شىمكەنت قالالىق سوتىندا اكىمدىك عيماراتىنىڭ الدىندا قالا اكىمىنىڭ ورىنباسارى رۋسلان بەردەنوۆكە 5 رەت وق اتىپ، جارالادى دەگەن ايىپ تاعىلعان ەرنار جيەمباي سوڭعى ءسوز بەرىلدى. بۇل تۋرالى kursiv.media جازدى.
ايىپتالۋشى جيەمباي قالا اكىمىنىڭ ورىنباسارى رۋسلان بەردەنوۆكە وق اتقانىنا شىن وكىنەتىنىن، كىناسىن ءىشىنارا كەلىسەتىنىن جەتكىزدى.
جيەمبايدىڭ سوڭعى ءسوزى
«بۇل وقيعا وزدىگىنەن بولمادى. سەبەپسىزدەن سەبەپسىز بارىپ، تيىسپەگەن ادامعا قارۋىمدى الىپ قورقىتۋ ماقساتىندا وق اتقان جوقپىن. سوت تەرگەۋىندە بەرگەن جاۋابىمدى تولىق قۋاتتايمىن. جابىرلەنۋشى رۋسلان بەردەنوۆتەن كەشىرىم سۇرايمىن»، – دەدى ول.
جيەمبايدىڭ ايتۋىنشا، جارىسسوزدە بەردەنوۆكە كوپ سۇراق قويۋعا مۇمكىندىگى بولماعان. سول سەبەپتى تەك كەشىرىم سۇراۋمەن شەكتەلگەن.
«قالاي بولسا دا مەن ول كىسىنىڭ دەنساۋلىعىنا زيان كەلتىردىم. جارىسسوزدە ونلاين بايلانىس كەزىندە وتا جاساۋعا كەتەيىن دەپ تۇرعان ادامعا ارتىق ءسوز ايتپاي، تەك كەشىرىم سۇراۋمەن بولدىم. بەردەنوۆتىڭ «ەركەك بولساڭ ايەلىڭدى ارالاستىرماۋىڭ كەرەك ەدى» دەپ ارتىق اڭگىمە ايتىپ ۇلگەردى. بەردەنوۆ سوتتان ماعان ەڭ اسا اۋىر جازانى، قىلمىستىق كودەكستىڭ 99-بابىنىڭ 2-بولىگى 6-تارماعىمەن جازا تاعايىنداۋدى سۇرادى. وعان قوسا بۇل اتىلعان وق تەك ماعان ەمەس، مەملەكەتتىك ساياسي لاۋازىم يەلەرىنە قارسى اتىلعان وق دەپ ءىستى ساياسيلاندىرۋ ارەكەتىن جاساۋدا. ول دۇرىس ەمەس»، – دەدى جيەمباي.
جيەمبايدىڭ پىكىرىنشە، بەردەنوۆ ءوز وكىلەتتىلىگىن اسىرا پايدالانىپ، ايەلىنە قاتىستى، جەكە باسىنا، نامىسىنا تيەتىن سوزدەر ايتىپ، بالاعاتتاپ، ساياسي لاۋازىم يەسىنە لايىقتى ەمەس قىلىقتارىنىڭ ناتيجەسىندە وسى قىلمىس ورىن العان.
«مەن سوتتالايىن دەپ وتىرمىن. مەنىڭ مورالدىق شىعىنىمدى كىم وتەيدى. وتباسىمدى كىم اسىرايدى؟ مەن دە زارداپ شەگۋشى قاتارىندامىن. تاياقتىڭ ەكى ۇشى بار ەكەنىن ۇمىتپاۋ كەرەك. ەرنار جيەمباي رۋسلان بەردەنوۆتى نە ءۇشىن اتتى دەپ ەشكىم سۇراق قويمايدى. مەن اۋەلى وسى ءىستىڭ ساياسيلانۋىن قالامايمىن. بۇل مەملەكەتتىك قىزمەتكەردىڭ قىزمەتىنە قارسى جاسالعان ارەكەت ەمەس. ەكەۋمىزدىڭ ارامىزداعى جەكە ماسەلە»، – دەدى جيەمباي.
ول سوتتان «ادام ءولتىرۋ» بابىمەن جازا تاعايىنداماۋدى سۇرادى. سوتتان قىلمىستىق ءىس بويىنشا ىس-ارەكەتىن قىلمىستىق كودەكستىڭ 106-بابى 1-بولىگىمەن قايتا سارالاپ، وسى باپپەن كىنالى دەپ تانىپ، كىنانى ءىشىنارا مويىنداۋىنا بايلانىستى ەڭ تومەنگى باس بوستاندىعىنان ايىرمايتىن جازا تاعايىنداۋدى سۇرادى.
«بۇل ىسكە شىنايى وكىنەمىن. سىرتتا اتا-انام قالدى. اكەم اۋىرادى. وتباسىمدى اسىراۋشىلاردىڭ ءبىرى ەدىم. ايەلىممەن بىرگە ەكى ۇلىم قالدى. وتكەندە ۇلكەن ۇلىمنىڭ تۋعان كۇنى بولدى. بالاما قانداي سىيلىق بەرەيىك دەسە، «اكەمدى قايتارىڭدار» دەپ جىلاپ جاتىر ەكەن. مەن وسى نارسەلەردىڭ بارىنە وكىنىپ، ءتۇسىندىم. ۋاقىتتى كەرى اينالدىرسام، مۇنداي ارەكەتكە بارمايتىن ەدىم. زاڭ اياسىندا ءادىل جازا تاعايىنداۋىڭىزدى سۇرايمىن»، – دەدى ايىپتالۋشى.
سۋديا ءابينۇر قارابايەۆ كەڭەسۋ بولمەسىنە كەتتى. ول ۇكىم 20 تامىزدا شىعاتىنىن حابارلادى.
جيەمباي ادام ءولتىرۋ پيعىلى بولماعان، تاعىلعان ايىپتىڭ ءبارى ويدان شىعارىلعانىن مالىمدەگەن.
«سوتتىڭ ادىلدىگىنە سەنەمىن. ەگەر 11 جىلعا سوتتاۋ كەرەك بولسا قىلمىستىق كودەكستىڭ 106-بابىمەن («دەنساۋلىققا قاساقانا اۋىر زيان كەلتiرۋ» بابى – رەد.) سوتتاڭىزدار. بالا-شاعام ءوسىپ جاتىر. اكەم بىرەۋدى ولتىرۋگە وقتالعان ەكەن دەگەنىن قالامايمىن. مەيلى، باسقا باپپەن 15 جىلعا قاماپ تاستاڭىزدار. قارسى ەمەسپىن. ويتكەنى تىكەلەي ادام ولتىرۋگە پيعىلىم بولعان جوق»، – دەگەن ەدى جارىسسوزدە جيەمباي.
جيەمباي قاماۋدا وتىرعانىنا 4 اي بولعان. سوت تالقىلاۋىنىڭ سوڭعى وتىرىسىندا ونلاين رەجيمدە جاۋاپ بەرگەن جابىرلەنۋشى رۋسلان بەردەنوۆ ەرنار جيەمبايعا كەشىرىم بەرمەيتىنىن مالىمدەگەن.
جارىسسوزدە پروكۋرور سوتتان ايىپتالۋشىنى 11 جىل 3 ايعا باس بوستاندىعىنان ايىرۋدى سۇراعان. پروكۋروردىڭ ايىبىمەن ەكى تاراپ تا كەلىسپەگەن.
