Qasıetti ramazannyń birtindep jaqsylyq jasaý jarysynyń qyzatyn aıyna aınalaryna senim mol. Baıyrǵy dinimiz qaıta jandanyp, ejelgi musylmandaǵymyz oıanyp keledi.
Aýyz ashý mádenıeti de jyl sanap qalyptasyp, dinı saýatymyz da tolyǵyp keledi. Keshke qaraı aýyz ashatyn asqana, kafe, restoran tabý qıyndap barady. Sonymen qatar, kóptegen tamaqtaný oryndary, qonaq úıler men restorandardyń ramazan aıy úshin arnaıy as mázirlerin jasaýy da qýantady. Al endi qasıetti aı saıyn ótkizilip kele jatqan «Ramazan Challenge» qaıyrymdylyq sharasynyń jóni tipten bólek. Bastapqyda 300 adamǵa aýyz ashtyrýdan bastaǵan belsendi jastar byltyr 3 myń, bıyl 5 myńnan astam adamǵa aýyz ashtyrmaq. Basy-qasynda júrgender asyp-tasyp bara jatqan dáýletti jandar emes, shaǵyn kásipkerler nemese jalaqymen jan baǵyp júrgen qarapaıym azamattar. Eń bastysy olardyń nıetteri kúshti. Burnaǵy kúni olar qalam ustaǵan qaýymǵa— jýrnalıserge aýyz ashtyrdy. Baryp kórip, dám tattyq. Basy-qasynda júrgen «Ramazan Challenge» uıymastyrýshylarynyń biri, kásipker azamat Amandyq Dáýletbekulynyń aıtýynsha, kóbine stýdentterge aýyz ashtyrady eken. Bastapqy jyldardaǵy aýyz asharlarǵa qatysqan stýdentterdiń aldy búginde oqýyn bitirip, jumysqa turǵan. Kóbi qazir osy qaıyrymdylyq sharasynyń bir shetine shyǵysyp júr. Eń basty ereksheligi — ózderi múlde tanymaıtyn, kórmegen, bilmegen jastardy shaqyryp, aýyz ashtyrady. Sosyn tanysady, suhbattasady, birtindep baýyrǵa aınalady. Qasıetti aı arqyly qazirgi jat túgili jaqynyń jatsynyp bara jatqan qoǵamda adamnyń biri-birine degen meıirimin, baýyrmaldyǵyn oıatýǵa taptyrmaıtyn ádemi amal. Igilik pen qaıyrymdylyqqa negizdelgen «Ramazan Challenge» jobasynyń aldaǵy ýaqytta tutas elimizge jaıylyp, barshany meıirimine bóleıtinine senim mol.