قازاقستاندا 5ء-شى دۇنيەجۇزىلىك كوشپەندىلەر ويىندارى قارساڭىندا 2024 جىلعى 3-7 قىركۇيەك ارالىعىندا العاش رەت «ۇلى دالا جورىعى» حالىقارالىق مارافون-بايگەسى وتەدى.
اۋقىمدى سپورتتىق شاراعا 10-نان استام ەلدەن كوماندالار قاتىسادى دەپ كۇتىلۋدە. يران، تۇركيا، ۆەنگريا، قىرعىزستان، وڭتۇستىك افريكا رەسپۋبليكاسى رەسەي فەدەراسياسىنىڭ جانە ت.ب. ەلدەردىڭ شناباندوزدارى ءدۇبىرلى دودادا ب ا ق سىنايتىن بولادى.
اتاپ ايتساق، قىرعىزستان قۇراماسى «ۇلى دالا جورىعىنا» قاتىساتىن ەڭ ۇزدىك اتتاردى ىرىكتەۋ ماقساتىندا كوپكۇندىك ات سپورتى مارافونىن وتكىزدى.
قىرعىزستان ات سپورتى فەدەراسياسىنىڭ ۆيسە-پرەزيدەنتى ماناس سۇلتانوۆ «ۇلى دالا جورىعى» مارافون-بايگەسىنە شاقىرۋدى قابىلداۋ ۇلكەن مارتەبە ەكەنىن ايتتى.
«قازاقستاندا وتەتىن كوپكۇندىك ات جارىسىنا دايىندىق اياسىندا 300 شاقىرىمدىق قاشىقتىققا «كوچموندور جۋرۋشۋ» ىرىكتەۋ مارافونى ءوتتى. بارلىق كوماندالارعا ساتتىلىك تىلەيمىن جانە جەڭىمپازداردىڭ كوپ بولۋىن قالايمىن. ەڭ ءتوزىمدى جانە جىلدام سايگۇلىكتەر جەڭىسكە جەتىپ، تۇعىردان كورىنەتىنىنە سەنىمدىمىن»، - دەدى م.سۇلتانوۆ.
مارافون-بايگە 5 مىڭ جىلدان استام بۇرىن ادام بالاسى جىلقى مالىن العاش رەت قولعا ۇيرەتكەن سولتۇستىك قازاقستان وبلىسىنداعى بوتاي ەلدى مەكەنىندە 3 قىركۇيەكتە باستاۋ الادى.
«ۇلى دالا جورىعىنا» كاباردين-بالقار رەسپۋبليكاسىنىڭ قۇراماسى دا قاتىسۋعا دايىندالۋدا. «امد كاۆكاز» ات سپورتى كلۋبىنىڭ نەگىزىن قالاۋشى احەد ماحوۆ قازاقستاندىق ات جارىسىنا قاتىسۋعا شاقىرتۋ العانىن ايتتى.
«مارافون-بايگەنىڭ بۇكىل ادامزات ءۇشىن كيەلى مەكەن سانالاتىن بوتاي قونىسىنان باستالۋى ەرەكشە ماڭىزدى. ءبىزدىڭ كوماندا اڭىزدار مەن تاريحي جادىگەرلەرگە تولى بوتاي جەرىنە بارۋعا ەرەكشە ىنتالى. ولاي بولسا، كۇت ءبىزدى، قازاقستان!»، - دەپ اتاپ ءوتتى ا.ماحوۆ.
ات جارىسى ەلوردا - استانادا 7 قىركۇيەكتە اياقتالادى. ونىڭ جەڭىمپازدارى 8 قىركۇيەكتە وتەتىن 5ء-شى دۇنيەجۇزىلىك كوشپەندىلەر ويىندارىنىڭ اشىلۋ سالتاناتىنا قاتىسادى.
«ۇلى دالا جورىعى» – جىلقى بالاسىنىڭ ەڭ مىقتى تۇقىمى انىقتالاتىن دالالىق لابوروتورياسى.
ەستەرىڭىزگە سالا كەتەيىك، «JORYQ» رەسپۋبليكالىق فەدەراسياسى قازاقستان رەسپۋبليكاسى ۇلتتىق سپورت قاۋىمداستىعىنىڭ قۇرامىنا كىرەدى. سونىمەن قاتار، قاۋىمداستىق قۇرامىنا بايگە، كوكپار، اۋدارىسپاق، اسىق اتۋ، ساداق اتۋ، جامبى اتۋ، تەڭگە ءىلۋ، قۇسبەگىلىك جانە ت.ب. فەدەراسيالار كىرەدى. قازاقستان رەسپۋبليكاسىنىڭ ۇلتتىق سپورت قاۋىمداستىعىنا بەلگىلى كاسىپكەر، مەسەنات، «التىن قىران» قورى قامقورشىلىق كەڭەسىنىڭ ءتوراعاسى» يسلامبەك سالجانوۆ باسشىلىق ەتەدى.
