الماتىدا «ايبوز» ۇلتتىق ادەبي سىيلىعىنىڭ جەڭىمپازدارىن ماراپاتتاۋ ءراسىمى ءوتتى. قازاقستان رەسپۋبليكاسى مادەنيەت جانە اقپارات مينيسترلىگى ۇيىمداستىرعان بايقاۋ بيىل ءۇشىنشى رەت وتكىزىلدى.
لاۋرەاتتاردى قۇتتىقتاعان مادەنيەت جانە اقپارات ءمينيسترى ايدا بالايەۆا قازاق ادەبيەتىنىڭ دامۋىنا قوسقان ۇلەستەرى ءۇشىن جازۋشىلارعا ريزاشىلىعىن ءبىلدىردى.
– «ايبوز» ادەبي سىيلىعى – ءسوز ونەرىنىڭ مايتالماندارىن دارىپتەيتىن، ولاردىڭ شىعارماشىلىعىن ەلگە تانىتاتىن ەرەكشە سىيلىق، – دەدى مينيستر.
سونداي-اق، ول مەملەكەت تاراپىنان رۋحانيات سالاسىنا ەرەكشە ءمان بەرىلىپ، ۇدايى قولداۋ كورسەتىلىپ جاتقانىن اتاپ ءوتتى.
– جىل سايىن جازۋشىلار وداعى الماتى قالاسى اكىمدىگىمەن بىرلەسىپ الماتىلىق 400 قالامگەرگە، استانا قالاسى اكىمدىگىمەن بىرلەسىپ استانالىق 80 قالامگەرگە قالا اكىمدەرىنىڭ گرانتتارى تابىستالۋدا. مينيسترلىك كىتاپ سالاسىندا دا جۇيەلى جۇمىستى جالعاستىرىپ كەلەدى. ماسەلەن، بيىل قوعامدىق ماڭىزى بار ادەبيەتتەردى ساتىپ الۋ باعدارلاماسىنا بويىنشا 52 اۆتورعا قالاماقى تولەندى. جاڭا كىتاپتار الداعى جىلى كوپشىلىك وقىرمانعا جول تارتادى. ال قايتا باسىپ شىعارۋ باعدارلاماسى بويىنشا 2023 جىل 134 كىتاپ جارىق كورسە، بيىل جىل سوڭىنا دەيىن 189 جاڭا كىتاپ ەل كىتاپحانالارىنا تاراتىلماق، – دەدى ايدا بالايەۆا.
بيىل مينيسترلىك قازاقستان جازۋشىلار وداعىمەن «ستراتەگيالىق ءارىپتeستىك» ورناتۋ بويىنشا ءۇش جاڭا جوبانى جۇزگە اسىردى:
جاس قالامگەرلەر «قازاقستاننىڭ ادەبي-تانىمدىق پانوراماسى» جوباسى نەگىزىندە ەلىمىزدىڭ وڭىرلەرىنە بارىپ، جاڭا شىعارمالار جازدى. جىل سوڭىنا دەيىن قازاق ادەبيەتىنە جيىرما جاڭا تۋىندى قوسىلىپ، ءار جاس قالامگەر 4 ملن تەڭگە كولەمىندە قالاماقى الادى؛جاس قالامگەرلەرگە ارنالعان «جازۋشىلاردىڭ شەبەرلىك مەكتەبى» ۇيىمداستىرىلىپ، وتاندىق جانە شەتەلدىك بەدەلدى قالامگەرلەردىڭ دارىستەرى مەن شەبەرلىك سىنىپتارى ءوتتى؛«تمد ەلدەرىنىڭ ارحيۆتەرىندەگى قازاقستاندىق جازۋشىلاردىڭ زەرتتەۋ جۇمىستارى» جوباسى ۇيىمداستىرىلدى.
2024 جىلى ءىلياس جانسۇگىروۆ، بەيىمبەت مايلين، ساكەن سەيفۋللين، ءابىش كەكىلبايەۆ، فاريزا وڭعارسىنوۆا، گەرولد بەلگەر سەكىلدى ءبىرقاتار قالامگەرلەردىڭ مەرەيتويلىق داتالارى كەڭ كولەمدە اتاپ ءوتىلدى.
سونىمەن قاتار، مەملەكەت باسشىسىنىڭ تاپسىرماسىمەن قازاقستاندا جاڭا مەرەكە – 23 ءساۋىر ۇلتتىق كىتاپ كۇنى بەلگىلەندى. وسىعان وراي مينيسترلىك «ۇلتتىق كىتاپ» بايقاۋىن جاريالادى.
