مادەنيەت جانە سپورت مينيسترلىگى اباي قۇنانباي ۇلىنىڭ 175 جىلدىعىنا ارنالعان ءىس-شارالار تۋرالى باسپا ءسوز ءماسليحاتىن وتكىزدى. ھاكىمگە ارنالعان مەرەيتويدىڭ رەسمي تۇردە سالتاناتتى اشىلۋ ءراسىمى نۇر-سۇلتان قالاسىندا 21 قاڭتاردا وتەتىنى ءمالىم بولدى.
مادەنيەت جانە سپورت ۆيسە-مينيسترى نۇرعيسا داۋەشوۆتىڭ سوزىنشە، بيىل قازاق حالقىنىڭ ۇلى اقىنى، اعارتۋشى اباي قۇنانباي ۇلىنىڭ 175 جىلدىق مەرەيتويىن جوعارى ۇيىمداستىرۋشىلىق جانە مازمۇندىق دەڭگەيدە مەرەكەلەۋدى قامتاماسىز ەتۋ ماقساتىندا ارنايى مەملەكەتتىك كوميسسيانىڭ قۇرامى بەكىتىلىپ، پرەزيدەنتتىڭ پارمەنى بەرىلگەن. مەرەيتويدى دايىنداۋ جانە وتكىزۋ جونىندەگى جالپىرەسپۋبليكالىق جوسپارى 82 تارماقتى قامتيدى. ونىڭ ىشىندە ءىرى حالىقارالىق جانە رەسپۋبليكالىق قوعامدىق ماڭىزى بار، عىلىمي، اعارتۋشىلىق ءىس-شارالار، كونفەرەنسيالار، سيمپوزيۋمدار، پلەنەرلەر، دوڭگەلەك ۇستەلدەر، سىنىپ ساعاتتار، پوەتيكالىق جانە ادەبي كونكۋرستار، باسپا ءسوز تۋرلارى جانە وزگە دە ءىس-شارالار بار.
سونىمەن قاتار وبلىستار، رەسپۋبليكالىق ماڭىزى بار قالالار مەن استانا اكىمدىكتەرى، مەرەكەلەۋدىڭ وڭىرلىك جوسپارلارىن ازىرلەدى.
«ماڭىزدى جوبالاردىڭ ءبىرى – اباي شىعارمالارىنىڭ جيناعىن شەتەلدىڭ 10 تىلىنە اۋدارۋ جانە شىعارۋ، ابايدىڭ ءومىرى، شىعارماشىلىعى، مۇراسى مەن ءرولى تۋرالى ءۇش دەرەكتى-قويىلىمدىق فيلمدەردى شىعارۋ»،-دەگەن نۇرعيسا داۋەشوۆ تامىز ايىندا سەمەي قالاسىندا «اباي مۇراسى جانە الەمدىك رۋحانيات» اتتى حالىقارالىق عىلىمي-پراكتيكالىق كونفەرەنسيا وتكىزىلەدى. كونفەرەنسياعا بەلگىلى وتاندىق جانە شەتەلدىك ابايتانۋشى عالىمدار، عىلىمي-شىعارماشىلىق زيالى قاۋىم وكىلدەرى شاقىرىلاتىنىنا توقتالدى.
ونىڭ سوزىنشە، مەرەيتوي اياسىندا ابايدىڭ «جيدەباي-بورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىن مۋزەەفيكاسيالاندىرۋ جانە اقىن ەسىمىمەن بايلانىستى تاريحي-مادەني مۇرا وبەكتىلەرىنە عىلىمي-رەستاۆراسيالاۋ جۇمىستارىن جۇرگىزۋ قاراستىرىلعان.
بارلىق وقۋ ورىندارىندا ابايدىڭ ولەڭدەرىن جانە قاراسوزدەرىن مانەرلەپ وقۋ جانە مازمۇنداۋ بويىنشا اشىق ساباقتار مەن تاقىرىپتىق شىعارما بايقاۋلارى وتكىزىلەدى. رەسپۋبليكانىڭ بارلىق ايماقتارىندا وقۋشىلار ءۇشىن «اباي جەرىنە ساياحات» اتتى اباي جەرلەرىنە ەكسكۋرسيالىق تۋرلار قاراستىرىلعان.
جوعارى وقۋ ورىندارىندا عىلىمي كونفەرەنسيالار، اباي وقۋلارى، سيمپوزيۋمدار، پوەتيكالىق جانە ادەبي فەستيۆالدەر، پوەزيا كەشتەرى، اباي ولەڭدەرىن ۇزدىك وقۋ، اندەرىن ورىنداۋ جانە شىعارماشىلىعىن ءبىلۋ بويىنشا سەمينارلار مەن كونكۋرستار جوسپارلانۋدا. ل.ن. گۋميليەۆ اتىنداعى ەۇۋ جانىنان «اباي اكادەمياسى» عىلىمي-زەرتتەۋ ينستيتۋتى قۇرىلدى.
«ءاربىر قازاقستاندىق ابايدىڭ شىعارمالارى بويىنشا جالپىۇلتتىق ديكتانتقا قاتىسا الادى. سونىمەن قاتار، مەرەيتوي اياسىندا بارلىق مادەنيەت جانە سپورت ۇيىمدارىندا ادەبي وقۋلار، تاقىرىپتىق ءىس-شارالار، ۇلتتىق سپورت تۇرلەرى بويىنشا سپورتتىق جارىستار، شىعارماشىلىق كەشتەر، فەستيۆالدەر، اسكەري بولىمدەردە بەلگىلى اقىن جازۋشىلار، ابايتانۋشى عالىمداردىڭ قاتىسۋىمەن سالتاناتتى ءىس-شارالار جانە ت.ب. وتكىزىلەدى»،-دەدى مادەنيەت جانە سپورت ۆيسە-مينيسترى.
