بۇگىن اقوردا رەزيدەنسياسىندا قازاقستان پرەزيدەنتىنىڭ باسپا ءسوز حاتشىسى بەرىك ءۋالي مەملەكەت باسشىسى قاسىم-جومارت توقايەۆتىڭ پرەزيدەنت لاۋازىمىنا كىرىسكەن ساتتەن بەرگى اتقارعان جۇمىسىن قورىتىندىلاۋعا ارنالعان ارنايى بريفينگ وتكىزدى. 100-گە جۋىق رەسپۋبليكالىق بۇقارالىق اقپارات قۇرالدارىنىڭ وكىلدەرى قاتىسقان جيىندا پرەزيدەنت قاسىم-جومارت توقايەۆتىڭ بيىلعى 9 ايدا اتقارعان جۇمىسىنا قىسقاشا شولۋ جاسالدى.
قازاقستان پرەزيدەنتى باسپا ءسوز حاتشىسى بەرىك ءۋاليدىڭ ايتۋىنشا، شىمىلدىعى جابىلاتىن جىل ەل جىلناماسىندا ايتۋلى وقيعالارىمەن ەستە قالدى. بۇل، ەڭ الدىمەن، ەگەمەن ەلىمىزدىڭ قالىپتاسىپ، دامۋىنا زور ەڭبەك سىڭىرگەن قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ ەل باسقارۋ تىزگىنىن قاسىم-جومارت توقايەۆقا تاپسىرعان ساتتەن باستاۋ الادى. ودان كەيىنگى ەلىمىزدىڭ ساياسي ومىرىندە ماڭىزى زور وقيعا – پرەزيدەنت سايلاۋى. بيلىكتىڭ اۋىسۋى، سايلاۋ ناۋقانى اتا زاڭىمىزعا سايكەس جۇزەگە اسىرىلدى. قاسىم-جومارت كەمەل ۇلى حالىق الدىندا انت بەرگەننەن كەيىن مەملەكەت باسشىسى رەتىندە بىردەن جۇمىسقا بىلەك سىبانا كىرىسىپ كەتتى. ەلىمىزدىڭ بۇكىل ءوڭىرىن ارالاپ، حالىقتىڭ الەۋمەتتىك-ەكونوميكالىق احۋالىمەن تانىستى. كوپتەگەن حالىقارالىق كەزدەسۋلەر وتكىزدى، شەت ەلدەرگە ساپارلارمەن بارىپ، ماڭىزدى كەلىسسوزدەر جۇرگىزدى.
بيىل مەملەكەت باسشىسىنىڭ قاتىسۋىمەن جالپى 463 ءىس-شارا ءوتتى. ونىڭ ىشىندە ەلىمىزدىڭ ايماقتارىنا 25 رەت جۇمىس ساپارىمەن باردى، 249 قابىلداۋ وتكىزدى. 31 ەلدىڭ باسشىلارىمەن تەلەفون ارقىلى سويلەستى.
قاسىم-جومارت كەمەل ۇلى 12 ەلگە ساپارمەن باردى. مەملەكەت باسشىسى 9 حالىقارالىق جيىنعا قاتىستى. قازاقستان پرەزيدەنتى قاسىم-جومارت توقايەۆ حالىقارالىق جانە وڭىرلىك قاۋىپسىزدىكتى قامتاماسىز ەتۋ، مەملەكەتارالىق بايلانىستار مەن ءوزارا ىنتىماقتاستىقتى نىعايتۋ ماقساتىندا 100-گە جۋىق حالىقارالىق كەزدەسۋ وتكىزدى. مەملەكەت باسشىسى 23 شەتەلدىك ەلشىدەن سەنىم گراموتالارىن قابىلداپ، قازاقستاننىڭ شەت ەلدەردەگى 30 ەلشءىسىن تاعايىندادى. سونىمەن قاتار قازاقستاننىڭ 6 مەملەكەتتەگى ديپلوماتيالىق ميسسيالارى ەلشىلىك رەتىندە قايتا قۇرىلدى.
جالپى بيىلعى 20 ناۋرىزدان بەرى 45 زاڭعا، 226 جارلىققا، 68 وكىمگە قول قويىلدى. پرەزيدەنتتىڭ قاتىسۋىمەن وتكەن جيىندار بويىنشا 49 حاتتاما تولتىرىلدى.
جالپى پرەزيدەنت بيىلعى 9 ايدا 112 796 شاقىرىم جول ءجۇردى. وعان 181 ساعات 36 مينۋت ۋاقىت كەتكەن.
