«Bizde atom elektr stansıasynyń úzdiksiz jumys isteýin, ony qaýipsiz paıdalanýdy qamtamasyz ete alatyn mamandar bar ma? Eger olardy oqytý josparda bar bolsa, qaıda oqymaq?» degen saýaldy QR Ulttyq ıadrolyq ortalyǵynyń bas dırektory Erlan Batyrbekovke qoıdyq.
– Tek QR Ulttyq ıadrolyq ortalyǵyn ǵana mysalǵa ala otyryp, onyń irgetasyn qalaý kezindegi negizgi mindetterdiń biri Qazaqstan Respýblıkasynda atom energetıkasyn damytý úshin ǵylymı-tehnıkalyq, tehnologıalyq jáne kadrlyq baza qurý bolǵandyǵyn atap kórsetýge bolady. Ulttyq ıadrolyq ortalyq atom salasy úshin kadr daıarlaý máselesine kóp kóńil bóledi. Biz óz qyzmetimiz barysynda kóptegen joǵary bilikti ǵylymı kadr daıarladyq. Kásiporynda óńirlik ýnıversıtetterdiń bitirtip shyǵaratyn kafedralarynyń fılıaldary jumys isteıdi. Qyzmetkerler úshin óz qabiletin júzege asyrý úshin barlyq qajetti jaǵdaı jasalǵan, kadr daıarlaý jáne qaıta daıarlaý, dısertasıany óndiristen qol úzbeı qorǵaý jumysy jolǵa qoıylǵan. Kásiporyn basshylyǵy men qyzmetkerleri PhD dısertasıa qorǵaý jónindegi 3 dısertasıalyq keńestiń turaqty quramyna kiredi.
Osylaısha, AES jobasyn pysyqtaýdy, salý jumystaryn, paıdalanýdy jáne paıdalanýdan shyǵarýdy ǵylymı súıemeldeý máselesi boıynsha, jalpy alǵanda, qajetti kadrmen qamtamasyz etilgenbiz desek te bolady.
Jalpy álemdik tájirıbege sáıkes AES jumysyn qamtamasyz etetin personaldy jasaqtaý úshin 2 energoblokty AES-ti paıdalaný kezinde orta eseppen joǵary jáne arnaýly orta bilimi bar 2000 adamǵa deıingi personal qajet. Osy personaldyń salystyrmaly túrdegi az bóligi «ıadrolyq» mamandyqtar boıynsha daıyndyqtan ótken tar sheńberli, ıaǵnı belgili bir salanyń mamandary bolyp sanalady, bular – ıadrolyq reaktor men reaktorǵa qatysy bar negizgi jabdyqtardyń jumysyn basqaryp, baqylaıtyn adamdar. Qalǵandary – jalpy beıindegi mamandar, ıaǵnı energetıkter, hımıkter, ınjenerler, elektrıkter jáne t.b. Qalaı bolǵanda da, AES salý týraly sheshim qabyldaý kezinde kadr daıarlaýdyń arnaıy jospary iske asyrylady jáne AES salý týraly sheshim qabyldaýdan bastap, paıdalanýǵa berilgenge deıingi ýaqyt ishinde, al bul shamamen 10 jyl, qajetti personal tıisti oqytýdan ótkiziledi.
Qazirgi ýaqytta Úkimet Memleket basshysynyń tapsyrmasy boıynsha tehnıkalyq jáne ınjenerlik saladaǵy ǵylymı jáne bilim berý negizin keńeıtý boıynsha naqty jumysqa kirisip te ketti jáne sheteldik tehnıkalyq JOO fılıaldaryn ashý, tehnıkalyq mamandyqtarǵa arnalǵan granttardy ulǵaıtý jáne t. b. týraly naqty sheshim qabyldaý satysyna shyqty.
