Búgin Premer-Mınıstr Oljas Bektenovtiń tóraǵalyǵymen Aktıvterdi qaıtarý máseleleri jónindegi komısıanyń kezekti otyrysy boldy, dep habarlaıdy Úkimettiń baspasóz qyzmeti.
Otyrys qorytyndysyna sáıkes Komısıa birqatar sheshim qabyldady. Jalpy kólemi 85 mlrd teńgeden asatyn zańsyz ıemdenilgen aktıvterdi qaıtarý týraly kelisimder maquldandy. Memleketke qaıtarý josparlanyp otyrǵan aktıvterdiń qatarynda Qazaqstandaǵy jáne sheteldegi turǵyn úıler, ákimshilik ǵımarattar, aqshalaı qarajat, kompanıalardaǵy úlester, qymbat zergerlik buıymdar, 10 myń gektardan astam jer bar.
Sonymen qatar buryn memleketten «Zańsyz ıemdenilgen aktıvterdi memleketke qaıtarý týraly» Zań sýbektileriniń biriniń baqylaýyna zańsyz ótken quny 10 mlrd teńgeden astam somaǵa baǵalanatyn paıda bolýy túsiniksiz kásiporyndy aktıv retinde memleket kirisine aınaldyrý týraly sotqa talap-aryz engizý maquldandy.
Komısıa sheshimimen Zań sýbektileriniń tizilimi eki jańa tulǵamen tolyqtyryldy, olarǵa qatysty Bas prokýratýranyń Aktıvterdi qaıtarý jónindegi komıteti tıisti is-sharalar qabyldaıdy.
«Memleket basshysynyń tapsyrmasy boıynsha zańsyz ıemdenilgen aktıvterdi qaıtarý jónindegi jumystar kúsheıtiledi. Bul rette bızneske qysym jasaýǵa jol berilmeıdi. Memleketke qaıtarylǵan barlyq aktıvter áleýmettik paıdaly maqsattarǵa baǵyttalatyn bolady», - dep atap ótti Oljas Bektenov.
Komısıanyń jumysy jalǵasyp jatyr.
Aıta ketsek, Komısıa otyrysy jańartylǵan quramda ótti. Komısıanyń quramyna «Qazaqstannyń Azamattyq Alánsy» ZTB prezıdenti Baný Nurǵazıeva men Parlament Májilisiniń depýtaty Marat Báshimov kirdi.
