قازاقستان ۇلتتىق بانكى «7-20-25» يپوتەكالىق تۇرعىن ءۇي كرەديتتەۋ باعدارلاماسىن بەكىتۋ تۋرالى» قاۋلىعا وزگەرىستەر ەنگىزدى، دەپ حابارلايدى Ulys.
وزگەرىستەر ۇلتتىق بانكتىڭ 2024 جىلعى 30 قازانداعى № 65 باسقارما قاۋلىسىمەن ەنگىزىلەدى، وندا:
- 2025 جىلى باعدارلامانى قارجىلاندىرۋدىڭ جىلدىق كولەمى 100 ملرد تەڭگەگە دەيىن بەلگىلەۋ؛
«7-20-25» باعدارلاماسى بويىنشا الىنعان قارىزدىڭ نەگىزگى بورىشى مەن سىياقىسى بويىنشا مەرزىمدى اسكەري قىزمەتتى وتكەرۋ مەرزىمىن جانە ول اياقتالعاننان كەيىن 60 كۇن كىرەتىن كەزەڭگە مەرزىمدى اسكەري قىزمەتتىڭ اسكەري قىزمەتشىلەرى ءۇشىن تولەم مەرزىمىن كەيىنگە قالدىرۋدى ەنگىزۋ؛
- 2025 جىلعى 1 قاڭتاردان باستاپ ءاربىر وتباسى مۇشەسىنە پايدالى اۋدانى 15 شارشى مەتردەن كەم جاتاقحانالارداعى بولمەلەردى، سونداي-اق قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن اپات جاعدايىندا دەپ تانىلعان تۇرعىن ۇيلەردى قوسپاعاندا، قازاقستان رەسپۋبليكاسىنىڭ اۋماعىندا سوڭعى 18 اي ىشىندە قارىز الۋشىنىڭ (جانە جۇبايىنىڭ/زايىبىنىڭ) مەنشىك قۇقىعىندا تۇرعىن ءۇيىنىڭ بولماۋى تۋرالى تالاپتى ەنگىزۋ كوزدەلەدى.
بۇل نورمالار حالىقتى، اسىرەسە، باسپاناعا مۇقتاج ازاماتتاردى مەيىلىنشە كوبىرەك قامتۋ ماقساتىندا، سونداي-اق مەرزىمدى اسكەري قىزمەتتىڭ اسكەري قىزمەتشىلەرى ءۇشىن بانكتىك قارىز شارتتارى بويىنشا نەگىزگى بورىش پەن سىياقى بويىنشا تولەم مەرزىمىن كەيىنگە قالدىرۋدى كوزدەيتىن زاڭناماداعى وزگەرىستەرگە سايكەس ەنگىزىلەدى.
باعدارلاما اياسىندا بەرىلەتىن يپوتەكالىق تۇرعىن ءۇي قارىزدارىنىڭ پارامەترلەرى (باستاپقى جارنانىڭ ەڭ تومەنگى مولشەرى، قارىزدىڭ ەڭ جوعارى سوماسى، سىياقى مولشەرلەمەسى، قارىز مەرزىمى، وڭىرلەر بولىنىسىندە ساتىپ الىناتىن تۇرعىن ءۇيدىڭ ەڭ جوعارى قۇنى جانە ت.ب.) وزگەرىسسىز قالادى.
باعدارلاما جۇمىس ىستەيتىن ازاماتتاردى 20%-دان باستالاتىن باستاپقى جارناسى كەزىندە جىلدىق 7% جەڭىلدىكتى مولشەرلەمە بويىنشا 25 جىلعا دەيىنگى مەرزىمگە قولجەتىمدى يپوتەكامەن قامتاماسىز ەتۋ ءۇشىن 2018 جىلى ىسكە قوسىلدى.
