«Jer úıden órt shyqty. Apatqa eskirgen gaz balony sebep bolǵan». «Shaǵyn asqanada gaz balony jarylyp, adamdar zardap shekti». Keıingi jyldary jańalyqtar leginen osyǵan uqsas málimetterdi jıi oqıtyn boldyq.
Tótenshe jaǵdaılar mınıstrligi osy problemany túp-tamyrymen joıý úshin qoldanysta júrgen gaz balondaryn túgende shyqqan kórinedi. Osylaısha halyqtyń qolynda 348 myń balonnyń gaz saqtaýǵa jaramaıtyny anyqtalyp otyr.
Eń soraqysy, halyq bul balondardy burynǵydaı arnaıy qyzmettiń kómegimen emes, janarmaı stansalaryna baryp, toltyryp júr. Mınıstr Shyńǵys Árinov problemanyń osy jaǵyna kóbirek alańdaıtynyn aıtady.
«Qazir halyq gaz balondardy janarmaı stansalarynda toltyrady. Ol zańǵa qaıshy. Al, ol balondardyń basym bóligi qoldanýǵa jaramsyz. Bizdiń esebimiz boıynsha 348 myń gaz balonyn aýystyrý kerek», - dedi mınıstr.
Máselege tipti Úkimet aralasyp otyr. Premer-mınıstr Oljas Bektenov Úkimet otyrystarynyń birinde 50 jyl boıy úzdiksiz qoldanylyp kele jatqan gaz balondary bar ekenin aıtty. Qazir Ónerkásip jáne qurylys mınıstrligi osy balondardy jańasymen aýystyratyn kásiporyn izdep jatyr.
Atalǵan mınıstrlik gaz balondaryn jańasymen almastyrý halyqtyń qaltasyna salmaq salmaý kerek degen ustanymda otyr. Ol úshin «Jasyl damý» qorynyń 12 mlrd teńgesin birneshe kásiporynǵa bólip berip, memlekettik tapsyrys arqyly jańa balondar óndirý usynylyp júr. Mysaly, «Kazinjenering» kompanıasy bir balondy 34-38 myń teńgeden jasap shyǵa alatynyn aıtqan. Óndiris qýaty osymen qaraılas taǵy bir kásiporyn tabylsa, 350 myń balondy 5 jylda jańartyp shyǵýǵa bolatyn kórinedi.
