تۇركيادا مەملەكەتتىك توڭكەرىس بولۋى مۇمكىن. وسىعان بايلانىستى ەل پرەزيدەنتى رەجەپ تايىپ ەردوعان تۇركيانىڭ بارلاۋ جانە ادىلەت مينيسترلىگىنىڭ باسشىلارىمەن شۇعىل وتىرىس وتكىزدى، دەپ حابارلايدى Ulys تۇركيالىق باسىلىمدارعا سىلتەمە جاساپ.

تۇرىك ۇلتشىلدارىنىڭ جەتەكشىسى ديەۆلەت باحچەلي2016 جىلدىڭ شىلدەسىندە ەلدى دۇرلىكتىرگەن مەملەكەتتىك توڭكەرىس قايتالانۋى مۇمكىن ەكەنىن ەسكەرتتى.

ءبىر كۇن بۇرىن انكارا باس پروكۋراتۋراسى "ايحان بورا كاپلان" قىلمىستىق ۇيىمىنا قاتىسى بار دەگەن كۇدىكپەن  ءۇش پوليسەيگە قاتىستى تەرگەۋ باستادى. ولاردىڭ ۇيلەرىندە ءتىنتۋ جۇرگىزىلدى.

Türkiye گازەتى ءوز كەزەگىندە "ايحان بورا كاپلان" ۇيىمىمەن بايلانىستا بولدى دەپ ايىپتالعان انكارا قاۋىپسىزدىك باسقارماسىندا ءبىرقاتار پوليسيا قىزمەتكەرلەرىنىڭ جۇمىستان شىعارىلۋىنا بايلانىستى تۇركيادا ۇلكەن قارسىلىق كورسەتىلگەنىن جازادى. ولاردىڭ ۇيلەرىندە سيفرلىق ماتەريالداردى الۋ ماقساتىندا ءتىنتۋ جۇرگىزىلدى.

"پرەزيدەنت ەردوعان ادىلەت ءمينيسترى يىلماز تۋندجمەن جانە ۇلتتىق بارلاۋ ۇيىمىنىڭ باسشىسى يبراگيم كالىنمەن باحچەليدىڭ مالىمدەمەسىنەن كەيىن مەملەكەت باسشىسىنىڭ رەزيدەنسياسىندا شۇعىل تۇنگى وتىرىس وتكىزدى"، — دەپ جازادى Türkiye.

ەردوعان ەل پارلامەنتىندە ءسوز سويلەيدى دەپ كۇتىلۋدە.

اقش-تىڭ وكىلدەر پالاتاسى تۇركيانىڭ دەموكراتيالىق ستاتۋسىن قايتا قاراۋعا جانە ونى ەۋروپانىڭ ەمەس، تاياۋ شىعىستىڭ ەلى دەپ تانۋعا باعىتتالعان ارنايى زاڭ جوباسىن قاراۋعا الدى. بۇل تۋرالى Fox News حابارلادى.

زاڭ تۇركيانى ەۋروپا مەن ەۋرازيا ىستەرى جونىندەگى بيۋروسىنىڭ قۇزىرىنان الىپ تاستاپ، ونى تاياۋ شىعىس ىستەرى جونىندەگى بيۋروعا اۋىستىرۋدى قاراستىرادى.

Fox News حابارلاۋىنشا، مۇنداعى ماقسات "اقش-تىڭ جاۋى سانالاتىن ەلدەرمەن بايلانىس جاسايتىن تۇركيانى توسقاۋىلداپ ۇستاۋعا تالاپتانۋ". ۆاشينگتون انكارانى "اقش پەن ناتو وداقتاستارىنان الىستاپ بارا جاتقان مەملەكەت" دەپ ەسەپتەيدى.

"بۇل ۇكىمەت حاماس سودىرلارىن جاسىرىپ وتىر. ەكونوميكالىق وداقتاستىق ارقىلى ءپۋتيننىڭ اسكەري ماشيناسىنا قولداۋ كورسەتەدى. سونىمەن بىرگە، باتىس وداقتاسىنان ارتىقشىلىق تالاپ ەتۋىن جالعاستىرا وتىرىپ، ناتو-نىڭ بىرلىگىنە كەدەرگى كەلتىرەدى. امەريكالىق ديپلوماتيا كوزبوياۋشىلىق جاساۋىن دوعارىپ، تۇركيانى بۇرىنعىداي ەۋروپانىڭ ءبىر بولىگى دەپ ساناۋىن قويۋى كەرەك"، – دەدى جوبانى كونگرەسس قاراۋىنا ەنگىزگەن توپتى باسقاراتىن كونگرەسسمەن برەد شنايدەر.

بۇل ۇستانىمعا تۇركيا ۇكىمەتى نارازىلىعىن ءبىلدىردى جانە تۇرىكتىڭ سىرتقى ساياساتى مەن ەۋروپالىق باعدارىن كونگرەسس مۇشەلەرىنىڭ دۇرىس تۇسىنبەي وتىرعانىنا نۇسقادى.

ايتا كەتسەك، تۇركيا – ناتو-نىڭ اقش-تان كەيىنگى ەڭ قۋاتتى مۇشەسى. 

كەشە كەشكىسىن تۇركيا انكاراداعى TUSAŞ اەروعارىش كومپانياسى شتاب-پاتەرىنىڭ ماڭىندا قاتتى جارىلىس بولعان. بۇل تۋرالى انادولى اگەنتتىگى حابارلادى. 

تۇركيا ءىىم جارىلىستان قازا تاپقاندار مەن جارالانعاندار بارىن ايتادى. ال ەل بيلىگى وقيعانى "تەراكت" دەپ اتادى. 

تۇركيانىڭ ىشكى ىستەر ءمينيسترى الي يەرليكايا حابارلاۋىنشا،  تەراكت سالدارىنان 5 ادام قازا تاۋىپ، تاعى 22 ادام جاراقات العانى ايتىلعان.

شابۋىلدى جاساعان ەكى لاڭكەس ءولتىرىلدى. لاڭكەستەردىڭ ءبىرى ايەل.