ق ر پرەزيدەنتى اكىمشىلىگىنىڭ وتىنىشتەردى قاراۋدى باقىلاۋ ءبولىمى مەن پرەزيدەنتتىڭ ۆيرتۋالدى قابىلداۋىنا ازاماتتاردان 1 تامىزدان بەرى 15 669 ءوتىنىش كەلىپ تۇسكەن، ونىڭ 4025ء-ى پرەزيدەنتتىڭ ۆيرتۋالدى قابىلداۋى ارقىلى قابىلدانعان. وسىلاردىڭ بارىنە ۋاقتىلى ءارى ءتيىستى جاۋاپ بەرىلدى. بۇل قاسىم-جومارت كەمەل ۇلىنىڭ «حالىق ۇنىنە قۇلاق اساتىن مەملەكەت» تۇجىرىمداماسىنىڭ ورىندالىپ جاتقانىن دالەلدەپ، حالقىمىزدىڭ ءال-اۋقاتىن ارتتىرۋ ماقساتىندا ماڭىزدى باستامالار قولعا الىنعانىن كورسەتەدى. اتاپ ايتقاندا، قوعامدىق سانانى جاڭعىرتۋعا ارنالعان ۇلتتىق قوعامدىق سەنىم كەڭەسى قۇرىلدى.
بۇدان بولەك، قيىن جاعدايعا تاپ بولعان وتباسىلارعا /كوپ بالالى وتباسىلار، مۇگەدەك بالالارى بار وتباسىلار، جەتىم بالالار جانە ت.ب./ الەۋمەتتىك كومەك كورسەتۋ ماقساتىندا 500 مىڭنان استام ازاماتتىڭ، 300 مىڭ تەڭگەگە دەيىنگى نەسيەلىك قارىزى مەن ۇستەمە تولەمدەرى كەشىرىلدى. بۇل جالپى العاندا 107 ملرد تەڭگەنى قۇرادى.
سونىمەن قاتار سيرياداعى وتانداستارىمىزدى قاقتىعىس الاڭىنان الىپ شىعۋ ماقساتىندا قولعا الىنعان «جۋسان» وپەراسيالارى ءساتتى ىسكە اسىرىلدى.
قازاقستان پرەزيدەنتى جالپى حالىقارالىق ساپارلارى بارىسىندا شەتەلدىك مەملەكەت باسشىلارىمەن بىرلەسىپ 8 بريفينگ جانە 3 باسپا ءسوز ءماسليحاتىن وتكىزدى. ونىڭ وتاندىق جانە شەتەلدىك بۇقارالىق اقپارات قۇرالدارىنىڭ وكىلدەرىنە بەرگەن 16 سۇحباتى جاريالاندى.
قاسىم-جومارت كەمەل ۇلىنىڭ پرەزيدەنتتىك لاۋازىمداعى قىزمەتى، اتقارىپ جاتقان جۇمىستارى تۋرالى جالپى 26 دەرەكتى فيلم ءتۇسىرىلىپ، ولار رەسپۋبليكالىق تەلەارنالاردا كورسەتىلدى.
مەملەكەت باسشىسى تۆيتتەر الەۋمەتتىك جەلىسىن 2011 جىلدان بەرى بەلسەندى قولدانىپ كەلەدى. مەملەكەت باسشىسىنىڭ تۆيتتەرىندە 137 مىڭ وقىرمانى بار. بيىل ەلىمىزدەگى وزەكتى ماسەلەلەرگە، قوعامدا بولىپ جاتقان ءتۇرلى وقيعالارعا قاتىستى ءۇش تىلدە /قازاق، ورىس، اعىلشىن/ 862 تۆيت جاريالاندى.
ءساۋىر ايىندا عانا اشىلعان قاسىم-جومارت كەمەل ۇلىنىڭ ينستاگرام جەلىسىندەگى پاراقشاسىنا ميلليونعا جۋىق /955 مىڭ/ جازىلۋشى تىركەلگەن. بۇگىنگە دەيىن 60 پوست جاريالاندى. جيىن سوڭىندا ۇلتتىق جۋرناليستيكانى دامىتۋعا سونداي-اق ەلدە جۇرگىزىلىپ جاتقان رەفورمانى ناسيحاتتاۋعا ەلەۋلى ۇلەس قوسقانى ءۇشىن ءبىرقاتار جۋرناليستەر ق ر پرەزيدەنتى قاسىم-جومارت توقايەۆتىڭ العىس حاتىمەن ماراپاتتالدى.
سۋرەتتەر بەرىك ءۋاليدىڭ فەيسبۋك پاراقشاسىنان الىندى.
