قازاقستاندا جۇڭگو كاپيتالى بار 6 مىڭنان استام كاسىپورىن جۇمىس ىستەپ جاتىر. ولاردىڭ اراسىندا CNPC، CITIC، SINOPEC، HUAWEI سياقتى الەمدىك دەڭگەيدەگى مىقتى كورپوراسيالار بار.بۇل تۋرالى ءدال ءقازىر قازاق-قىتاي ىسكەرلىك كەڭەسىنىڭ وتىرىسىندا ءسوز سويلەپ جاتقان قازاقستان پرەزيدەنتى قاسىم-جومارت توقايەۆ ءمالىم ەتتى، دەپ حابارلايدى Ulys.

اقوردا جازعانداي، توقايەۆ «جۇڭگو قازاقستاننىڭ تاعدىر قوسقان تاتۋ كورشىسى، جاقىن دوسى جانە ماڭگىلىك ستراتەگيالىق سەرىكتەسى ەكەنىن» اتاپ وتكەن.

«ءبىزدىڭ ەلدەرىمىزدىڭ اراسىندا ءاردايىم تەرەڭ سەنىم بار، قارىم-قاتىناسىمىز قارقىندى جانە ءتيىمدى تۇردە دامۋدا. بايلانىستارىمىز جىلدان جىلعا نىعايىپ كەلەدى. سونىڭ ارقاسىندا ەلدەرىمىز بەرىك ءارى سەرپىندى ىسكەرلىك قاتىناستاردىڭ ىرگەتاسىن قالادى. جۇڭگو – جاھاندىق كوشباسشى مەملەكەت، قازاقستاننىڭ ءتۇرلى باعىتتاعى، سونىڭ ىشىندە ساۋدا سالاسىنداعى باستى سەرىكتەسى. بۇل – ءتوراعا سي ءسزينپيننىڭ ارقاسى. بىلتىر ءبىزدىڭ ەلدەرىمىز اراسىنداعى ساۋدا اينالىمى 44 ميلليارد دوللارعا جەتتى. بۇل – ەكى ەل تاريحىندا بۇرىن-سوڭدى بولماعان ەڭ جوعارى كورسەتكىش. ءبىراق ءبىز مۇنىمەن توقتاپ قالماۋىمىز كەرەك. سوندىقتان قىتايلىق دوستارىمىزبەن وسى قارقىندى ودان ءارى ارتتىرىپ، الداعى بەس جىلدا ءوزارا ساۋدا كولەمىن ەداۋىر ۇلعايتۋدى جوسپارلاپ وتىرمىز. بۇعان الەۋەتىمىز جەتەدى. مەملەكەت باسشىلارى دەڭگەيىندە ءوزارا ساياسي ەرىك-جىگەر مەن ورتاق ۇمتىلىس بار»، – دەدى قاسىم-جومارت توقايەۆ.

توقايەۆ سونداي-اق جۇڭگو قازاقستان ەكونوميكاسىنا 27 ميلليارد دوللار ينۆەستيسيا سالعانىن حابارلاي كەلە، ەلىمىزدە جۇڭگو كاپيتالى بار نەشە كاسىپورىن تىركەلگەنىن ءمالىم ەتتى.

