قازاقستاندا 2025 جىلى زاپاستاعى 915 وفيسەر اسكەري قىزمەتكە شاقىرىلادى. ق ر ۇكىمەتىنىڭ ءتيىستى قاۋلىسىنا پرەمەر-مينيستر ولجاس بەكتەنوۆ قول قويدى، دەپ حابارلايدى Ulys.

قۇجاتتىڭ ءماتىنى قازاقستان رەسپۋبليكاسى نورماتيۆتىك قۇقىقتىق اكتىلەرىنىڭ ەتالوندىق باقىلاۋ بانكىنىڭ پورتالىندا جاريالاندى.

«اسكەري قىزمەت جانە اسكەري قىزمەتشىلەردىڭ مارتەبەسى تۋرالى» قازاقستان رەسپۋبليكاسى زاڭىنىڭ 32-بابىنا سايكەس قازاقستان رەسپۋبليكاسىنىڭ ۇكىمەتى قاۋلى ەتەدى:

1. وسى قاۋلىعا قوسىمشاعا سايكەس ساندا وفيسەر قۇرامىنىڭ لاۋازىمدارىندا اسكەري قىزمەت وتكەرۋ ءۇشىن اسكەري قىزمەتكە جارامدى جانە ونى وتكەرمەگەن زاپاستاعى وفيسەرلەر زاڭنامادا بەلگىلەنگەن تارتىپپەن 2025 جىلى جيىرما ءتورت اي مەرزىمگە اسكەري قىزمەتكە شاقىرىلسىن.
2. وسى قاۋلى العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى»، - دەلىنگەن قاۋلى ماتىنىندە.

وعان سايكەس، 2025 جىلى اسكەري قىزمەتكە شاقىرىلۋعا جاتاتىن زاپاستاعى وفيسەرلەردىڭ سانى جاريالاندى: 

• ق ر قارۋلى كۇشتەرىنە – 700 زاپاستاعى وفيسەر،
• ق ر ۇلتتىق قاۋىپسىزدىك كوميتەتىنىڭ شەكارا قىزمەتىنە – 80،
• ق ر ىشكى ىستەر مينيسترلىگىنىڭ ۇلتتىق ۇلانىنا – 131،
• ق ر توتەنشە جاعدايلار مينيسترلىگىنە – 4.

قاۋلى العاشقى رەسمي جاريالانعان كۇنىنەن كەيىن كۇنتىزبەلىك 10 كۇن وتكەن سوڭ قولدانىسقا ەنگىزىلەدى.

كەلەسى جىلى مەرزىمدى اسكەري قىزمەتكە 18 بەن 27 جاس ارالىعىنداعى 41 706 جىگىتتى شاقىرۋ جوسپارلانىپ وتىر. قورعانىس مينيسترلىگى «اشىق نقا» پورتالىندا ءتيىستى قاۋلى جوباسىن جاريالادى، دەپ حابارلايدى Ulys.

قۇجاتقا سايكەس، 2025 جىلعى ناۋرىز-ماۋسىمدا جانە قىركۇيەك-جەلتوقساندا اسكەرگە شاقىرۋدى كەيىنگە قالدىرۋعا نەمەسە ودان بوساتىلۋعا قۇقىعى جوق 18 جاستان 27 جاسقا دەيىنگى 41 706 ەر-ازامات مەرزىمدى اسكەري قىزمەتكە شاقىرىلادى.

اسكەرگە شاقىرۋ پۋنكتەرى مەديسينالىق جۇمىستى قامتاماسىز ەتەدى. ال ىشكى ىستەر مينيسترلىگى اسكەرگە شاقىرىلاتىنداردى جيناۋ جانە اسكەرگە جونەلتۋ ورىندارىندا ىشكى ىستەر ورگاندارى قىزمەتكەرلەرىنىڭ كۇشەيتىلگەن كەزەكشىلىگىن ۇيىمداستىرادى.

قاۋلى جوباسى 13 جەلتوقسانعا دەيىن قوعام تالقىسىنا شىعارىلدى.

بىلتىر الماتىدا «اقكەنت» دەيتىن تۇرعىن ۇيدەن ءورت شىعىپ، ۇرەي بوي الدىرعان حالىق بالالارىن بيىكتەن جەردەگى توسەنىشكە لاقتىرعان بولاتىن. ەل ىشىندە وسى وقيعادان كەيىن ءورت سوندىرۋشىلەردىڭ قالانىڭ بيىك عيماراتتارىنداعى ءورتتى سوندىرۋگە قاۋقارسىز ەكەنى تۋرالى سىن كوپ ايتىلدى.

ال مينيسترلىك ءورت ءسوندىرۋ قىزمەتىنىڭ ماتەريالدىق-تەحنيكالىق بازاسىندا اۆتوباسپالداقتار بار ەكەنىن ايتتى. 
دەگەنمەن مينيسترلىك سول سىننان قورىتىندى شىعارىپ، زاماناۋي تەحنولوگيانىڭ جەتىستىكتەرىن ءورت ءسوندىرۋ قىزمەتىنە دە كىرىكتىرىپ جاتىر دەۋگە بولادى. مينيسترلىك ونداعان قاباتتىق بيىك عيماراتتارداعى ءورتتى ءسوندىرۋ ءۇشىن اۋەلى 2 درون ساتىپ الماقشى. پيلوتتىق جوبا ءوزىن اقتاپ جاتسا، استانادان بولەك الماتى جانە وزگە دە  بيىك عيماراتى كوپ قالالارعا وسى تاجىريبە تاراتىلماق.

بۇل دروندار قىتايدىڭ تەحنولوگياسىمەن جاسالعانىمەن، قازاقستاندا قۇراستىرىلادى. ياعني، تاپسىرىستى وتاندىق كومپانيا الادى. بىرەۋىنىڭ باعاسى 120 ملن تەڭگەدەن اسپايدى.
مينيسترلىك ماماندارى درون وزدىگىمەن سۋ الىپ ۇشپايتىنىن، ءورت ءسوندىرۋ كولىگىنىڭ سۋ شاشاتىن شلانگاسىن كوتەرىپ ۇشاتىنىن ايتادى. ياعني، بۇل دروندار وزدىگىنەن سۋ تاسىمايدى. ءورت ءسوندىرۋ كولىگىن تولىقتىراتىن قوسىمشا قىزمەت اتقارادى.

جالىپ تجم بيىل بيۋدجەت ەسەبىنەن 728 ارنايى تەحنيكا مەن 18 مىڭنان استام قۇرال-جابدىق ساتىپ الماقشى.