ءارىنوۆ پروبلەمانىڭ وسى جاعىنا كوبىرەك الاڭدايتىنىن ايتادى.
«ءقازىر حالىق گاز باللونداردى جانارماي ستانسالارىندا تولتىرادى. ول زاڭعا قايشى. ال، ول باللونداردىڭ باسىم بولىگى قولدانۋعا جارامسىز. ءبىزدىڭ ەسەبىمىز بويىنشا 348 مىڭ گاز باللونىن اۋىستىرۋ كەرەك»، - دەدى مينيستر.
ماسەلەگە ءتىپتى ۇكىمەت ارالاسىپ وتىر. پرەمەر-مينيستر ولجاس بەكتەنوۆ ۇكىمەت وتىرىستارىنىڭ بىرىندە 50 جىل بويى ۇزدىكسىز قولدانىلىپ كەلە جاتقان گاز باللوندارى بار ەكەنىن ايتتى. ءقازىر ونەركاسىپ جانە قۇرىلىس مينيسترلىگى وسى باللونداردى جاڭاسىمەن اۋىستىراتىن كاسىپورىن ىزدەپ جاتىر.
اتالعان مينيسترلىك گاز باللوندارىن جاڭاسىمەن الماستىرۋ حالىقتىڭ قالتاسىنا سالماق سالماۋ كەرەك دەگەن ۇستانىمدا وتىر. ول ءۇشىن «جاسىل دامۋ» قورىنىڭ 12 ملرد تەڭگەسىن بىرنەشە كاسىپورىنعا ءبولىپ بەرىپ، مەملەكەتتىك تاپسىرىس ارقىلى جاڭا باللوندار ءوندىرۋ ۇسىنىلىپ ءجۇر. مىسالى، «Kazinjenering» كومپانياسى ءبىر باللوندى 34-38 مىڭ تەڭگەدەن جاساپ شىعا الاتىنىن ايتقان. ءوندىرىس قۋاتى وسىمەن قارايلاس تاعى ءبىر كاسىپورىن تابىلسا، 350 مىڭ باللوندى 5 جىلدا جاڭارتىپ شىعۋعا بولاتىن كورىنەدى.
