Túrli halyqaralyq taldaý agenttikteriniń dereginshe, elimiz birneshe jyl boıy mobıldi ınternet baǵasy arzan memleketter qatarynda kele jatyr. MoneySuperMarket saıtynyń reıtıńinde Qazaqstan 10-orynǵa jaıǵasty. Birinshi orynda Izraıl 1 GB ınternet-trafık quny 0,13 dollar, odan keıin Qyrǵyzstan, al úzdik úshtikti Italıa túıindeıdi.  Jalpy alǵanda, 20 GB ınternet-trafık úshin qazaqstandyqtar 11 dollar tóleıdi. AQSH-ta – 105 dollar, Al Norvegıada – 106 dollar. Sarapshylardyń pikirinshe, ómir súrý deńgeıi jáne tabys kólemi joǵary elderde kez kelgen qyzmet quny sáıkesinshe kóterińki bolady.

«Buǵan áser etetin taǵy bir aspekt – ınfraqurylym. Qurylǵan ınfraqurylym qymbat bolsa, tutynýshylar qaltasyna salmaq túsýi múmkin. Baılanys shyǵyndary halyqtyń ortasha tabysyna baılanysty esepteledi. Qaı jaǵynan qarasaq ta, Qazaqstan basqa eldermen salystyrǵanda ınternet baǵasy arzan el bolyp sanalady», – dedi Sıfrlandyrý salasyndaǵy eýrazıalyq sarapshylar jelisiniń tóraǵasy Dmıtrıı Shedko.

Finprom.kz saıtynyń málimetinshe, jyldam ınternet qunynyń arzan bolýyna sıfrlyq ınfraqurylymǵa memleket tarapynan jasalyp jatqan ınvestısıalar men baılanys operatorlarynyń jelini keńeıtý jónindegi sharalarynyń arqasynda qol jetti. Sıfrlyq damý, ınovasıalar jáne aeroǵarysh ónerkásibi mınıstrliginiń dereginshe, bazalyq stansa qurylysyna shamamen 500 mln AQSH dollary kóleminde ınvestısıa quıylǵan.

Memleket basshysy Qasym-Jomart Toqaev Qaýipsizdik Keńesiniń otyrysynda kólik mınıstri Marat Qarabaevqa jumys barysynda jibergen kemshilikteri úshinsógis jarıalady, dep habarlaıdy Aqorda. 

Prezıdent Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń kólik-logıstıka salasyn damytý máseleleri jónindegi otyrysy ótti.

Kólik mınıstri Marat Qarabaevtyń jáne birqatar ortalyq memlekettik organdar basshylarynyń baıandamalary tyńdaldy.

Memleket basshysy kólik salasyndaǵy ahýaldy synǵa aldy. Qordalanǵan problemalar men belgilengen mejelerdiń oryndalmaýy jańǵyrtý jumystaryn júrgizýge kedergi keltirip otyr.

Prezıdent shekaradan júk ótkizýdiń qıyndyǵyn, kóptegen ótkizý beketteriniń jaǵdaıy nashar ekenin, sondaı-aq iri ınfraqurylymdyq-tranzıttik jobalardyń óz ýaqytynan keshigip jatqanyn aıtty.

Qasym-Jomart Toqaev «Jasyl dáliz» júıesin uıymdastyryp, elimizdiń logıstıkalyq áleýetin ońtaıly paıdalanýdyń mańyzyna toqtaldy. Onyń aıtýynsha, jahandyq syn-qaterler kúsheıgen kezeńde Qazaqstan óziniń básekelestik artyqshylyǵyn saqtap qana qoımaı, ony nyǵaıta túsýge tıis.

Memleket basshysy júk tasymaly kólemin arttyrý úshin naryqty avıaotynmen jetkilikti deńgeıde qamtamasyz etý qajet dep sanaıdy.

Budan bólek, mýltıplıkatıvtik tıimdilikti kóterý maqsatynda elimiz arqyly ótetin júk tasymaly kólemin ulǵaıtý, sonyń ishinde álemdik jetkizý tizbegine qosylý mindeti qoıyldy.