«جۇڭگو قازاقستان ەكونوميكاسىنا 27 ميلليارد دوللار ينۆەستيسيا سالدى. بۇل، شىن مانىندە، وتە جاقسى ۇدەرىس. سوندىقتان وسى جۇمىس تابىستى تۇردە جالعاسادى دەپ تولىق سەنىممەن ايتۋعا بولادى. ءبىزدىڭ ەلىمىزدە جۇڭگو كاپيتالى بار 6 مىڭنان استام كاسىپورىن جۇمىس ىستەپ جاتىر. ولاردىڭ اراسىندا CNPC، CITIC، SINOPEC، HUAWEI سياقتى الەمدىك دەڭگەيدەگى مىقتى كورپوراسيالار بار. بۇدان بولەك، ءىرى جانە ورتا بيزنەس وكىلدەرى جۇمىس ىستەيدى. ءبىز بارلىعىنا ەرەكشە كوڭىل اۋدارىپ جاتىرمىز. جۇڭگو حالىق رەسپۋبليكاسىنىڭ ءتوراعاسى، ءقادىرلى دوسىم سي سزينپين مىرزامەن بىرگە كوپ سالالى قازاق-قىتاي ىنتىماقتاستىعىن دامىتۋ ۇدەرىسىن ۇنەمى باقىلاپ وتىرمىز. وسى جولى جۇڭگو تاراپى مەن باستاعان قازاق دەلەگاسياسىنا ەرەكشە كوڭىل ءبولىپ، ىستىق ىقىلاسىمەن قوناقجايلىق كورسەتتى. رەسمي ساپارىم ءتيىمدى، ويداعىداي ءوتتى دەپ سانايمىن. ءتوراعا سي سزينپين مىرزامەن وتكەن كەلىسسوزدەر ناتيجەسىن وتە جوعارى باعالايمىن. ەلدەرىمىزدىڭ اراسىنداعى قارىم-قاتىناستىڭ بولاشاعى جارقىن بولارىنا سەنەمىن. وسىعان وراي، قۇرمەتتى سي سزينپين ءتوراعاعا قازاق-قىتاي بايلانىستارىن نىعايتۋعا قوسىپ جاتقان ۇلەسى ءۇشىن شىنايى ريزاشىلىعىمدى ءبىلدىردىم»، – دەدى قاسىم-جومارت توقايەۆ.

ازاماتتارعا ارنالعان ۇكىمەت ق ر ىىم-مەن بىرلەسىپ، تۇركىستان قالاسىندا ميگراسيالىق حالىققا قىزمەت كورسەتۋ ورتالىعىن (محقو) اشتى. بۇل تۋرالى اقپاراتتى ازاماتتارعا ارنالعان ۇكىمەت مەملەكەتتىك كورپوراسياسى قوعاممەن بايلانىس دەپارتامەنتىنىڭ ديرەكتورى مۇرات جۇمانباي ءوزىنىڭ فەيسبۋك پاراقشاسىندا جاريالادى.

ونىڭ جازۋىنشا، ەندى ەڭبەك ميگرانتتارى مەملەكەتتىك قىزمەتتەردى حالىققا قىزمەت كورسەتۋ ورتالىقتارىنىڭ ستاندارتىنا ساي «ءبىر تەرەزە» قاعيداتى بويىنشا الا الادى. بۇل ەلىمىزدەگى كوشى-قون قىزمەتتەرىن كورسەتەتىن 15ء-شى ورتالىق.
جاڭا ورتالىقتىڭ اشىلۋ سالتاناتىنا تۇركىستان وبلىسىنىڭ اكىمى ءومىرزاق شوكەيەۆ، «ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسقارما ءتورايىمىنىڭ ورىنباسارى ءبىرجان ءجۇنىسوۆ، تۇركىستان وبلىستىق پوليسيا دەپارتامەنتىنىڭ باسشىسى قايرات دالبەكوۆ قاتىستى.

سونىمەن قاتار، بيىلعى جىلدىڭ اقپان ايىنان باستاپ ميگراسيالىق حقو ارقىلى كورسەتىلەتىن قىزمەتتەر سانى تولىعا ءتۇستى. ەندى قر-نا ۋاقىتشا كەلەتىن شەتەلدىكتەر مەن ازاماتتىعى جوق ادامدار كوشى-قون قىزمەتتەرى ورتالىعىنىڭ قىزمەتىنە جۇگىنە الادى. بۇعان دەيىن بۇل قىزمەت تەك ق ر ءىىم كوشى-قون كوميتەتى تاراپىنان كورسەتىلەتىن. 
جاڭا قىزمەت ءتۇرىن پايدالانۋ ءۇشىن شەتەلدىك ازاماتتىڭ وزىمەن بىرگە كەلەسى قۇجاتتارى بولۋى ءتيىس:
- ق ر ايماعىنا كىرۋگە ۆيزاسى بار شەتەلدىكتىڭ نە ازاماتتىعى جوق ادامنىڭ جەكە باسىن كۋالاندىراتىن جارامدى قۇجاتى؛
- شەكارانى كەسىپ وتكەنى تۋرالى بەلگىسى بار كوشى-قون كارتوچكاسى؛
- ەركىن تۇردە جازىلعان قولداۋحات.