مينيستر ادەبيەت سالاسىن قولداۋعا ارنالعان ءبىرقاتار ماڭىزدى باستامالارعا نازار اۋداردى. «ايبوز» سىيلىعىنان بولەك، جاس قالامگەرلەرگە ارنالعان پرەزيدەنتتىك ارناۋلى ادەبي سىيلىق، مادەنيەتارالىق جانە ەتنوسارالىق بىرلىكتى نىعايتۋعا ارنالعان ادەبيەت سالاسىنداعى سىيلىق، «دارىن» سەكىلدى ءبىرقاتار سىلىقتار مەن بايقاۋلار ۇيىمداستىرىلىپ كەلەدى.
بيىل مادەنيەت جانە اقپارات مينيسترلىگىنىڭ جانىنان جاس جازۋشىلارعا ارنالعان «القا» ادەبي كلۋبى قۇرىلدى. جاس جازۋشىلار ءىلياس جانسۇگىروۆتىڭ 130 جىلدىعى جانە بەردىبەك سوقپاقبايەۆتىڭ 100 جىلدىعىنا ارنالعان ادەبي تۋر وتكىزدى.
– مەملەكەت باسشىسى 2025 جىلدى «جۇمىسشى ماماندىقتارى جىلى» دەپ جاريالاعانى بەلگىلى. وسى ورايدا، دارىندى اۆتورلارعا قولداۋ كورسەتىپ، قوعامداعى ەڭبەك ماماندىقتارىنىڭ ماڭىزىن اشۋ ماقساتتىندا جاس قالامگەرلەرگە ارنالعان «ەرلىك پەن ەڭبەك داستانى» بايقاۋى جاريالانعانىن دا ايتا كەتكىم كەلەدى. مۇنىڭ ءبارى ۇلت ادەبيەتىن، قالامگەرلەر قاۋىمىن قولداۋعا باعىتتالعان كەشەندى جۇمىستاردىڭ ايقىن كورىنىسى دەپ بىلەمىز، – دەپ تۇيىندەدى ايدا بالايەۆا.
2024 جىلى «ايبوز» سىيلىعىنا 7 نوميناسيا بويىنشا 176 شىعارما اۆتورلارى ءوتىنىم بەردى: «ۇزدىك پروزا» – 57، «ۇزدىك پوەزيا» – 37، «ۇزدىك دراماتۋرگيا» – 16، «ۇزدىك ادەبي سىن» – 13، «ۇزدىك ادەبي اۋدارما» – 14، «ۇزدىك بالالار ادەبيەتى» – 31 جانە «ۇزدىك كوميكس» – 8 ءوتىنىم.
جاسىرىن داۋىس بەرۋ ناتيجەسى بويىنشا، تاۋەلسىز قازىلار القاسىنىڭ شەشىمىمەن «ماحامبەتتىڭ ءولىم جازاسى» رومانىنىڭ اۆتورى بەكەت قاراشين «ۇزدىك پروزا» نوميناسياسىنىڭ جەڭىمپازى اتاندى، «ۇزدىك پوەزيا» نوميناسياسىندا – «ايكوركەم» باللاداسىنىڭ اۆتورى مارالتاي رايىمبەك ۇلى جەڭىمپاز بولدى. «ۇزدىك دراماتۋرگيا» نوميناسياسىندا ەڭ كوپ داۋىس دۋمان رامازاننىڭ «ازىرەت سۇلتان» پەساسىنا بەرىلدى. «ۇزدىك ادەبي اۋدارما» نوميناسياسى بويىنشا راۋزا مۇسابايەۆا «تاڭ جۇلدىزى» جۇمىسىمەن جەڭىمپاز اتاندى. «ۇزدىك بالالار ادەبيەتى» نوميناسياسىندا توكەن الجانتەگىنىڭ «قىزىقتىڭ ءبارى اۋىلدا» شىعارماسى ۇزدىك دەپ تانىلدى. ال «ۇزدىك ادەبي سىن» نوميناسياسىندا جۇسىپبەك قورعاسبەكتىڭ «سايتاننىڭ ويىنى» ەڭبەگى ماراپاتقا يە بولدى. «ۇزدىك كوميكس» اۆتورى بولىپ جاقسىلىق سابيتوۆ «جوشى حان» جۇمىسىمەن تانىلدى.
ۇلتتىق ادەبي سىيلىقتىڭ جالپى جۇلدە قورى 35 ميلليون تەڭگەنى قۇرادى.
«ايبوز» – قازاقستان رەسپۋبليكاسى مادەنيەت جانە اقپارات مينيسترلىگى قۇرعان ۇلتتىق ادەبي سىيلىق، ول وتاندىق جازۋشىلاردى قولداۋ جانە ىنتالاندىرۋ ماقساتىندا بەرىلەدى.