Jıyn sońynda prezıdent mınıstr Marat Qarabaevqa jumys barysynda jibergen kemshilikteri úshin sógis jarıalady.

Memleket basshysy kólik-logıstıka salasyndaǵy problemalardy sheshýge qatysty naqty sharalar qabyldaýdy tapsyrdy.

Qasym-Jomart Toqaev Aqordada Halyqaralyq paralımpıada komıtetiniń prezıdenti Endrú Parsonspen jáne Azıa paralımpıada komıtetiniń prezıdenti Madjıd Rashedpen kezdesti, dep habarlaıdy Aqordanyń baspasóz qyzmeti.

Memleket basshysy paralımpıada qozǵalysynyń mańyzdy mısıasyn joǵary baǵalap, elimiz osynaý izgi maqsatty qýattaıtynyn atap ótti.

Prezıdent otandyq paralımpıadashylardyń álemdik arenadaǵy tabystary Qazaqstannyń ınklúzıvti, ornyqty jáne áleýmettik jaýapkershilik arqalaǵan memleket retindegi kelbetin qalyptastyrýǵa yqpal etetinin jetkizdi.

— Oraıly sátti paıdalanyp, búkil álemde, Azıa qurlyǵynda jáne Qazaqstanda paralımpıada qozǵalysyn ilgeriletý baǵytynda atqaryp jatqan jumystaryńyzǵa rızashylyǵymdy bildiremin. Sizdermen senimdi seriktes bolýǵa ázirmiz. Keleshekte qozǵalysty damytyp, nyǵaıtý maqsatynda birlesip kóp jumys isteıtinimizge kúmán joq, — dedi Prezıdent.

Endrú Parsons pen Madjıd Rashed paralımpıada sportyna jáne Astanada Azıa paralımpıada komıteti Bas assambleıasynyń 8-shi sesıasyn uıymdastyrýǵa kórsetken qoldaýy úshin Qasym-Jomart Toqaevqa alǵys aıtty.

Olar Qazaqstanda paralımpıada qozǵalysy barshaǵa birdeı múmkindik qaǵıdaty aıasynda josparly ári dáıekti túrde damyp kele jatqanyna nazar aýdardy.

— Sońǵy jyldary biz eleýli progres pen eren tabystarǵa kýá boldyq. Parıjde ótken Paralımpıada oıyndarynda Qazaqstan keremet nátıje kórsetti. Sportshylaryńyz toǵyz medal jeńip aldy. Sonyń ishinde alǵash ret eki atlet altyn medalǵa ıe boldy. Qazaqstan sportshylary ózderine deıingi atletterdiń izin jalǵap, óskeleń urpaqty jigerlendirip keledi. Bul kezdeısoqtyq emes, júıeli jumys pen durys tańdalǵan baǵdardyń nátıjesi. Biz Qazaqstannyń paralımpıadalyq sport túrlerin damytý nıetin joǵary baǵalaımyz, — dedi Halyqaralyq paralımpıada komıtetiniń prezıdenti Endrú Parsons.

Madjıd Rashed 2018 jyly Astanaǵa kelgenin, Qazaqstandaǵy parasportshylardyń jattyǵýyna jasalǵan qolaıly jaǵdaımen tanys ekenin aıtty.

— Delegasıamyzǵa Astana unap jatyr. Bizdi jyly shyraımen qarsy aldy. Jergilikti halyqtyń keń peıiliniń arqasynda Qazaqstanda óz úıimizde júrgendeı sezinemiz, — dedi Azıa paralımpıada komıtetiniń prezıdenti.

Kezdesýde elimizde APC jáne IPC jarystaryn ótkizý máseleleri talqylandy. Sondaı-aq otandyq paralımpıadashylardyń bilim berý bastamalary men halyqaralyq baǵdarlamalarǵa qatysýy pysyqtaldy.

Búginde elimizde 19 paralımpıadalyq sport túri qarqyndy damyp keledi. Jyl saıyn túrli deńgeıdegi 800-den asa jarys ótkiziledi. Oǵan 10 myńnan artyq adam qatysady. Ulttyq qurama sapynda 1 myńnan astam sportshy bar.