Túrkistan oblysynyń Shardara aýdandyq bilim bóliminde búdjet qarajatynyń shamamen 3,7 mıllıard teńgesi jymqyryldy degen aıyppen 15 adam sottaldy. Olardyń biri amnıstıaǵa ilinip bosatyldy, segizi sot zalynan qamaýǵa alyndy. Bul týraly  Otyrar.kz habarlaıdy.

Túrkistan oblysynyń qylmystyq ister jónindegi mamandandyrylǵan aýdanaralyq soty bilim bólimi basshysy Aqshagúl Berdiálıevany jáne onyń qaramaǵyndaǵy qyzmetkerlerin kináli dep tapty. Úkimdi tyńdaýǵa ondaǵan adam keldi.

Basty aıyptalýshy – Berdiálıeva. Sot oǵan 10 jyl bas bostandyǵynan aıyrý jazasyn taǵaıyndady. Segiz býhgalter jeti jylǵa sottaldy.

«Shardara aýdanynyń bilim bólimi basshysyna 10 jyl bas bostandyǵynan aıyrý jazasy taǵaıyndaldy. Býhgalterlerge – 7 jyldan», - dedi sýdıa Daýren Madalıev.

Bólim basshysynyń mindetin ýaqytsha atqarǵan úsh adam qyzmetke salǵyrt qaraǵany úshin kináli dep tanyldy. Tórt aıyptalýshy amnıstıaǵa ilindi: olardyń biri keltirilgen shyǵyndy tolyq ótegen, al úsheýi zeınet jasyna jetken. Kámeletke tolmaǵan balalary bar eki áıelge jazasyn bes jyldan keıin óteý quqyǵy berildi. Al aıyptalýshylardyń biri tergeý barysynda qaıtys boldy, alaıda sot onyń da kinásin anyqtady.

«Qylmystyq jolmen alynǵan múlik memleket kirisine ótti. Olardyń qatarynda 20-ǵa jýyq jyljymaly jáne jyljymaıtyn múlik, sondaı-aq saýda ortalyǵyndaǵy zergerlik bólim bar», - dedi sýdıa.

Sot zalynda aıyptalýshylardyń reaksıasy aıqyn baıqaldy: kóbisi kóz jasyn tyıa almady.

Sot dereginshe, shyǵyndy tek keıbir aıyptalýshylar ǵana ishinara ótegen. Árbiriniń ıemdengen qarajaty 22-den 200 mıllıon teńgege deıingi somany quraǵan. Jábirlenýshi tarap ótemdi azamattyq talap arqyly qaıtarýdy kózdep otyr.

«Men sot sheshimimen kelispeımin. Ol eshteńe alǵan joq. Biz apelásıaǵa beremiz», - dedi aıyptalýshynyń kúıeýi Qudaıbergen Mahanov.

Tergeý shamamen bir jylǵa sozyldy. İs materıaldary 730 tomnan turdy. Jalpy, oblystyń segiz aýdanynda bilim bólimderi qyzmetkerleriniń shamamen 12 mıllıard teńge búdjet qarajatyn jymqyrǵany boıynsha kúdik bar.