«بىزدە اتوم ەلەكتر ستانسياسىنىڭ ۇزدىكسىز جۇمىس ىستەۋىن، ونى ءقاۋىپسىز پايدالانۋدى قامتاماسىز ەتە الاتىن ماماندار بار ما؟ ەگەر ولاردى وقىتۋ جوسپاردا بار بولسا، قايدا وقىماق؟» دەگەن ساۋالدى ق ر ۇلتتىق يادرولىق ورتالىعىنىڭ باس ديرەكتورى ەرلان باتىربەكوۆكە قويدىق.
– تەك ق ر ۇلتتىق يادرولىق ورتالىعىن عانا مىسالعا الا وتىرىپ، ونىڭ ىرگەتاسىن قالاۋ كەزىندەگى نەگىزگى مىندەتتەردىڭ ءبىرى قازاقستان رەسپۋبليكاسىندا اتوم ەنەرگەتيكاسىن دامىتۋ ءۇشىن عىلىمي-تەحنيكالىق، تەحنولوگيالىق جانە كادرلىق بازا قۇرۋ بولعاندىعىن اتاپ كورسەتۋگە بولادى. ۇلتتىق يادرولىق ورتالىق اتوم سالاسى ءۇشىن كادر دايارلاۋ ماسەلەسىنە كوپ كوڭىل بولەدى. ءبىز ءوز قىزمەتىمىز بارىسىندا كوپتەگەن جوعارى بىلىكتى عىلىمي كادر دايارلادىق. كاسىپورىندا وڭىرلىك ۋنيۆەرسيتەتتەردىڭ ءبىتىرتىپ شىعاراتىن كافەدرالارىنىڭ فيليالدارى جۇمىس ىستەيدى. قىزمەتكەرلەر ءۇشىن ءوز قابىلەتىن جۇزەگە اسىرۋ ءۇشىن بارلىق قاجەتتى جاعداي جاسالعان، كادر دايارلاۋ جانە قايتا دايارلاۋ، ديسسەرتاسيانى وندىرىستەن قول ۇزبەي قورعاۋ جۇمىسى جولعا قويىلعان. كاسىپورىن باسشىلىعى مەن قىزمەتكەرلەرى PhD ديسسەرتاسيا قورعاۋ جونىندەگى 3 ديسسەرتاسيالىق كەڭەستىڭ تۇراقتى قۇرامىنا كىرەدى.
وسىلايشا، اەس جوباسىن پىسىقتاۋدى، سالۋ جۇمىستارىن، پايدالانۋدى جانە پايدالانۋدان شىعارۋدى عىلىمي سۇيەمەلدەۋ ماسەلەسى بويىنشا، جالپى العاندا، قاجەتتى كادرمەن قامتاماسىز ەتىلگەنبىز دەسەك تە بولادى.
جالپى الەمدىك تاجىريبەگە سايكەس اەس جۇمىسىن قامتاماسىز ەتەتىن پەرسونالدى جاساقتاۋ ءۇشىن 2 ەنەرگوبلوكتى اەس-تى پايدالانۋ كەزىندە ورتا ەسەپپەن جوعارى جانە ارناۋلى ورتا ءبىلىمى بار 2000 ادامعا دەيىنگى پەرسونال قاجەت. وسى پەرسونالدىڭ سالىستىرمالى تۇردەگى از بولىگى «يادرولىق» ماماندىقتار بويىنشا دايىندىقتان وتكەن تار شەڭبەرلى، ياعني بەلگىلى ءبىر سالانىڭ ماماندارى بولىپ سانالادى، بۇلار – يادرولىق رەاكتور مەن رەاكتورعا قاتىسى بار نەگىزگى جابدىقتاردىڭ جۇمىسىن باسقارىپ، باقىلايتىن ادامدار. قالعاندارى – جالپى بەيىندەگى ماماندار، ياعني ەنەرگەتيكتەر، حيميكتەر، ينجەنەرلەر، ەلەكتريكتەر جانە ت.ب. قالاي بولعاندا دا، اەس سالۋ تۋرالى شەشىم قابىلداۋ كەزىندە كادر دايارلاۋدىڭ ارنايى جوسپارى ىسكە اسىرىلادى جانە اەس سالۋ تۋرالى شەشىم قابىلداۋدان باستاپ، پايدالانۋعا بەرىلگەنگە دەيىنگى ۋاقىت ىشىندە، ال بۇل شامامەن 10 جىل، قاجەتتى پەرسونال ءتيىستى وقىتۋدان وتكىزىلەدى.
قازىرگى ۋاقىتتا ۇكىمەت مەملەكەت باسشىسىنىڭ تاپسىرماسى بويىنشا تەحنيكالىق جانە ينجەنەرلىك سالاداعى عىلىمي جانە ءبىلىم بەرۋ نەگىزىن كەڭەيتۋ بويىنشا ناقتى جۇمىسقا كىرىسىپ تە كەتتى جانە شەتەلدىك تەحنيكالىق جوو فيليالدارىن اشۋ، تەحنيكالىق ماماندىقتارعا ارنالعان گرانتتاردى ۇلعايتۋ جانە ت. ب. تۋرالى ناقتى شەشىم قابىلداۋ ساتىسىنا شىقتى.