قىزمەت الۋشىلار ق ر ايماعىنا 6 ايدان ارتىق مەرزىمگە كەلەتىن بولسا، قوسىمشا تولتىرىلعان 2 مەكەنجايعا كەلۋ پاراعىن، كەلۋ پاراعىنا تولتىرىلعان ستاتيستيكالىق ەسەپكە الۋ تالونى مەن 3،5*4،5 كولەمىندەگى ءبىر فوتوسۋرەت تاپسىرۋى كەرەك. 
جاڭادان قوسىلعان قىزمەتتەن بولەك، مۇندا شەتەلدىكتەر جۇمىس ىستەۋگە رۇقسات بەرەتىن قۇجاتتى الىپ، ق ر اۋماعىنا ۋاقىتشا كەلەتىندەر جەكە سايكەستەندىرۋ ءنومىرىن راسىمدەي الادى. 
ايتا كەتۋ كەرەك، تۇركىستان قالاسىندا بيىلعى جىلدىڭ باسىنان بەرى ميگراسيا باعىتى بويىنشا 6700 قىزمەت كورسەتىلگەن. 
جاڭا فرونت-وفيس تۇركىستان قالاسى 160 كۆارتال، № 209 عيماراتتا ورنالاسقان. ورتالىق دۇيسەنبى-سەنبى كۇندەرى ارالىعىندا 9:00-دەن 20:00-گە دەيىن جۇمىس ىستەيدى.

بۇگىن ماڭعىستاۋ وبلىسىنىڭ  اكىمى ەرالى توعجانوۆ سوعىس جانە تىل ارداگەرلەرىنىڭ شاڭىراعىندا بولىپ، مەرەكەمەن قۇتتىقتادى. وبلىس اكىمى باسپا ءسوز قىزمەتىنىڭ حابارلاۋىنشا، 
1942 جىلى اسكەر قاتارىنا شاقىرتىلعانداردىڭ ءبىرى 96 جاستاعى قامقا ۇمبەتالينا. ول ۇلى وتان سوعىسى كەزىندە 9-شى اۋە اسكەرىندە 1ء-شى قيىر شىعىس مايدانىندا ۇشقىش بولىپ قىزمەت ەتكەن. ۇشاققا بومبولاردى تيەپ، ونى جاۋ جەرىنە تاستاۋدا ەرلىك كورسەتكەن باتىر اجە.
سونىمەن قاتار، سۇراپىل سوعىس جىلدارى تىلدا قىزمەت ەتكەن ەڭبەككەرلەردىڭ ەڭبەگى، جەڭىستى جاقىنداتۋعا قوسقان ۇلەسى از ەمەس. مايدانعا اتتانعان سولداتتاردىڭ اس-سۋىن، كيىم-كەشەگىن ۋاقىتىلى جەتكىزۋمەن قاتار اۋىلدا قالعان ۇلكەن كىسىلەر مەن شيەتتەي بالا-شاعانىڭ قامىن قوسا ارقالاپ، تىلدا ەڭبەك ەتكەن جانداردىڭ ءبىرى ورجانوۆ تابىندى. بولاشاق ۇرپاققا بەيبىت ءومىر سىيلاعان ارداگەرلەرگە وبلىس باسشىسى جىلى لەبىزىن ءبىلدىردى.
«وسكەلەڭ ۇرپاق جاۋىنگەرلەر مەن تىل ەڭبەككەرلەرىنىڭ اۋىزبىرشىلىگى مەن ەرلىگى، ەرەكشە تاباندىلىعى مەن وتانعا دەگەن ىستىق سەزىمىنىڭ ارقاسىندا ۇلى جەڭىسكە قول جەتكىزگەنىمىزدى ءبىلۋى ءتيىس»، - دەدى ايماق باسشىسى.
ءوز كەزەگىندە، ارداگەرلەر مەن تىل ەڭبەككەرلەرى ەستەلىكتەرىن ايتىپ، ىزگى تىلەكتەرىن ءبىلدىردى.