بۇگىن پرەمەر-مينيستر ولجاس بەكتەنوۆتىڭ توراعالىعىمەن اكتيۆتەردى قايتارۋ ماسەلەلەرى جونىندەگى كوميسسيانىڭ كەزەكتى وتىرىسى بولدى، دەپ حابارلايدى ۇكىمەتتىڭ باسپا ءسوز قىزمەتى.
وتىرىس قورىتىندىسىنا سايكەس كوميسسيا ءبىرقاتار شەشىم قابىلدادى. جالپى كولەمى 85 ملرد تەڭگەدەن اساتىن زاڭسىز يەمدەنىلگەن اكتيۆتەردى قايتارۋ تۋرالى كەلىسىمدەر ماقۇلداندى. مەملەكەتكە قايتارۋ جوسپارلانىپ وتىرعان اكتيۆتەردىڭ قاتارىندا قازاقستانداعى جانە شەتەلدەگى تۇرعىن ۇيلەر، اكىمشىلىك عيماراتتار، اقشالاي قاراجات، كومپانيالارداعى ۇلەستەر، قىمبات زەرگەرلىك بۇيىمدار، 10 مىڭ گەكتاردان استام جەر بار.
سونىمەن قاتار بۇرىن مەملەكەتتەن «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ سۋبەكتىلەرىنىڭ ءبىرىنىڭ باقىلاۋىنا زاڭسىز وتكەن قۇنى 10 ملرد تەڭگەدەن استام سوماعا باعالاناتىن پايدا بولۋى تۇسىنىكسىز كاسىپورىندى اكتيۆ رەتىندە مەملەكەت كىرىسىنە اينالدىرۋ تۋرالى سوتقا تالاپ-ارىز ەنگىزۋ ماقۇلداندى.
كوميسسيا شەشىمىمەن زاڭ سۋبەكتىلەرىنىڭ ءتىزىلىمى ەكى جاڭا تۇلعامەن تولىقتىرىلدى، ولارعا قاتىستى باس پروكۋراتۋرانىڭ اكتيۆتەردى قايتارۋ جونىندەگى كوميتەتى ءتيىستى ءىس-شارالار قابىلدايدى.
«مەملەكەت باسشىسىنىڭ تاپسىرماسى بويىنشا زاڭسىز يەمدەنىلگەن اكتيۆتەردى قايتارۋ جونىندەگى جۇمىستار كۇشەيتىلەدى. بۇل رەتتە بيزنەسكە قىسىم جاساۋعا جول بەرىلمەيدى. مەملەكەتكە قايتارىلعان بارلىق اكتيۆتەر الەۋمەتتىك پايدالى ماقساتتارعا باعىتتالاتىن بولادى»، - دەپ اتاپ ءوتتى ولجاس بەكتەنوۆ.
كوميسسيانىڭ جۇمىسى جالعاسىپ جاتىر.
ايتا كەتسەك، كوميسسيا وتىرىسى جاڭارتىلعان قۇرامدا ءوتتى. كوميسسيانىڭ قۇرامىنا «قازاقستاننىڭ ازاماتتىق اليانسى» زتب پرەزيدەنتى بانۋ نۇرعازييەۆا مەن پارلامەنت ءماجىلىسىنىڭ دەپۋتاتى مارات ءباشىموۆ كىردى.
