اتوم ەلەكتر ستانسياسى قۇرىلىسىنىڭ پايدالى تۇسىنىڭ ءبىرى – الەۋمەتتىك سالاداعى جاڭا سەرپىن. ارينە، نىسان سالىناتىن بولسا اسا قوماقتى قارجى، ساپالى تەحنولوگيا، مىقتى جوسپار قاجەت بولادى. ەلىمىزدەگى ساراپشىلاردىڭ پىكىرىنشە، اەس قىزمەتى قازاقستاننىڭ بارلىق جەرىنىڭ جانە اەس ورنالاسقان ءوڭىردىڭ ەكونوميكالىق وسۋىنە ىقپال ەتىپ، الەۋمەتتىك باعدارلامالاردى ازىرلەۋگە مۇمكىندىك اشادى.
اتوم ەلەكتر ستانسياسى – وتە ءىرى ءوندىرىس. ونىڭ سالىنىپ، جۇمىس باستاۋى تۇرعىنى جوق وڭىرلەردە جەرگىلىكتى حالىقتىڭ پايدا بولۋىنا ايتارلىقتاي اسەر ەتەدى. بۇل ۇدەرىس ەكونوميكالىق، الەۋمەتتىك، ەكولوگيالىق جانە ينفراقۇرىلىمدىق اسپەكتىلەرگە وڭ اسەر بەرۋى مۇمكىن. دەگەنمەن، اتوم ەلەكتر ستانسياسىنىڭ جۇمىسى تۇراقتى دامۋدىڭ كاتاليزاتورىنا اينالۋى ءۇشىن ەكونوميكالىق پايدا، الەۋمەتتىك مۇددە جانە قورشاعان ورتانى قورعاۋ اراسىنداعى تەپە-تەڭدىك قاجەت.
الەمدىك ستاتيستيكاعا سۇيەنسەك، اەس ارقىلى ەل ەكونوميكاسىندا جاقسى وزگەرىستەر مەن دامۋ بولادى. ءىرى ءوندىرىس ورىندارى سالىنادى، وندا قىزمەت ەتۋگە بىلىكتى ماماندار شاقىرىلىپ، حالىقتى جۇمىسپەن قامتامۋ ماسەلەسى دە قاتار جۇرەدى. سونىمەن قاتار، قازاقستانداعى ءبىلىم بەرۋ جانە عىلىمي باعدارلامالاردىڭ دامۋىنا ىقپال ەتەدى.
وسىلايشا، ەلدە ۇزاق مەرزىمدى الەۋمەتتىك وزگەرىستەر اكەلەتىن ينجەنەر-تەحنيك مامانداردى دايارلاۋ باعدارلامالارى قولعا الىنىپ، وقىتۋ الاڭدارى دا قۇرىلۋى مۇمكىن. بۇل سايىپ كەلگەندە حالىقتىڭ ءبىلىم دەڭگەيى مەن تەحنولوگيالىق مادەنيەتىن ارتتىرادى.
ينفراقۇرىلىمدىق وزگەرىس ادەتتە كولىك قولجەتىمدى بولعاندا، جولدار مەن ءوندىرىستىڭ جۇمىس ىستەۋىنە قاجەتتى باسقا دا نىسانداردى سالۋدان كورىنەدى. ارينە، بۇل دامۋ حالىقتىڭ ءومىر ءسۇرۋ ساپاسىن جاقسارتىپ قانا قويماي، قاۋىمداستىقتىڭ كورشىلەس وڭىرلەرمەن بايلانىسىن جاقسارتىپ، ەكونوميكالىق ءوزارا قارىم-قاتىناس كەزىندە جانە ساۋدادا جاڭا مۇمكىندىكتەر اشادى.
ەلەكتر ەنەرگياسىن ەكسپورتتاۋ ارقىلى مەملەكەت كىرىسىن ۇلعايتىپ جانە ەنەرگيا رەسۋرستارىنىڭ يمپورتىن قىسقارتا الادى. وسىلايشا ەل قورجىنىنا تۇسكەن قاراجاتتى دەنساۋلىق ساقتاۋ، ءبىلىم بەرۋ، تۇرعىن ءۇي جانە الەۋمەتتىك قورعاۋدى جاقسارتۋعا باعىتتاۋعا مۇمكىندىك بەرەدى.
جۇرگىزىلگەن زەرتتەۋلەر ناتيجەسى بويىنشا 1،5 مىڭعا جۋىق تۇرعىنى بار الماتى وبلىسى، جامبىل اۋدانى، ۇلكەن اۋىلىنىڭ ماڭىنداعى اۋماق اتوم ەلەكتر ستانسياسىن سالۋعا ەڭ قولايلى اۋماق رەتىندە تاڭدالدى.
– اتوم ەلەكتر ستانسياسىنىڭ سالىنۋى تۋرالى اڭگىمە 30 جىلدان بەرى پايدا ايتىلىپ كەلەدى. جاستار قالاعا قاراي اعىلاۋىن توقتاتادى دەگەن ۇمىتپەن كۇتتى، - دەپ جازادى مير 24 اقپاراتتىق-ساراپتامالىق ينتەرنەت-پورتالى..
قازاقستاندا اتوم ەلەكتر ستانسياسىن سالۋ تۋرالى شەشىم اعىمداعى جىلدىڭ 6 قازانىندا وتەتىن جالپىحالىقتىق رەفەرەندۋمدا قابىلدانادى. شەشىم وڭ بولسا، اەس قىزمەتى ەلىمىزدىڭ جانە ءوندىرىسى ورنالاسقان ايماقتىڭ ەكونوميكالىق وسۋىنە ىقپال ەتىپ، الەۋمەتتىك باعدارلامالاردى دامىتۋعا دا مۇمكىندىكتەر اشادى.
ابىلوۆا شالقار، ماڭعىستاۋ وبلىسى
