مەملەكەت باسشىسى سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اسحات جۇماعاليدى قابىلدادى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنتكە سىبايلاس جەمقورلىققا قارسى ءىس-قيمىل اگەنتتىگىنىڭ ەلىمىزدە قابىلداعان شارالارى تۋرالى ەسەپ بەرىلدى.
قاسىم-جومارت توقايەۆقا انتيكور قىزمەتىنىڭ بيىلعى جوسپارى، سونىڭ ىشىندە «زاڭ مەن ءتارتىپ» قاعيداتىن ىسكە اسىرۋ جونىندەگى نەگىزگى مىندەتتەرى تانىستىرىلدى.
اسحات جۇماعاليدىڭ ايتۋىنشا، بىلتىر 1641 جەمقورلىققا قاتىستى قىلمىس تىركەلىپ، جۇيەلى تۇردە جەمقورلىق جاساۋدىڭ 68 فاكتىسى انىقتالعان. ەكى ۇيىمداسقان قىلمىستىق توپتىڭ ارەكەتى اشكەرەلەنىپ، سونىمەن قاتار ەكى توپقا ۇكىم شىعارىلعان. سىبايلاس جەمقورلىققا جول بەرگەن 1493 ادام ۇستالدى. ولاردىڭ ىشىندە ءتۇرلى دەڭگەيدەگى 229 باسشى بار. 914 ادام سوتتالدى.
اگەنتتىك 2022 جىلدان بەرى مەملەكەتكە جالپى سوماسى 1،12 تريلليون تەڭگەگە باعالانعان مۇلىكتىك اكتيۆتەر مەن قاراجاتتىڭ قايتارىلۋىن قامتاماسىز ەتكەن. بىلتىر سوماسى 486،5 ميلليارد تەڭگە بولاتىن مۇلىكتىك اكتيۆتەر مەن قاراجات قايتارىلعان.
پرەزيدەنتكە ۆەدومستۆونىڭ مەملەكەتتىك ساتىپ الۋ مەن قارجىنىڭ ماقساتتى يگەرىلۋىنە مونيتورينگ جۇرگىزىپ، 87،7 ميلليارد تەڭگەنىڭ ءتيىمسىز جۇمسالۋىنا جول بەرمەگەنى جونىندە ايتىلدى. ماڭىزدى ينفراقۇرىلىمدىق جانە الەۋمەتتىك جوبالاردىڭ قۇرىلىسىن باقىلاۋ جۇمىستارى جالعاسىپ جاتىر. اگەنتتىكتىڭ قاداعالاۋىندا 182 نىسان بار، ونىڭ ىشىندە 81 قۇرىلىستىڭ جۇمىسى اياقتالعان.
سىبايلاس جەمقورلىققا قارسى قىزمەتتىڭ باسشىسى پرەزيدەنت تاپسىرمالارىنىڭ ورىندالۋى جايىندا باياندادى. اتاپ ايتقاندا، جول سالاسىنداعى جەمقورلىقتى جويۋ ءۇشىن تالداۋ جۇرگىزىلىپ، ۋاكىلەتتى ورگاندارعا ءبىرقاتار ۇسىنىم بەرىلدى. اگەنتتىك قىزمەتكەرلەرىنەن ارنايى قۇرىلعان توپتار وڭىرلەردەگى جول قۇرىلىسى مەن جوندەۋ جۇمىستارىنا مونيتورينگ جۇرگىزىپ جاتىر. باقىلاۋعا الىنعان 258 جوبانىڭ جالپى ۇزىندىعى 1،8 مىڭ شاقىرىم بولاتىن 119 ۋچاسكەسى پايدالانۋعا بەرىلىپ، ولاردا انىقتالعان اقاۋدىڭ 95 پايىزى رەتكە كەلتىرىلدى.
«سيفرلىق تەڭگە» پلاتفورماسىندا «اقشانى بوياۋ» پيلوتتىق جوباسى ىسكە اسىرىلۋدا. بۇل تەتىك اۋىل شارۋاشىلىعى مەن جول سالالارىنىڭ جەكەلەگەن باعىتتارىندا قولدانىلىپ جاتىر. كەيىننەن ونى سيفرلىق جۇيەمەن بىرگە بيۋدجەت قارجىسىن جۇمساۋدىڭ بارلىق كەزەڭىنە ەنگىزۋ جوسپارلانعان.
بۇدان بولەك، مەديسينا، سپورت جانە الەۋمەتتىك قولداۋ سالالارىندا سىبايلاس جەمقورلىق تاۋەكەلدەرىنە سىرتقى تالداۋ جۇمىستارى اياقتالدى.
قاسىم-جومارت توقايەۆقا دەنساۋلىق ساقتاۋ سەكتورىنداعى تالداۋ قورىتىندىسى بويىنشا دارى-دارمەكتىڭ ۇستەمە باعاسى ارزانداعانى جونىندە اقپارات بەرىلدى. بۇل ازاماتتاردىڭ قاجەتتىلىگىن وتەپ، الەۋمەتتىك ماسەلەلەرىن شەشۋگە وڭ اسەر ەتەدى. ەلىمىزدە ناۋقاستارعا QR-كود ارقىلى تەگىن دارى-دارمەك بەرۋ جوباسى ىسكە قوسىلدى. اتالعان باستاما جالعان رەسەپتتەر جازىپ بەرۋ، دارى-دارمەكتەردى ۇرلاۋ تاۋەكەلدەرىن ازايتىپ، بيۋدجەت قارجىسىن ۇنەمدەيدى.
پرەزيدەنتكە حالىقارالىق ىنتىماقتاستىقتىڭ ناتيجەلەرى، سونىڭ ىشىندە ازەربايجان، رەسەي، گونكونگ، يوردانيا جانە قاتار ەلدەرىنىڭ سىبايلاس جەمقورلىققا قارسى ۆەدومستۆولارىمەن مەموراندۋمدارعا قول قويىلعانى تۋرالى ايتىلدى.
ەكونوميكالىق ىنتىماقتاستىق جانە دامۋ ۇيىمى مەن سىبايلاس جەمقورلىققا قارسى كۇرەس جونىندەگى مەملەكەتتەر توبىنىڭ ۇسىنىمدارىن ىسكە اسىرۋ بويىنشا جۇمىس جالعاسۋدا. ونىڭ اياسىندا وزىق حالىقارالىق تاجىريبەنى ەنگىزۋدى كوزدەيتىن 2 زاڭ جوباسى ءماجىلىستىڭ قاراۋىنا ۇسىنىلدى.
كەزدەسۋ سوڭىندا مەملەكەت باسشىسى ەلىمىزدەگى سىبايلاس جەمقورلىقپەن كۇرەستى ودان ءارى جالعاستىرۋ جونىندە ءبىرقاتار تاپسىرما بەردى.
