Kópqabatty úılerdegi órtter, lıftterden shyqqan aqaýdyń qaıǵyly saldary, tutas bir turǵyn úılerdiń salynyp bitpeı jatyp qırap qalýy, qoldanysqa berilgen úılerdiń qabyrǵasynan setinep sógilýi. Keıingi kezde qurylys salasynda osyndaı kemshilikter kóbeıip ketti. Árıne, munyń bári eń áýeli qurylys kompanıalary men solardyń jumysyn qadaǵalaýshy organdardyń salǵyrttyǵynan bolatyny túsinikti. Biraq keıde qaýipsizdikke jaýapty qyzmetterdiń qolyn zańnyń tompaq normalary baılaıtyn sátteri bolady.

Tótenshe jaǵdaılar mınıstrligindegi 2016 jyly bıik ǵımarattardy qoldanysqa berý ókiletin vedomstvodan alyp qoıý sharasyn osyndaı tompaq normanyń biri dep esepteıdi.  Vedomstvo basshysy Shyńǵys Árinov mınıstrlikke osy ókiletti qaıtarýǵa kúsh salyp júr.

«Kóp qabatty úıler men halyq kóp shoǵyrlanatyn nysandardy qoldanysqa qabyldaý ókilettikterin mınıstrlikke berý máselesin sheship jatyrmyz. Qazir Májiliste zań jobasy qaralyp jatyr. Jyl aıaǵyna deıin biz usynǵan túzetý bekitiledi dep úmittenip otyrmyz», - deıdi ol.

Mınıstr aıtyp otyrǵan ókiletti zań TJM-nen 2016 jyly «alyp qoıǵanyn» joǵaryda aıttyq. Al 2011 jylǵa deıin turǵyn úı qurylysynyń jobalary da osy mınıstrliktiń maquldaýynsyz qabyldanbaıtyn.

Memleket basshysy Qorǵanys mınıstri Rýslan Jaqsylyqovty qabyldady, dep habarlaıdy Aqordanyń baspasóz qyzmeti.

Prezıdent – Qazaqstan Respýblıkasy Qarýly Kúshteriniń Joǵarǵy Bas qolbasshysy Qasym-Jomart Toqaevqa qorǵanys vedomstvosynyń byltyr atqarǵan qyzmeti týraly esep berildi.

Memleket basshysyna armıanyń jaýyngerlik daıyndyǵynyń jaı-kúıi men áskerlerdi daıarlaýdyń jańa tásilderi jóninde baıandaldy.

Rýslan Jaqsylyqov memlekettik qorǵanys tapsyrysyn oryndaý, áleýmettik jáne ıdeologıalyq jumystardy júrgizý, sondaı-aq áskerı ınfraqurylymdy damytý barysy jaıynda aıtty.

Kezdesý sońynda Joǵarǵy Bas qolbasshy Qasym-Jomart Toqaev mınıstrge armıanyń jaýyngerlik áleýetin kóterýge, basqarý úderisterin odan ári sıfrlandyrýǵa, Arnaıy operasıalar kúshterin damytýǵa, áleýmettik-ıdeologıalyq jumystardy kúsheıtýge qatysty naqty tapsyrmalar berdi.

Qorǵanys mınıstrligine qarasty Aıagóz garnızonynda ofıser kóz jumǵan. Garnızonnyń baspasóz qyzmeti áskerı qyzmetker óz úıinde sýısıd jasady dedi. Bul oqıǵaǵa Qorǵanys mınıstrligi túsinikteme berdi, dep habarlaıdy Ulsy.

Qorǵanys mınıstrligi tárbıe jáne ıdeologıalyq jumys departamentiniń bastyǵy, ádilet polkovnıgi Tileýhan Basqojaev aıtýynsha, marqum Aıagóz garnızonyna eki jylǵa shaqyrylǵan. 

«Ofıser dalalyq jumyspen baılanysty emes qarjylyq qyzmette laýazym atqarǵan. Qonys aýdarýyna baılanysty barlyq ótemaqyny, aqshany aldy. Keshe sońǵy ret ákesimen sóılesken, áskerı qyzmetke eshqandaı shaǵym túsirmegen. Múmkin, Aıagóz garnızonyna kóshýine, ıaǵnı oryn aýystyrýyna baılanysty psıhologıalyq áser bolǵan shyǵar. Qazir endi biz boljam jasamaı-aq qoıaıyq. Tergeýshi áriptesterimiz mán-jaıdy anyqtaıdy.  Biz onyń ata-anasyna, otbasyna kóńil aıtamyz. Bul durys emes. Biz shette qalmaımyz, barlyq qajetti tergeý amaldary júredi», - dedi Basqojaev Ortalyq komýnıkasıalar qyzmetinde ótken brıfıńte.

Ofıserdiń ólimi boıynsha Qylmystyq kodekstiń «Ózin-ózi óltirýge deıin jetkizý» babymen qylmystyq is qozǵalǵan.